ଡାବୁଗାଁ: ନବରଙ୍ଗପୁର ଜିଲ୍ଲା ଡାବୁଗାଁ ଅଞ୍ଚଳରେ ଜଣେ ନିଶାସକ୍ତ ଯୁବକ ବରଗଛର ପୂରା ଅଗରେ ଚଢିଯିବା ଭଳି ଚାଞ୍ଚଲ୍ୟକର ଘଟଣା ନଜରକୁ ଆସିଛି ।
ଏପରିକି ସେ ତଳକୁ ଓହ୍ଲାଇବାକୁ ମନା କରିଥିଲା । ପୋଲିସ ଓ ଅଗ୍ନିଶମ ବାହିନୀ ତାକୁ ଉଦ୍ଧାର କରିବାକୁ ଯାଇଥିବା ବେଳେ ଯୁବକ ଜଣକ ତଳକୁ ଡେଇଁ ପଡିବ ବୋଲି ଧମକ ମଧ୍ୟ ଦେଇଥିଲା ।
ପ୍ରାପ୍ତ ସୂଚନା ଅନୁଯାୟୀ ହାଟପଦାସାହି ଗାଁର ମାନସ ନାୟକ କୌଣସି କାରଣବଶତଃ ସ୍ତ୍ରୀ ସହ ଝଗଡା କରିବା ପରେ ଗଛ ଉପରେ ଚଢିଯାଇଥିଲା । ଯାହା ପରେ ସ୍ଥାନୀୟ ବାସିନ୍ଦା ପୋଲିସକୁ ଖବର ଦେଇଥିଲେ ।
ବହୁ ପ୍ରଚେଷ୍ଟା ପରେ ପାଖାପାଖି ଦେଢ ଘଣ୍ଟାର କସରତ ପରେ ତାକୁ ତଳକୁ ଆଣିବାରେ ଉଦ୍ଧାର କାରୀ ଦଳ ସଫଳ ହୋଇଥିଲେ ।
ତେବେ ପୋଲିସ ତାକୁ ଅଟକ ରଖିବା ସହ ପଚରାଉଚରା କରୁଥିବା ବେଳେ ସେ ନିଶାଗ୍ରସ୍ତ ଥିବା ଜାଣିବାକୁ ମିଳିଥିଲା ।