ଦେଶରେ ୮୫ ଲକ୍ଷ ଟପିଲା କରୋନା କେସ୍, ୨୪ ଘଣ୍ଟାରେ ୪୫ ହଜାର ପଜିଟିଭ୍

ନୂଆଦିଲ୍ଲୀ: ଗତକାଲି ଅପେକ୍ଷା ଦେଶରେ କମିଛି ସଂକ୍ରମଣ । ସୁସ୍ଥ ହୋଇଛନ୍ତି ଅଧିକ । ପୁଣି ୫୦ ହଜାରରୁ କମ୍ ଆକ୍ରାନ୍ତ ଚିହ୍ନଟ ହୋଇଛନ୍ତି । ଗତ ୨୪ ଘଣ୍ଟାରେ ସାରା ଦେଶରୁ ସଂକ୍ରମିତ ହୋଇଛନ୍ତି ୪୫ ହଜାର ୬୭୪ ଜଣ । ମୋଟ୍ ଆକ୍ରାନ୍ତଙ୍କ ସଂଖ୍ୟା ୮୫ ଲକ୍ଷ ୭ ହଜାର ୭୫୪କୁ ବୃଦ୍ଧି ପାଇଛି ।
କରୋନାରେ ଲକ୍ଷେ ୨୬ ହଜାର ମୃତ
ଗତ ୨୪ ଘଣ୍ଟାରେ ସାରା ଦେଶରୁ କରୋନା ନେଇଛି ଆଉ ୫୫୯ ଜୀବନ । କିଛି ଦିନ କମିବା ପରେ ଏବେ ଦୈନିକ ମୃତ୍ୟୁସଂଖ୍ୟାରେ ସାମାନ୍ୟ ବୃଦ୍ଧି ପାଇଛି । ପାଞ୍ଚ ଶହରୁ ଅଧିକ ଆକ୍ରାନ୍ତ ପ୍ରାଣ ହରାଉଛନ୍ତି । ମହାମାରୀରେ ମଲେଣି ମୋଟ୍ ୧ ଲକ୍ଷ ୨୬ ହଜାର ୧୨୧ ଆକ୍ରାନ୍ତ । ମୃତ୍ୟୁହାର ରହିଛି ୧.୪୮% ।

୯୨.୪୯% ଆକ୍ରାନ୍ତ ସୁସ୍ଥ
ଦେଶରେ ବଢୁଛି ସୁସ୍ଥ ହାର । ଏଣିକି ଦୈନିକ ଆକ୍ରାନ୍ତଙ୍କ ଅପେକ୍ଷା ଅଧିକ ଆରୋଗ୍ୟ ଲାଭ କରୁଛନ୍ତି । ଗତ ୨୪ ଘଣ୍ଟାରେ ହସ୍ପିଟାଲରୁ ଡାସଚାର୍ଜ ହୋଇଛନ୍ତି ୪୯ ହଜାର ୮୨ ଆକ୍ରାନ୍ତ । ଏହାକୁ ମିଶାଇ ଦେଶରେ ଆରୋଗ୍ୟ ଲାଭ କଲେଣି ୭୮ ଲକ୍ଷ ୬୮ ହଜାର ୯୬୮ ଜଣ । ସୁସ୍ଥ ହାର ରହିଛି ୯୨.୪୯% । ଦେଶରେ ୫ ଲକ୍ଷ ୧୨ ହଜାର ୬୬୫ଟି ଆକ୍ଟିଭ୍ କେସ୍ ରହିଛି ।