ଭୁବନେଶ୍ୱର: ରାଜ୍ୟରେ ଥିବା ସମସ୍ତ ୫୫ଟି ନିଶା ନିବାରଣ କେନ୍ଦ୍ରରୁ ଗତ ୨ବର୍ଷ ମଧ୍ୟରେ ୧୯,୩୯୫ ଜଣ ନିଶାସକ୍ତଙ୍କୁ ନିଶାମୁକ୍ତ କରାଯାଇ ପାରିଛି। ଏମାନଙ୍କ ମଧ୍ୟରେ ଗଞ୍ଜାମରେ ସର୍ବାଧିକ ୬୦୩୯ ଜଣ ଥିବାବେଳେ ଖୋର୍ଦ୍ଧାରେ ୧୪୪୦, କେନ୍ଦୁଝରରେ ୧୧୨୫ ଓ କଟକରେ ୧୦୩୭, ଯାଜପୁରରେ ୩୫ଜଣଙ୍କୁ ନିଶା କବଳରୁ ଉଦ୍ଧାର କରାଯାଇଛି ।
ସୂଚନା ଅନୁସାରେ, ରାଜ୍ୟରେ ନିଶା କାରବାର ବଢ଼ି ଚାଲିଥିବା ବେଳେ ନିଶା ନିବାରଣ କେନ୍ଦ୍ରର ଘୋର ଅଭାବ ଦେଖାଦେଇଛି। ସୀମିତ ସମ୍ବଳ ଭିତରେ ଗତ ଦୁଇ ବର୍ଷରେ ପ୍ରାୟ ୨୦ ହଜାର ଲୋକଙ୍କୁ ନିଶା ମୁକ୍ତ କରାଯାଇଛି। ଏଥସହ ନିଶାର କୁପ୍ରଭାବ ସମ୍ପର୍କରେ ସଚେତନତା ସୃଷ୍ଟି ପାଇଁ ବ୍ୟାପକ ସରକାରୀ ଅର୍ଥ ବିନିଯୋଗ ହେଉଛି। ରାଜ୍ୟରେ ୫୫ଟି ନିଶା ନିବାରଣ କେନ୍ଦ୍ର ରହିଛି। ଏଥିମଧ୍ୟରୁ କେନ୍ଦ୍ର ସରକାରଙ୍କ ଅନୁଦାନରେ ୨୯ଟି ଜିଲାରେ ୪୧ଟି ନିଶା ନିବାରଣ କେନ୍ଦ୍ର ଚାଲୁଥିବାବେଳେ ରାଜ୍ୟ ସରକାରଙ୍କ ଅନୁଦାନରେ ୧୦ ଜିଲାରେ ୧୧ କେନ୍ଦ୍ର ରହିଛି। କେନ୍ଦ୍ର ସରକାରଙ୍କ ଦ୍ବାରା ପରିଚାଳିତ ନିଶା ନିବାରଣ କେନ୍ଦ୍ରରେ ୧୫ ଜଣ ଓ ରାଜ୍ୟ ସରକାରଙ୍କ ଦ୍ବାରା ପରିଚାଳିତ ନିଶା ନିବାରଣ କେନ୍ଦ୍ରରେ ୩୦ ଜଣ ଲେଖାଏ ନିଶାସକ୍ତ ବ୍ୟକ୍ତିଙ୍କ ପାଇଁ ଏକ ମାସ ପର୍ଯ୍ୟନ୍ତ ମାଗଣାରେ ରହିବା, ଖାଇବା, ଚିକିତ୍ସା ସହିତ ବୈଷୟିକ ତାଲିମର ବ୍ୟବସ୍ଥା ରହିଛି।
ଖୋର୍ଦ୍ଧା ଜିଲାରେ ସର୍ବାଧିକ ୬ଟି ନିଶା ନିବାରଣ କେନ୍ଦ୍ର ଥିବାବେଳେ ପୁରୀରେ ୫, କଟକରେ ୪, ଗଞ୍ଜାମ, ଝାରସୁଗୁଡ଼ା, କେନ୍ଦୁଝର ଜିଲାରେ ୩ଟି ଲେଖାଏ ନିଶା ନିବାରଣ କେନ୍ଦ୍ର ରହିଛି।
Comments are closed.