ମୁମ୍ବାଇ: ରାଜନୀତିରେ ଏଣ୍ଟ୍ରି ମାରିବେ ବଲିଉଡ ଅଭିନେତ୍ରୀ କଙ୍ଗନା ରନୌତ ! ବଲିଉଡ ଫାୟାର ଆକ୍ଟ୍ରିସ କଙ୍ଗନା ସବୁବେଳେ ଚର୍ଚ୍ଚାରେ । କେତେବେଳେ ନିଜ ସ୍ପଷ୍ଟ ବୟାନକୁ ନେଇ ତ କେତଳେବେଳେ ନିଜ ଅଭିନୟକୁ ନେଇ । ଯେ କୌଣସି ପ୍ରସଙ୍ଗ ହେଉ ଖୋଲାଖୋଲି ଭାବେ ନିଜର ସ୍ପଷ୍ଟ ମତ ରଖି ଚର୍ଚ୍ଚାରେ ରହି ଆସିଛନ୍ତି କଙ୍ଗନା । ଏବେ କଙ୍ଗନା ରାଜନୀତି କରିବେ । ଏକଥା ଆମେ କହୁନୁ । କଙ୍ଗନା ଦେଇଥିବା ଏକ ବୟାନରୁ ଏମିତି କିଛି ଅନୁମାନ କରାଯାଉଛି ।
କଙ୍ଗନା ରାଜନୀତିକୁ ଆସିପାରନ୍ତି । ଏମିତି ଅନୁମାନ ବହୁ ପୂର୍ବରୁ କରାଯାଉଥିଲା । ତେବେ ଏ ପ୍ରସଙ୍ଗରେ ପ୍ରଶ୍ନ କରାଗଲେ ସ୍ପଷ୍ଟ ଭାବେ ଏହାକୁ ଏଡାଇ ଦିଅନ୍ତି ଅଭିନେତ୍ରୀ କଙ୍ଗନା । ହେଲେ ଏଥର ଏହି ପ୍ରଶ୍ନକୁ ଏଡାଇ ନାହାନ୍ତି ବା ଲଢିବେ ନାହିଁ ବୋଲି ବି କହି ନାହାନ୍ତି । ତାଙ୍କ ବୟାନ ହିଁ କହୁଛି, ଆଗକୁ ରାଜନୀତି କରିପାରନ୍ତି କଙ୍ଗନା ।
କଙ୍ଗନା ମୁଭି ତେଜସର ରିଲିଜ ପରେ ଗୁଜରାଟର ପ୍ରସିଦ୍ଧ ଦ୍ୱାରିକାର ଜଗତ ମନ୍ଦିର ଯାଇଥିଲେ । ସେଠାରେ ଦ୍ୱାରିକାଧିଶଙ୍କ ମନ୍ଦିରରେ ମୁଣ୍ଡିଆ ମାରିଥିଲେ ।ଏହାପରେ ନାଗେଶ୍ୱର ମହାଦେବ ମନ୍ଦିର ବି ଯାଇ ଦର୍ଶନ କରିଥିଲେ । ଏହାପରେ ମିଡିଆକୁ ସାକ୍ଷାତ ଦେଇଥିଲେ ଅଭିନେତ୍ରୀ କଙ୍ଗନା ।
ମିଡିଆ ସହ ଆଲୋଚନାବେଳେ ଲୋକସଭା ନିର୍ବାଚନ ଲଢିବା ନେଇ ଏମିତି କିଛି ସଙ୍କେତ ଦେଇଥିଲେ । ଯଦି ଭଗବାନ ଶ୍ରୀକୃଷ୍ଣଙ୍କ କୃପା ହେବ ତେବେ ସେ ଲୋକସଭା ନିର୍ବାଚନ ଲଢିବେ ବୋଲି ମିଡିଆକୁ କହିଛନ୍ତି ।
କଙ୍ଗନା ଦ୍ୱାରକାଧୀଶ ମନ୍ଦିର ଦର୍ଶନ କରିବାର ଫଟୋ ଇନଷ୍ଟାରେ ସେୟାର କରିଥିଲେ । ଶାଢି ପିନ୍ଧି ମନ୍ଦିରକୁ ଆସିଥିଲେ ଗଙ୍ଗନା । ଭଗବାନଙ୍କ ଦର୍ଶନ ପରେ ସେ କହିଛନ୍ତି, ଯେମିତି ଅନେକ ଦିନରୁ ସେ ବ୍ୟସ୍ତ ବିବ୍ରତ ହୋଇଥିଲେ । ହେଲେ ଠାକୁରଙ୍କ ଦର୍ଶନ ପରେ ମନକୁ ଶାନ୍ତି ମିଳିଲା ବୋଲି କହିଛନ୍ତି କଙ୍ଗନା ।
କଙ୍ଗନା ଇନଷ୍ଟାରେ ଲେଖିଛନ୍ତି, ‘କିଛି ଦିନ ଧରି ହୃଦୟ ବହୁତ ବ୍ୟାକୁଳ ଲାଗୁଥିଲା । ମନ କହୁଥିଲା, ଦ୍ୱାରିକାଧୀଶଙ୍କ ଦର୍ଶନ କରିବା ପାଇଁ ।ଶ୍ରୀକୃଷ୍ଣଙ୍କର ଏହି ଦିବ୍ୟନଗରୀ ଦ୍ୱାରକାକୁ ଆସିଲେ, ଏହାର ପ୍ରତିଧୂଳିକୁ ସ୍ପର୍ଶ କଲେ ମୋର ସବୁ ଚିନ୍ତା ଦୂରେଇ ଯାଏ । ମୋର ମନ ସ୍ଥିର ହୋଇଯାଏ । ଅନନ୍ତ ଆନନ୍ଦର ଅନୁଭୂତି ମିଳିଥାଏ । ହେ ଦ୍ୱାରକାଧୀଶ, ଏମିତି କୃପା ସବୁବେଳେ ରଖିଥିବ ।’
Comments are closed.