୨୦ ମିନିଟ ସମୟ ଦିଅ କୋହଲିଙ୍କୁ ଫର୍ମକୁ ଫେରାଇ ଆଣିବି

ମୁମ୍ବାଇ: ଇଂଲଣ୍ଡ ବିପକ୍ଷ ଦିନିକିଆ କ୍ରିକେଟ ସିରିଜରେ ଭାରତ ବିଜୟୀ ହୋଇଥିଲେ ମଧ୍ୟ ଏବେ ବି ବିରାଟ କୋହଲିଙ୍କ ଫର୍ମ ଚିନ୍ତାର କାରଣ ସାଜିଛି । ଏହି ଅବସରରେ ଲିଟିଲ ମାଷ୍ଟର ସୁନୀଲ ଗାଭାସ୍କର କହିଛନ୍ତି ମୋତେ ୨୦ ମିନିଟ ସମୟ ଦିଅ ମୁଁ କୋହଲିଙ୍କୁ ଫର୍ମକୁ ଫେରାଇ ଆଣିବି । ଅଫ ଷ୍ଟମ୍ପ ବାହାରକୁ ଯାଉଥିବା ବଲରେ ଆଉଟ ହେବା ସମସ୍ୟା ମଧ୍ୟ ଦୂର କରିପାରିବି । ଏହି ୭୩ ବର୍ଷୀୟ ମହାନ ବ୍ୟାଟ୍ସମ୍ୟାନଙ୍କ ମତରେ ଜଣେ ଓପନର ଭାବେ ମୁଁ ସମସ୍ୟା ସହ ଭଲ ଭାବେ ଅବଗତ । ଯଦି ଫର୍ମ ଭଲ ନ ଥାଏ ତାହାହେଲେ ବ୍ୟାଟ୍ସମ୍ୟାନ ରନ ସଂଗ୍ରହ କରିବା ପାଇଁ ଅଫ ସାଇଡ ବାହର ବଲକୁ ଖେଳିବାକୁ ଚେଷ୍ଟା କରିଥାଏ । ଏହିଠାରୁ ସମସ୍ୟା ଆରମ୍ଭ ହୋଇଥାଏ । ଇଂଲଣ୍ଡ ଗସ୍ତରେ କୋହଲି ୭୬ ରନ କରିଥିବା ବେଳେ ଏବେ ୱେଷ୍ଟଇଣ୍ଡିଜ ଗସ୍ତ ପୂର୍ବରୁ ବିଶ୍ରାମ ନେଇଛନ୍ତି । ଶେଷ ୧୬ ଇନିଂସରେ ୨୯୪ ରନ କରିଛନ୍ତି । ଆଗକୁ ଟି୨୦ ବିଶ୍ୱକପ ଥିବାରୁ କୋହଲିଙ୍କ ଅଭିଜ୍ଞତା ଓ ଫର୍ମ ଦଳ ପାଇଁ ଜରୁରୀ । ଦେଖାଯାଉ ଗାଭାସ୍କରଙ୍କ ପାଖକୁ କୋହଲି ତ୍ରୁଟି ସୁଧାରିବା ପାଇଁ ଯାଉଛନ୍ତି କି ନାହିଁ ।