ଇସଲାମାବାଦ୍: ପାକିସ୍ତାନରେ ରାଜନୈତିକ ଅସ୍ଥିରତା ମଧ୍ୟରେ ଗୁରୁବାର ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ପାକିସ୍ତାନ ସଂସଦର ନିମ୍ନ ସଦନ ନ୍ୟାସନାଲ ଆସେମ୍ବଲିରେ ତାଙ୍କ ବିରୋଧରେ ବିରୋଧୀଙ୍କ ଦ୍ୱାରା ଆଗତ ଅନାସ୍ଥା ପ୍ରସ୍ତାବ ଉପରେ ବିତର୍କ ଏବଂ ଭୋଟିଂ ପୂର୍ବରୁ ଇମ୍ରା୍ନ୍ ସମ୍ବୋଧନ କରିଥିଲେ । ଏହି ଅବସରରେ ସେ ବିରୋଧୀ ଦଳ ନେତାଙ୍କ ଉପରେ ବର୍ଷିଥିଲେ । ଆଉ ସ୍ପଷ୍ଟ କରିଛନ୍ତି ଏହି ଘଡି ସନ୍ଧି ରାଜନୈତିକ ସ୍ଥିତିରେ ଇସ୍ତଫା ଦେବେ ନାହିଁ ଏବଂ ଜଣେ ଭଲ କ୍ରିକେଟରଙ୍କ ଭଳି ଶେଷ ବଲ୍ ପର୍ଯ୍ୟନ୍ତ ଲଢ଼େଇ ଜାରି ରଖିବେ।
ଇମ୍ରାନ୍ ଖାନ୍ ତାଙ୍କ ଭାଷଣରେ ପ୍ରଥମେ ପାକିସ୍ତାନର ଲୋକଙ୍କୁ କହିଥିଲେ ଯେ ସେ କାହିଁକି ରାଜନୀତିରେ ପ୍ରବେଶ କଲେ ଏବଂ ପରେ ବିରୋଧୀ ନେତାଙ୍କୁ ଟାର୍ଗେଟ୍ କରିଥିଲେ, ଯେଉଁମାନଙ୍କ ବିରୋଧରେ ଦୁର୍ନୀତି ସମେତ ଅନେକ ମାମଲା ରହିଛି ।
ଇମ୍ରାନ୍ ଖାନ୍ ତାଙ୍କ ଅଭିଭାଷଣରେ କହିଛନ୍ତି ଯେ, ତାଙ୍କ ଭଳି ଜଣେ ବ୍ୟକ୍ତି କାହିଁକି ରାଜନୀତିରେ ପ୍ରବେଶ କଲେ। ସେ କହିଛନ୍ତି ଯେ, ମୁଁ ଭାଗ୍ୟବାନ ଯେ, ମୋତେ ଆଲ୍ଲା(ଭଗବାନ)ଙ୍କ ତରଫରୁ ପ୍ରସିଦ୍ଧି ଓ ଧନ ମିଳିଛି। ମୁଁ ସେହି ପ୍ରଥମ ପିଢ଼ିରୁ ଆସିଛି, ଯିଏ ଏକ ସ୍ୱାଧୀନ ଦେଶରେ ଜନ୍ମ ନେଇଛି। ପାକିସ୍ତାନ ମୋ ଠାରୁ ପାଞ୍ଚ ବର୍ଷ ବଡ଼। ମୋ ବାପା ମା’ ପରାଧୀନତାରେ ଜନ୍ମ ହୋଇଥିଲେ। ସେ ମୋତେ ବୁଝାଇଥିଲେ ଯେ ମୁଁ ଏକ ସ୍ୱାଧୀନ ଦେଶରେ ଜନ୍ମ ନେବାର ସୌଭାଗ୍ୟ ପାଇଛି, କାରଣ ପରାଧୀନତାରେ ଏକ ନିର୍ଦ୍ଦିଷ୍ଟ ସ୍ତରରୁ ଉପରକୁ ଉଠିହୁଏ ନାହିଁ।
ଇମ୍ରାନ୍ ଖାନ୍ କହିଛନ୍ତି, ମୁଁ ରାଜନୀତିକୁ ଏଥିପାଇଁ ଆସିଥିଲି, କାରଣ ମୁଁ ଏହି ସିଦ୍ଧାନ୍ତରେ ପହଞ୍ଚିଥିଲି ଯେ, ପାକିସ୍ତାନ କେବେ ବି ସେହି ଦେଶ ହୋଇପାରିବ ନାହିଁ, ଯେଉଁ ଦେଶ ପାଇଁ ଆଲାମା ଇକବାଲ୍ ସ୍ୱପ୍ନ ଦେଖିଥିଲେ ଏବଂ ଯେଉଁ ଦେଶ ପାଇଁ ସେ ଖରାପ ସ୍ୱାସ୍ଥ୍ୟାବସ୍ଥାରେ ମଧ୍ୟ ସଂଘର୍ଷ କରିଥିଲେ। ପାକିସ୍ତାନର ମୁଖ୍ୟ ଉଦ୍ଦେଶ୍ୟ ଥିଲା ଏକ ଇସଲାମିକ୍ କଲ୍ୟାଣକାରୀ ଦେଶ ହେବା। ମୁଁ ଯେତେବେଳେ ରାଜନୀତି ଆରମ୍ଭ କରିଥିଲି ସେତେବେଳେ ମୋ ଦଳୀୟ ଇସ୍ତାହାରରେ ତିନୋଟି କଥାକୁ ସାମିଲ କରିଥିଲି। ପ୍ରଥମଟି ହେଉଛି ନ୍ୟାୟ, ଯାହାର ଅର୍ଥ ହେଉଛି ଆଇନ୍ କ୍ଷମତାଶାଳୀ ଓ ଦୁର୍ବଳଙ୍କ ପାଇଁ ସମାନ। ଦ୍ୱିତୀୟଟି ହେଉଛି ମାନବିକତା, କାରଣ ଇସଲାମୀୟ ରାଷ୍ଟ୍ରରେ ଦୟା ଥାଏ ଏବଂ ତୃତୀୟଟି ହେଉଛି ସ୍ୱାର୍ଥପରତା, କାରଣ ମୁସଲମାନ ରାଷ୍ଟ୍ର ଗୁଲାମ ହୋଇ ରହିପାରିବ ନାହିଁ।’
ସେ କହିଛନ୍ତି, ଯଦି ଆଲ୍ଲା ମୋତେ ବିଶ୍ୱାସର ସହ ଆଶୀର୍ବାଦ କରିନଥାନ୍ତେ, ତେବେ ମୁଁ ରାଜନୀତିରେ ପ୍ରବେଶ କରିନଥାନ୍ତି। ୧୪ ବର୍ଷ ଧରି ମୋତେ ପରିହାସ କରାଯାଉଥିଲା ଏବଂ ଲୋକମାନେ ମୋତେ ବାରମ୍ବାର ରାଜନୀତିରେ କାହିଁକି ପ୍ରବେଶ କଲେ ବୋଲି ପଚାରିଥିଲେ। ଏକ ଆଦର୍ଶ କାରଣରୁ ମୁଁ ରାଜନୀତିରେ ଯୋଗ ଦେଇଥିଲି। ସେ କହିଛନ୍ତି ଯେ, ରାଜନୀତିକୁ ଆସିବା ପରଠାରୁ ମୁଁ ସବୁବେଳେ କହୁଛି ଯେ, ମୁଁ କାହା ଆଗରେ ମୁଣ୍ଡ ନୁଆଁଇବି ନାହିଁ କି ମୋ ଦେଶକୁ ମୁଣ୍ଡ ନୁଆଁଇବାକୁ ଦେବି ନାହିଁ। ଏହାର ଅର୍ଥ ମୁଁ ମୋ ଦେଶକୁ କାହାର ଦାସତ୍ୱ ହେବାକୁ ଦେବି ନାହିଁ। ମୁଁ ଏହି ପଦରୁ କେବେ ବି ବିଚ୍ୟୁତ ହୋଇନାହିଁ ।
ସେ କହିଛନ୍ତି, ମୁଁ ନିଷ୍ପତ୍ତି ନେଇଥିଲି ଯେ, ଯେଉଁଦିନ ମୁଁ ପ୍ରଧାନମନ୍ତ୍ରୀ ହେବି ସେହିଦିନ ଆମର ବୈଦେଶିକ ନୀତି ସ୍ୱାଧୀନ ହେବ, ଅର୍ଥାତ୍ ଏହା ପାକିସ୍ତାନୀଙ୍କ ପାଇଁ ହେବ। ଏହାର ଅର୍ଥ ନୁହେଁ ଯେ ଆମେ ଶତ୍ରୁତା ଚାହୁଁଥିଲୁ। ମୁଁ ଯେତେବେଳେ ସରକାର ପାଇଲି ସେତେବେଳେ କହିଥିଲି ଆମର କୌଣସି ବୈଦେଶିକ ନୀତି ରହିବ ନାହିଁ ଯାହା ଆମ ସପକ୍ଷରେ ନଥିବ।’
ଉଲ୍ଲେଖଯୋଗ୍ୟ, ପାକିସ୍ତାନ ପ୍ରଧାନମନ୍ତ୍ରୀ ଦେଶବାସୀଙ୍କ ଉଦ୍ଦେଶ୍ୟରେ ଏପରି ଏକ ସମୟରେ ଉଦବୋଧନ ଦେଇଛନ୍ତି ଯେତେବେଳେ ଦେଶର ଅର୍ଥ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଛି, ତିନି ଦିନର ମୁଲତବୀ ପରେ ଗୁରୁବାର ଇମ୍ରାନଙ୍କ ବିରୋଧରେ ଅନାସ୍ଥା ପ୍ରସ୍ତାବ ଉପରେ ନ୍ୟାଶନାଲ ଆସେମ୍ବଲିରେ ଆଲୋଚନା ଆରମ୍ଭ ହେଲା, କିନ୍ତୁ ମାତ୍ର କିଛି ମିନିଟ୍ ମଧ୍ୟରେ ଗୃହକୁ ପୁଣି ଥରେ ଏପ୍ରିଲ ୩ ତାରିଖ ଯାଏ ମୁଲତବୀ ଘୋଷଣା କରାଯାଇଥିଲା। ଏହି ସମୟରେ ବିରୋଧୀ ଅନାସ୍ଥା ପ୍ରସ୍ତାବ ଉପରେ ଶୀଘ୍ର ଭୋଟିଂ କରିବାକୁ ଦାବି କରିଥିଲେ।
Comments are closed.