ଝାରସୁଗୁଡ଼ା: ଗୋପାଳ ଦେଖାଇଲା କିଭଳି ମାରିଥିଲା ଗୁଳି । ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କୁ ହତ୍ୟା ଘଟଣାର ତଦନ୍ତ କରୁଥିବା କ୍ରାଇମବ୍ରାଞ୍ଚ ଆଜି ହତ୍ୟାକାଣ୍ଡର ସିନ୍ ରିକ୍ରିଏସନ୍ କରିଛି । ଗାନ୍ଧୀଛକର ଯେଉଁ ସ୍ଥାନରେ ଗୋପାଳ, ନବ ଦାସଙ୍କୁ ଗୁଳି କରିଥିଲା ସେଠାରେ ସେ ଡେମୋ ଦେଖାଇଛି ।
କ୍ରାଇମ୍ ସିନ୍ ରିକ୍ରିଏସନ୍ ଲାଗି ୨ ପ୍ଲାଟୁନ୍ ପୋଲିସ ଫୋର୍ସ ଉକ୍ତ ଅଞ୍ଚଳକୁ କର୍ଡନ କରି ନେଇଥିଲେ । କ୍ରାଇମବ୍ରାଞ୍ଚ ରିମାଣ୍ଡରେ ଥିବା ଗୋପାଳ ଗୋଟି ଗୋଟି କରି ସବୁକିଛିର ଡେମୋ ଦେଖାଇଛି । ମନ୍ତ୍ରୀ କେତେବେଳେ ପହଞ୍ଚିଲେ, ସେ କେଉଁଠୁ କିଭଳି ଭାବେ ଗୁଳିମାଡ଼ କରି କେଉଁ ଆଡ଼େ ଧାଇଁଥିଲା । ସବୁକିଛି କ୍ରାଇମବ୍ରାଞ୍ଚ ଆଗରେ ସିନ୍ ରିକ୍ରିଏସନ୍ କରିଛି ।
ଘଟଣାସ୍ଥଳରେ ଦୁଇ ଥର କ୍ରାଇମ୍ ସିନ୍ ରିକ୍ରିଏସନ୍ କରିଛି କ୍ରାଇମବ୍ରାଞ୍ଚ । ହାତରେ ଡେମୋ ବନ୍ଧୁକ ଧରି ଗୋପାଳ ସବୁ କିଛି ବର୍ଣ୍ଣନା କରିଛି । ସିନ୍ ରିକ୍ରିଏସନର ଭିଡିଓଗ୍ରାଫି କ୍ରାଇମବ୍ରାଞ୍ଚ ପକ୍ଷରୁ କରାଯାଇଛି । ଦ୍ୱିତୀୟ ପର୍ଯ୍ୟାୟରେ ଗୋପାଳକୁ ୪ ଦିନିଆ ରିମାଣ୍ଡରେ ନେଇ କ୍ରାଇମବ୍ରାଞ୍ଚ ପଚରାଉଚରା କରୁଥିବା ବେଳେ ଆଜି ସିନ୍ ରିକ୍ରିଏସନ୍ କରାଯାଇଛି ।
ଜାନୁଆରୀ ୨୯ ତାରିଖରେ କାରରୁ ଓହ୍ଲାଇବା ବେଳେ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କୁ ଗୋପାଳ ଗାନ୍ଧୀ ଛକରେ ଗୁଳିମାଡ଼ କରିଥିଲା । ଗୁଳିମାଡ଼ରେ ନବ ଦାସଙ୍କ ମୃତ୍ୟୁ ହୋଇଥିବା ବେଳେ ସରକାର କ୍ରାଇମବ୍ରାଞ୍ଚକୁ ତଦନ୍ତ ନିର୍ଦ୍ଦେଶ ଦେଇଥିଲେ । ଗୋପାଳକୁ ଚାକିରିରୁ ବହିଷ୍କାର କରାଯାଇଥିଲା ।