ମୋକି (ଚୀନ୍): ଚୀନ୍ର ମୋକିଠାରେ ଆୟୋଜିତ ଏଏଚ୍ଏଫ୍ ଜୁନିୟର ଏସିଆ କପ୍ ୨୦୨୬ରେ ଭାରତୀୟ ଜୁନିୟର ପୁରୁଷ ହକି ଦଳ ନିଜର ଦମଦାର ପ୍ରଦର୍ଶନ ବଜାୟ ରଖିଛି । ମଙ୍ଗଳବାର ଅନୁଷ୍ଠିତ ଏକ କଡ଼ା ମୁକାବିଲାରେ ଭାରତୀୟ ଟିମ୍ ଦକ୍ଷିଣ କୋରିଆକୁ ୭-୩ ଗୋଲ୍ରେ ପରାସ୍ତ କରି ପୁଲ୍-ଏ’ର ଶୀର୍ଷ ସ୍ଥାନ ମଜବୁତ କରିବା ସହ ସେମିଫାଇନାଲ୍ ସ୍ଥାନ ପକ୍କା କରିବା ନିକଟତର ହୋଇଛି । ମ୍ୟାଚ୍ର ପ୍ରଥମ ତିନୋଟି କ୍ୱାଟର ପର୍ୟ୍ୟନ୍ତ ଦୁଇ ଦଳ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଥିଲା । ଦକ୍ଷିଣ କୋରିଆ ପ୍ରତ୍ୟେକ ଗୋଲ୍ର ବରାବର ଜବାବ ଦେଇ ୩-୩ ସ୍ଥିତିକୁ ଆସିଯାଇଥିଲା । କିନ୍ତୁ ଶେଷ କ୍ୱାଟରରେ ଭାରତୀୟ ଖେଳାଳିମାନେ ଆକ୍ରମଣାତ୍ମକ ରୂପ ଆପଣାଇ ମାତ୍ର ୩ ମିନିଟ୍ ମଧ୍ୟରେ ୩ଟି ଗୋଲ୍ ଦେଇ କୋରିଆର ପ୍ରତ୍ୟାବର୍ତ୍ତନ ଆଶାକୁ ସମ୍ପୂର୍ଣ୍ଣ ଭାଙ୍ଗି ଦେଇଥିଲେ । ଭାରତୀୟ ଅଧିନାୟକ ତଥା ଷ୍ଟାର୍ ଡ୍ରାଗ୍ଫ୍ଲିକର ଅନମୋଲ୍ ଏକ୍କା ଦୁଇଟି ଗୋଲ୍ ସ୍କୋର କରି ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଛନ୍ତି । ମ୍ୟାଚ୍ର ୫ମ ମିନିଟ୍ରେ ଅନମୋଲ୍ ଏକ୍କା ପେନାଲ୍ଟି କୋର୍ନରରୁ ଗୋଲ୍ ଦେଇ ଭାରତକୁ ୧-୦ରେ ଆଗୁଆ କରିଥିଲେ । କିନ୍ତୁ ୬ଷ୍ଠ ମିନିଟ୍ରେ କୋରିଆର ଡୋହୟୋନ୍ ଚୋଇ ପେନାଲ୍ଟି କୋର୍ନରରୁ ଗୋଲ୍ ଦେଇ ସ୍କୋର ୧-୧ କରିଥିଲେ ।
୧୮ଶ ମିନିଟ୍ରେ ଲଭନୁର ସିଂହ ଫିଲ୍ଡ ଗୋଲ୍ ଦେଇ ଭାରତକୁ ୨-୧ରେ ଆଗେଇ ନେଇଥିଲେ । କୋରିଆର ହ୍ୟୋଗୁକ୍ ୟୁ ଗୋଲ୍ ଦେଇ ୨-୨ ସ୍ଥିତିକୁ ଆଣିଥିଲେ । ତେବେ ୨୦ତମ ମିନିଟ୍ରେ ଅଜିତ ଯାଦବ ଗୋଲ୍ ଦେଇ ହାଫ୍-ଟାଇମ୍ ସୁଦ୍ଧା ଭାରତକୁ ୩-୨ରେ ଆଗୁଆ ରଖିଥିଲେ । ୩୬ତମ ମିନିଟ୍ରେ ହ୍ୟୋଗୁକ୍ ୟୁ ନିଜର ଦ୍ୱିତୀୟ ଗୋଲ୍ ଦେଇ ସ୍କୋର ୩-୩ କରିଥିଲେ । ୪୨ତମ ମିନିଟ୍ରେ ପ୍ରଭଦୀପ ସିଂହ ଗୋଲ୍ ଦେଇ ଭାରତକୁ ୪-୩ରେ ଆଗୁଆ କରିଥିଲେ । ଶେଷ ୧୫ ମିନିଟ୍ରେ ଭାରତୀୟ ଦଳ କୋରିଆ ଉପରେ ସମ୍ପୂର୍ଣ୍ଣ ଚାପ ପକାଇଥିଲା । ୫୫ତମ ମିନିଟ୍ରେ ଗୁରସେବକ ସିଂହ, ୫୬ତମ ମିନିଟ୍ରେ ଅନମୋଲ୍ ଏକ୍କା (ପେନାଲ୍ଟି କୋର୍ନର) ଏବଂ ୫୮ତମ ମିନିଟ୍ରେ ଆର୍ୟ୍ୟନ୍ ଏକ୍ସେସ୍ ଗୋଲ୍ ଦେଇ ଭାରତକୁ ୭-୩ରେ ବିଜୟୀ କରାଇଥିଲେ । ଏହି ବିଜୟ ସହ ଭାରତ ୩ଟି ମ୍ୟାଚ୍ରୁ ୨ଟି ବିଜୟ ଓ ୧ଟି ଡ୍ର’ ସହ ମୋଟ ୭ ପଏଣ୍ଟ ପାଇ ପୁଲ୍-ଏ’ର ଶୀର୍ଷରେ ରହିଛି । ଦଳ ବୁଧବାର ଦିନ ନିଜର ଶେଷ ପୁଲ୍ ମ୍ୟାଚ୍ରେ ଚାଇନିଜ୍ ତାଇପେଇକୁ ଭେଟିବ । ଏହି ମ୍ୟାଚ୍ ଜିତିଲେ ଭାରତ ଆନୁଷ୍ଠାନିକ ଭାବେ ସେମିଫାଇନାଲ୍ରେ ନିଜ ସ୍ଥାନ ପକ୍କା କରିବ ।
