ଲେବାନନ ଉପରେ ଇସ୍ରାଏଲର ସବୁଠୁ ବଡ଼ ଆକ୍ରମଣ; ଜଣେ ବ୍ରିଗେଡିୟର ଜେନେରାଲଙ୍କ ସମେତ ୧୨ ନିହତ, ହିଜବୁଲ୍ଲାହର ୧୫୦ଟି…
ନୂଆଦିଲ୍ଲୀ: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ, ଅନ୍ତର୍ଜାତୀୟ ଚାପ ଏବଂ ମଧ୍ୟସ୍ଥତା ପ୍ରୟାସକୁ ଅଣଦେଖା କରି ଦକ୍ଷିଣ ଲେବାନନରେ ହିଜବୁଲ୍ଲହା ବିରୁଦ୍ଧରେ ଏପର୍ଯ୍ୟନ୍ତ ସବୁଠାରୁ ବଡ଼ ସାମରିକ ଅଭିଯାନ ଆରମ୍ଭ କରିଛନ୍ତି ।
ରିପୋର୍ଟ ଅନୁଯାୟୀ, ଇସ୍ରାଏଲ ପ୍ରତିରକ୍ଷା ବାହିନୀ (IDF) ପ୍ରାୟ ୧୫୦ଟି ହିଜବୁଲ୍ଲହା-ସହ ଜଡିତ ଠକଣାରେ ବିଶାଳ ବିମାନ ଆକ୍ରମଣ କରିଛି । ଏହି ଆକ୍ରମଣଗୁଡ଼ିକ ପୁଣି ଥରେ ଶାନ୍ତି ଆଲୋଚନାର ଆଶାକୁ ଏକ କଠୋର ଆଘାତ ଦେଇଛି ।
ଏହି ସାମରିକ ଅଭିଯାନରେ ସବୁଠାରୁ ଆଶ୍ଚର୍ଯ୍ୟଜନକ ଖବର ହେଉଛି ଲେବାନନର ନିୟମିତ ସେନା ଦ୍ୱାରା ହୋଇଥିବା କ୍ଷତି । ଲେବାନନ ସେନାର ଏକ ସରକାରୀ ବିବୃତ୍ତି ଅନୁଯାୟୀ, ଏକ ଇସ୍ରାଏଲୀ କ୍ଷେପଣାସ୍ତ୍ର ଖାରଦାଲି-ନାବାତିହ ରାସ୍ତାରେ ଏକ ସାମରିକ ଯାନକୁ ଟାର୍ଗେଟ କରିଥିଲା । ଆକ୍ରମଣରେ ଲେବାନନ ସେନାର ବ୍ରିଗେଡିୟର ଜେନେରାଲ ୱାସାମ ସାବ୍ରା ଏବଂ କ୍ୟାପ୍ଟେନ ଏଲି ଖୌରି ଘଟଣାସ୍ଥଳରେ ପ୍ରାଣ ହରାଇଛନ୍ତି ।
ଆଉ ଜଣେ ଯବାନ, ହୁସେନ ଗୋଜଲ ମଧ୍ୟ ପ୍ରାଣ ହରାଛନ୍ତି । ଇସ୍ରାଏଲୀ ସେନା ଏହି ଘଟଣା ଉପରେ ସ୍ପଷ୍ଟୀକରଣ ଦେଇ କହିଛି ଯେ ଆକ୍ରମଣ ଏକ ଯୁଦ୍ଧ କ୍ଷେତ୍ରରେ ଘଟିଥିଲା ଯେଉଁଠାରେ ପରିସ୍ଥିତି ପୂର୍ବରୁ ଉତ୍ତେଜନାପୂର୍ଣ୍ଣ ରହିଥିଲା ।
ଲେବାନନର ଶୀର୍ଷ ନେତୃତ୍ୱ ଏହି ଆକ୍ରମଣ ଉପରେ ଦୃଢ଼ ଆଭିମୁଖ୍ୟ ଗ୍ରହଣ କରିଛନ୍ତି । ଲେବାନନ ରାଷ୍ଟ୍ରପତି ଜୋସେଫ ଔନ୍ ଏହାକୁ ଲେବାନନ ସାର୍ବଭୌମତ୍ୱର ଏକ ସ୍ପଷ୍ଟ ଉଲ୍ଲଂଘନ ବୋଲି କହିଛନ୍ତି । ସେ ଇସ୍ରାଏଲର “କ୍ରୁର ଆକ୍ରମଣ”କୁ ବନ୍ଦ କରିବା ପାଇଁ ହସ୍ତକ୍ଷେପ କରିବାକୁ ଅନ୍ତର୍ଜାତୀୟ ସମ୍ପ୍ରଦାୟକୁ ନିବେଦନ କରିଛନ୍ତି, ଯାହା ଅନ୍ତର୍ଜାତୀୟ ଆଇନ ଏବଂ ମାନଦଣ୍ଡକୁ ଉଲ୍ଲଂଘନ କରେ ।
ଲେବାନନ ପ୍ରଧାନମନ୍ତ୍ରୀ ନବାଫ ସଲାମ ମଧ୍ୟ ଏହି ଆକ୍ରମଣକୁ ନିନ୍ଦା କରିଛନ୍ତି ଏବଂ ସହିଦ ଅଧିକାରୀମାନଙ୍କ ପରିବାର ପ୍ରତି ଗଭୀର ସମବେଦନା ପ୍ରକାଶ କରିଛନ୍ତି । ଲେବାନନ ସେନା ଅଭିଯୋଗ କରିଛି ଯେ ଶାନ୍ତିର ଯେକୌଣସି ସମ୍ଭାବନାକୁ ବିଫଳ କରିବା ପାଇଁ ଇସ୍ରାଏଲ ଜାଣିଶୁଣି ଏପରି ଆକ୍ରମଣ କରୁଛି ।