‘ନିଜ ବିମାନକୁ ଫେରିଯାଅ’: ଟ୍ରମ୍ପଙ୍କ ଅଲ୍ଟିମେଟମ୍ ପରେ ପାକିସ୍ତାନ ସେନାମୁଖ୍ୟ ଅସିମ୍ ମୁନିରଙ୍କୁ ଉପେକ୍ଷା କଲା ଇରାନ
ତେହେରାନ: ଆମେରିକା ଏବଂ ଇରାନ ମଧ୍ୟରେ ବୃଦ୍ଧି ପାଉଥିବା କୂଟନୈତିକ ତିକ୍ତତା ମଧ୍ୟରେ ପାକିସ୍ତାନ ସେନାମୁଖ୍ୟ ଜେନେରାଲ ଅସିମ୍ ମୁନିରଙ୍କୁ ଏକ ବଡ଼ କୂଟନୈତିକ ଝଟକା ସହିବାକୁ ପଡ଼ିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏକ କଠୋର ‘ଶେଷ ଚେତାବନୀ’ ବାର୍ତ୍ତା ଧରି ମଧ୍ୟସ୍ଥତା ପାଇଁ ଅସିମ୍ ମୁନିର ତେହେରାନ ପହଞ୍ଚିଥିଲେ। କିନ୍ତୁ ଇରାନର ଶୀର୍ଷ ନେତୃତ୍ୱ ଏହି ଶାନ୍ତି ପ୍ରସ୍ତାବକୁ ସିଧାସଳଖ ପ୍ରତ୍ୟାଖ୍ୟାନ କରିବା ସହ ପାକିସ୍ତାନ ସେନାମୁଖ୍ୟଙ୍କୁ ଅଣଦେଖା କରିଛନ୍ତି।
ରିପୋର୍ଟ ଅନୁସାରେ, ଇରାନର ଅଧିକାରୀମାନେ ପାକ୍ ସେନାପତିଙ୍କୁ ସ୍ପଷ୍ଟ ଭାବେ କହିଛନ୍ତି— “ନିଜ ବିମାନକୁ ଫେରିଯାଅ।” ଇରାନ ପକ୍ଷରୁ ସ୍ପଷ୍ଟ କରାଯାଇଛି ଯେ ଆମେରିକା ଯଦି ପ୍ରକୃତରେ ଆଲୋଚନା ଚାହୁଁଛି, ତେବେ ତାହାକୁ ପ୍ରଥମେ ଇରାନର ସମସ୍ତ ଗୁରୁତ୍ୱପୂର୍ଣ୍ଣ ସର୍ତ୍ତକୁ ଗ୍ରହଣ କରିବାକୁ ପଡ଼ିବ। ଆମେରିକାର ଚାପ ଆଗରେ ତେହେରାନ ଆଦୌ ମୁଣ୍ଡ ନୁଆଁଇବ ନାହିଁ ବୋଲି ଦୃଢ଼ୋକ୍ତି ପ୍ରକାଶ କରାଯାଇଛି।
ଆନ୍ତର୍ଜାତୀୟ ବିଶ୍ଳେଷକଙ୍କ ମତରେ, ଆମେରିକା ଓ ଇରାନ ବିବାଦରେ ପାକିସ୍ତାନ ନିଜକୁ ଜଣେ ପ୍ରମୁଖ ଶାନ୍ତି ଦୂତ ଭାବେ ପ୍ରତିଷ୍ଠା କରିବାକୁ ଅହରହ ଚେଷ୍ଟା କରୁଥିଲା। ମାତ୍ର ଇରାନର ଏହି ଅପ୍ରତ୍ୟାଶିତ ଓ କଠୋର ପ୍ରତିକ୍ରିୟା ପାକିସ୍ତାନର ସମସ୍ତ କୂଟନୈତିକ ଚାଲ୍କୁ ପଣ୍ଡ କରିଦେଇଛି। ଟ୍ରମ୍ପ ପ୍ରଶାସନ ଇରାନ ଉପରେ କଟକଣା ବୃଦ୍ଧି କରୁଥିବା ବେଳେ ଏଭଳି ଘଟଣା ମଧ୍ୟପ୍ରାଚ୍ୟର ରାଜନୈତିକ ସ୍ଥିତିକୁ ଆହୁରି ଜଟିଳ କରିଛି।