ପଞ୍ଜାବ ଜଳନ୍ଧରରେ ମର୍ମନ୍ତୁଦ ସଡ଼କ ଦୁର୍ଘଟଣା: ଗାଡ଼ି ଧକ୍କାରେ ହନି ସିଂଙ୍କ ପୁତୁରାଙ୍କ ସମେତ ୨ ମୃତ
ପଞ୍ଜାବ: ଜଳନ୍ଧରରେ ଏକ ହୃଦୟବିଦାରକ ସଡ଼କ ଦୁର୍ଘଟଣାରେ ଦୁଇଜଣ ଯୁବକଙ୍କର ପ୍ରାଣହାନି ଘଟିଛି। ମୃତକଙ୍କ ମଧ୍ୟରେ ଜଣାଶୁଣା ପଞ୍ଜାବୀ ଗାୟକ ତଥା ରାପର ୟୋ ୟୋ ହନି ସିଂଙ୍କ ପୁତୁରା ୱିଦିତ ଓଲକ ଏବଂ ତାଙ୍କ ବନ୍ଧୁ ଆରବ ତାଲୱାର ରହିଛନ୍ତି। ଏହି ଅଭାବନୀୟ ଘଟଣା ସମଗ୍ର ଅଞ୍ଚଳରେ ଏବଂ ସଙ୍ଗୀତ ଜଗତରେ ଗଭୀର ଶୋକର ଛାୟା ଖେଳାଇ ଦେଇଛି।
ମିଳିଥିବା ସୂଚନା ଅନୁସାରେ, ଏକ ଜନ୍ମଦିନ ପାର୍ଟିରୁ ଫେରୁଥିବା ସମୟରେ ପୁଲିସ ଲାଇନ୍ସ ନିକଟସ୍ଥ ଫ୍ଲାଇଓଭର ଉପରେ ଭୋର ସମୟରେ ଏହି ଦୁର୍ଘଟଣା ଘଟିଥିଲା। ଯାତ୍ରା କରୁଥିବା ଦ୍ରୁତଗାମୀ ଫୋଲକ୍ସୱାଗନ୍ କାର୍ଟି ହଠାତ୍ ନିୟନ୍ତ୍ରଣ ହରାଇ ରାସ୍ତା କଡ଼ରେ ଛିଡ଼ା ହୋଇଥିବା ପୌରପାଳିକାର ଏକ ସଫେଇ ଟ୍ରାକ୍ଟର-ଟ୍ରଲି ସହ ପଛପଟୁ ଜୋର ରେ ଧକ୍କା ହୋଇଥିଲା। ଉକ୍ତ ଟ୍ରାକ୍ଟରଟି ସେତେବେଳେ ଫ୍ଲାଇଓଭର ଉପରେ ସଫେଇ କାର୍ଯ୍ୟ ପାଇଁ ସେଠାରେ ଛିଡ଼ା କରାଯାଇଥିଲା।
ଦୁର୍ଘଟଣାଟି ଏତେ ଭୟାବହ ଥିଲା ଯେ କାର୍ର ସମ୍ମୁଖ ଭାଗ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଥିଲା ଏବଂ ଘଟଣାସ୍ଥଳରେ ହିଁ ଦୁଇଜଣ ଯୁବକଙ୍କର ମୃତ୍ୟୁ ଘଟିଥିଲା। ଖବର ପାଇ ସ୍ଥାନୀୟ ପୁଲିସ ତତକ୍ଷଣାତ୍ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ଜବତ କରିବା ସହ ଘଟଣାର ଅଧିକ ତଦନ୍ତ ଆରମ୍ଭ କରିଥିଲା। ତେବେ ପରିବାର ପକ୍ଷରୁ କୌଣସି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଇଚ୍ଛା ନଥିବାରୁ, ପୁଲିସ ଆବଶ୍ୟକୀୟ ପ୍ରକ୍ରିୟା ଶେଷ କରି ମୃତଦେହଗୁଡ଼ିକୁ ପରିବାରବର୍ଗଙ୍କ ହସ୍ତାନ୍ତର କରିଛି।
ଏହି ଦୁଃଖଦ ଖବର ସାମ୍ନାକୁ ଆସିବା ପରେ ସଙ୍ଗୀତ ଜଗତରେ ଏବଂ ପ୍ରଶଂସକଙ୍କ ମହଲରେ ଶୋକର ଲହରୀ ଖେଳିଯାଇଛି। ପ୍ରସିଦ୍ଧ ଗାୟକ ହନି ସିଂ ନିଜର ଅଫିସିଆଲ୍ ସୋସିଆଲ ମିଡିଆ ଆକାଉଣ୍ଟରେ ପୁତୁରାଙ୍କ ଫଟୋ ସେୟାର କରି ଏହାକୁ ତାଙ୍କ ଜୀବନର ଏକ ଅତି ମର୍ମନ୍ତୁଦ ଓ ଅସହ୍ୟ ଦିନ ବୋଲି ବର୍ଣ୍ଣନା କରିଛନ୍ତି।