ନୂଆଦିଲ୍ଲୀ: ଜମ୍ମୁ କାଶ୍ମୀରର ପ୍ରସିଦ୍ଧ ଗୁଲମାର୍ଗ ରୋପୱେରେ କିଛି ଯାନ୍ତ୍ରିକ ତ୍ରୁଟି ପାଇଁ ଶହ ଶହ ପର୍ଯ୍ୟଟକ ଆକାଶରେ ଫସି ରହିଛନ୍ତି। ପ୍ରାୟ ୩୦୦ରୁ ଅଧିକ ପର୍ଯ୍ୟଟକ ରୋପୱେ କ୍ୟାବିନରେ ଫସି ରହିଥିବା ସୂଚନା ମିଳିଛି।
ସୂଚନା ଅନୁଯାୟୀ, ରୋପୱେ କ୍ୟାବିନଗୁଡ଼ିକ ହଠାତ୍ ବନ୍ଦ ହୋଇଯିବାରୁ ଆତଙ୍କ ସୃଷ୍ଟି ହୋଇଥିଲା। ଫସି ରହିଥିବା ପର୍ଯ୍ୟଟକମାନେ ଚିତ୍କାର କରିବାକୁ ଲାଗିଥିଲେ। ସେନା, ପୋଲିସ ଏବଂ ପ୍ରଶାସନ ଟିମ୍ ଘଟଣାସ୍ଥଳରେ ପହଞ୍ଚି ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଏନେଇ ମୁଖ୍ୟମନ୍ତ୍ରୀ ଓମର ଅବଦୁଲ୍ଲା କହିଛନ୍ତି ଯେ ପରିସ୍ଥିତି ଉପରେ ନଜର ରଖାଯାଇଛି ଏବଂ ଆତଙ୍କିତ ହେବାର କୌଣସି ଆବଶ୍ୟକତା ନାହିଁ।
ଗୁଲମାର୍ଗରେ SDRF, NDRF, ଏବଂ ଗୁଲମାର୍ଗ ଗୋଣ୍ଡୋଲା QRT ଦଳ ଉପସ୍ଥିତ ଅଛନ୍ତି ଏବଂ ଉଦ୍ଧାର ଏବଂ ରିଲିଫ କାର୍ଯ୍ୟ ତୁରନ୍ତ ଆରମ୍ଭ କରାଯାଇଥିଲା। ଖରାପ ପାଗ ଉଦ୍ଧାର କାର୍ଯ୍ୟରେ କିଛି ଅସୁବିଧା ସୃଷ୍ଟି କରିଥିବା କୁହାଯାଉଛି। ଗତ କିଛି ଦିନ ଧରି କାଶ୍ମୀରରେ ବର୍ଷା ଏବଂ କୁଆପଥର ବର୍ଷା ହେଉଛି। ଉଦ୍ଧାର ଦଳ ପ୍ରତ୍ୟେକ କ୍ୟାବିନରେ ପହଞ୍ଚିବା ପାଇଁ ସିଡ଼ି ବ୍ୟବହାର କରୁଛନ୍ତି। ତେବେ କିଛି ଘଣ୍ଟାର ପ୍ରୟାସ ପରେ ଅଧିକାଂଶ ପର୍ଯ୍ୟଟକଙ୍କୁ ସ୍ଥାନାନ୍ତର କରାଯାଇଛି।
Comments are closed.