ଜିଏସଟି ଲାଗୁ ହେବାର ୯ ବର୍ଷ ପୂରଣ: ଟିକସଦାତାଙ୍କୁ ମିଳିପାରେ ବଡ଼ ଆଶ୍ୱସ୍ତି, ଆଗାମୀ ପରିଷଦ ବୈଠକ ଉପରେ ଶିଳ୍ପ ଜଗତର ନଜର

ନୂଆଦିଲ୍ଲୀ: ୨୦୧୭ ମସିହା ଜୁଲାଇ ୧ ତାରିଖରେ ସାରା ଦେଶରେ ଲାଗୁ ହୋଇଥିବା ବସ୍ତୁ ଓ ସେବା କର (ଜିଏସଟି) ବ୍ୟବସ୍ଥା ସଫଳତାର ସହ ୯ ବର୍ଷ ପୂରଣ କରିଛି। ଏବେ ଶିଳ୍ପ ଜଗତ ଏବଂ ଟିକସଦାତାମାନେ ଏଥିରେ ଆହୁରି କିଛି ବଡ଼ ସଂସ୍କାରକୁ ଅପେକ୍ଷା କରିଛନ୍ତି। ଆଗାମୀ ଦିନରେ ଇନପୁଟ୍ ଟ୍ୟାକ୍ସ କ୍ରେଡିଟ୍ ନିୟମକୁ କୋହଳ କରାଯିବା ସହ ଟିକସ ପଇଠ ପ୍ରକ୍ରିୟାକୁ ଅଧିକ ସରଳ କରାଯିବ ବୋଲି ଆଶା କରାଯାଉଛି।

ସ୍ୱାଧୀନତା ପରେ ଦେଶର ସବୁଠାରୁ ବଡ଼ ଟିକସ ସଂସ୍କାର ଭାବେ ପରିଚିତ ଜିଏସଟି ପୂର୍ବରୁ ଲାଗୁ ହେଉଥିବା ଭାଟ୍, ଏକ୍ସାଇଜ୍ ଡ୍ୟୁଟି ଓ ସର୍ଭିସ ଟ୍ୟାକ୍ସ ଭଳି ଅନେକ ଟିକସକୁ ଗୋଟିଏ ଛତା ତଳକୁ ଆଣିପାରିଛି। ବର୍ତ୍ତମାନ ଦେଶରେ ୧.୬୫ କୋଟିରୁ ଅଧିକ ପଞ୍ଜୀକୃତ ଜିଏସଟି ଟିକସଦାତା ଅଛନ୍ତି। ଗତ ୯ ବର୍ଷ ମଧ୍ୟରେ ୧୯୨.୭୩ କୋଟିରୁ ଅଧିକ ଜିଏସଟି ରିଟର୍ଣ୍ଣ ଦାଖଲ ହୋଇଥିବା ବେଳେ ୭୭୮ କୋଟିରୁ ଅଧିକ ଇ-ୱେ ବିଲ୍ ଜାରି କରାଯାଇସାରିଛି। ଟିକସ ଆଦାୟ କ୍ଷେତ୍ରରେ ମଧ୍ୟ ବଡ଼ ସଫଳତା ଦେଖିବାକୁ ମିଳିଛି। ଜୁନ୍ ୨୦୨୬ରେ ମୋଟ ଜିଏସଟି ସଂଗ୍ରହ ୧.୬୨ ଲକ୍ଷ କୋଟି ଟଙ୍କାରେ ପହଞ୍ଚିଛି, ଯାହାକି ଗତ ବର୍ଷ ତୁଳନାରେ ୧୧.୨ ପ୍ରତିଶତ ଅଧିକ। ସେହିପରି ଏପ୍ରିଲ ୨୦୨୬ରେ ସର୍ବାଧିକ ୨.୪୨ ଲକ୍ଷ କୋଟି ଟଙ୍କାର ରେକର୍ଡ ମାସିକ ଟିକସ ଆଦାୟ ହୋଇଥିଲା।

ଡେଲୋଏଟ୍ ଇଣ୍ଡିଆ ପକ୍ଷରୁ କରାଯାଇଥିବା ସର୍ଭେ ଅନୁଯାୟୀ, ୯୯ ପ୍ରତିଶତରୁ ଅଧିକ କମ୍ପାନୀ ଜିଏସଟି ବ୍ୟବସ୍ଥାକୁ ନେଇ ସକାରାତ୍ମକ ମତ ପ୍ରକାଶ କରିଛନ୍ତି। ଗ୍ରାଣ୍ଟ ଥର୍ଣ୍ଣଟନ ମଧ୍ୟ କହିଛି ଯେ, ଜିଏସଟି ଟିକସ ବ୍ୟବସ୍ଥାରେ ସ୍ୱଚ୍ଛତା ଆଣିବା ସହ ଦେଶର ଅର୍ଥବ୍ୟବସ୍ଥାକୁ ଏକ ସାଧାରଣ ବଜାରରେ ପରିଣତ କରିବାରେ ପ୍ରମୁଖ ଭୂମିକା ଗ୍ରହଣ କରିଛି।

ବର୍ତ୍ତମାନ ସମସ୍ତଙ୍କ ନଜର ଆଗାମୀ ଜିଏସଟି ପରିଷଦ ବୈଠକ ଉପରେ ରହିଛି। ସୂଚନାଯୋଗ୍ୟ ଯେ, ଗତ ୨୦୨୫ ଅଗଷ୍ଟ ମାସ ପରେ ପରିଷଦର କୌଣସି ବୈଠକ ହୋଇନାହିଁ। ବିଶେଷଜ୍ଞଙ୍କ ମତରେ, ଆଗାମୀ ବୈଠକରେ ଇନପୁଟ୍ ଟ୍ୟାକ୍ସ କ୍ରେଡିଟ୍ (ଆଇଟିସି) ନିୟମକୁ ଅଧିକ ସରଳ କରିବା, ଇନଭର୍ଟେଡ୍ ଡ୍ୟୁଟି ଷ୍ଟ୍ରକଚର ସମସ୍ୟାର ସମାଧାନ ଏବଂ କ୍ଷୁଦ୍ର ବ୍ୟବସାୟୀଙ୍କ ପାଇଁ ନିୟମ ପାଳନକୁ ସହଜ କରିବା ଦିଗରେ ବଡ଼ ନିଷ୍ପତ୍ତି ନିଆଯାଇପାରେ। ଏହାଛଡ଼ା ଡିଜିଟାଲ ପ୍ରକ୍ରିୟାକୁ ମଜବୁତ କରିବା ଏବଂ ଜିଏସଟି ଆପିଲେଟ୍ ଟ୍ରିବ୍ୟୁନାଲର ସୁଚାରୁ ପରିଚାଳନା ଉପରେ ମଧ୍ୟ ଗୁରୁତ୍ୱ ଦିଆଯିବାର ସମ୍ଭାବନା ରହିଛି।