ନୂଆଦିଲ୍ଲୀ: ମଧ୍ୟ ଆଫ୍ରିକୀୟ ଦେଶ କଙ୍ଗୋର ପୂର୍ବ ଭାଗରେ ଗୁରୁବାର ରାତିରେ ‘ଇସଲାମିକ୍ ଷ୍ଟେଟ୍’ (IS) ସହ ଜଡ଼ିତ ଆତଙ୍କବାଦୀମାନେ ଏକ ଗାଁ ଉପରେ ଆକ୍ରମଣ କରିଛନ୍ତି। ଏହି ଘଟଣାରେ ଅତି କମ୍ ରେ ୩୩ ଜଣ ଲୋକଙ୍କ ମୃତ୍ୟୁ ହୋଇଥିବା ବେଳେ, ଆତଙ୍କବାଦୀମାନେ ଅନେକ ଘର ଜାଳି ଦେଇଛନ୍ତି ଏବଂ ଲୁଟପାଟ ମଧ୍ୟ କରିଛନ୍ତି। ଶୁକ୍ରବାର ଦିନ ଏକ ସ୍ଥାନୀୟ ନାଗରିକ ସମାଜ ସଂଗଠନ ପକ୍ଷରୁ ଏହି ସୂଚନା ଦିଆଯାଇଛି।
ଏକ ସ୍ଥାନୀୟ ନାଗରିକ ସମାଜ ଗୋଷ୍ଠୀର ମୁଖ୍ୟ ଜଷ୍ଟିନ୍ ପାଲୁକୁ କହିଛନ୍ତି ଯେ, ଉତ୍ତର କିଭୁ ପ୍ରଦେଶର କାଣ୍ଟିନ୍ ଗ୍ରାମରେ ହୋଇଥିବା ଏହି ଜଘନ୍ୟ ଆକ୍ରମଣ ପାଇଁ ‘ଆଲାଇଡ୍ ଡେମୋକ୍ରାଟିକ୍ ଫୋର୍ସେସ୍’ (ADF) ଦାୟୀ ଅଟେ।
ଜଷ୍ଟିନ୍ ପାଲୁକୁ କହିଛନ୍ତି, “ଏହି ଆତଙ୍କବାଦୀ ଆକ୍ରମଣରେ ୩୩ ଜଣ ଲୋକ ନିହତ ହୋଇଥିବା ନିଶ୍ଚିତ ହୋଇଛି। ଏହା ବ୍ୟତୀତ, ୫୦ରୁ ଅଧିକ ଘରେ ନିଆଁ ଲଗାଇ ଦିଆଯାଇଛି ଏବଂ ସମ୍ପତ୍ତିର ବ୍ୟାପକ କ୍ଷୟକ୍ଷତି ହୋଇଛି।”
ଦୀର୍ଘ ଦିନ ଧରି ଏକ ଅସ୍ଥିର ଅଞ୍ଚଳ ଭାବେ ବିବେଚିତ ହୋଇଆସୁଥିବା କଙ୍ଗୋରେ ଏବେ ମଧ୍ୟ ବିଭିନ୍ନ ଗୋଷ୍ଠୀ ମଧ୍ୟରେ ହିଂସାକାଣ୍ଡ ଜାରି ରହିଛି। ଦେଶରେ ପ୍ରାୟ ୧୦୦ଟି ବିଦ୍ରୋହୀ ଗୋଷ୍ଠୀ ସକ୍ରିୟ ଥିବାବେଳେ, ସେଗୁଡ଼ିକ ମଧ୍ୟରେ ରୁୱାଣ୍ଡା ସମର୍ଥିତ ‘ଏମ୍୨୩’ (M23) ସବୁଠାରୁ ଗୁରୁତ୍ୱପୂର୍ଣ୍ଣ ଅଟେ। ଏହି ଗୋଷ୍ଠୀ ଦେଶର ପୂର୍ବ ଭାଗରେ ଥିବା ଅନେକ ଗୁରୁତ୍ୱପୂର୍ଣ୍ଣ ସହରକୁ ନିଜ ନିୟନ୍ତ୍ରଣକୁ ନେଇଯାଇଛି।
ଏହି ଆକ୍ରମଣ ସମ୍ପର୍କରେ ପାଲୁକୁ କହିଛନ୍ତି,ଏହା ପ୍ରଶାସନ ପକ୍ଷରୁ ଏକ ବଡ଼ ସୁରକ୍ଷା ବିଫଳତାକୁ ଦର୍ଶାଉଛି।
ହିଂସାକାଣ୍ଡ ଯୋଗୁଁ ଗ୍ରାମାଞ୍ଚଳର ଲୋକମାନେ ଦୀର୍ଘ ଦିନ ଧରି ଆତଙ୍କିତ ଅବସ୍ଥାରେ ରହିଆସୁଛନ୍ତି। ଏହି ଆକ୍ରମଣ ପରେ, ଲୋକମାନେ ବାଧ୍ୟ ହୋଇ ପ୍ରଦେଶର ଅନ୍ୟ ଅଞ୍ଚଳକୁ ପଳାୟନ କରିଛନ୍ତି—ଯେଉଁ ଅଞ୍ଚଳଗୁଡ଼ିକ ବର୍ତ୍ତମାନ ଦ୍ରୁତ ଗତିରେ ବ୍ୟାପୁଥିବା ଇବୋଲା ଭୂତାଣୁର ପ୍ରକୋପ ସହ ସଂଘର୍ଷ କରୁଛନ୍ତି।
ଆଫ୍ରିକୀୟ ଦେଶ ୟୁଗାଣ୍ଡାରେ ଉତ୍ପନ୍ନ ହୋଇଥିବା ‘ଏଡିଏଫ୍’ (ADF) ୨୦୧୯ ମସିହାରେ ‘ଇସଲାମିକ୍ ଷ୍ଟେଟ୍’ ସହିତ ଯୋଡ଼ି ହୋଇଛି । ଏହି ସଂଗଠନ ଦୀର୍ଘ ଦିନ ଧରି ସୀମାନ୍ତ ଅଞ୍ଚଳରେ ସକ୍ରିୟ ରହିଆସିଛି ଏବଂ କ୍ରମାଗତ ଭାବେ ସାଧାରଣ ନାଗରିକମାନଙ୍କୁ ଟାର୍ଗେଟ୍ କରିଆସୁଛି। ଗତ ବର୍ଷ ଜୁଲାଇ ମାସରେ, ଏହି ଗୋଷ୍ଠୀ କଙ୍ଗୋର ପୂର୍ବ ଭାଗରେ ୬୬ ଜଣ ଲୋକଙ୍କୁ ଅତି ନିର୍ଦ୍ଦୟ ଭାବେ ହତ୍ୟା ମଧ୍ୟ କରିଥିଲା।