ଭୁବନେଶ୍ୱର: ଦୁଇ ସପ୍ତାହ ହେଲାଣି କିଡନୀ ରୋଗୀ ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ଘର ଆଗରେ ଧାରଣାରେ ବସିଛନ୍ତି । ଶୀତ, କାକରକୁ ଖାତିର୍ ନ କରି କିଡନୀ ରୋଗୀ ଓ ସମ୍ପର୍କୀୟ ଧାରଣା ଦେଉଥିବା ବେଳେ ଆଜି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କିଡନୀ ଟ୍ରାନ୍ସପ୍ଲାଣ୍ଟ ହୋଇଥିବା ରୋଗୀମାନଙ୍କ ନିମନ୍ତେ ନିରାମୟ ଯୋଜନା ମାଧ୍ୟମରେ ଯୋଗାଯାଉଥିବା ଔଷଧ ଯୋଗାଣ ସ୍ଥିତିର ସମୀକ୍ଷା କରିଛନ୍ତି ।
ବୈଠକରେ ସମସ୍ତ ବୈଷୟିକ, ପ୍ରଶାସନିକ ଏବଂ ଚିକିତ୍ସାଗତ ଦିଗର ସବିଶେଷ ଆଲୋଚନା ହୋଇଛି । କିଡନୀ ଟ୍ରାନ୍ସପ୍ଲାଣ୍ଟ ହୋଇଥିବା ରୋଗୀମାନେ ଔଷଧର ଗୁଣାତ୍ମକ ମାନ ବିଷୟରେ ଉଠାଇଥିବା ଅଭିଯୋଗ ବିଷୟ ମଧ୍ୟ ବୈଠକରେ ଆଲୋଚନା ହୋଇଛି । ଆଲୋଚନା ଅନୁସାରେ, କିଡନୀ ଟ୍ରାନ୍ସପ୍ଲାଣ୍ଟ ଅପରେସନ୍ ଏବଂ ଅପରେସନ୍ ପରବର୍ତ୍ତୀ ଚିକିତ୍ସା ପାଇଁ ଆବଶ୍ୟକୀୟ ସମସ୍ତ ଔଷଧ ସରକାରୀ ମେଡିକାଲ କଲେଜ ଓ ଡାକ୍ତରଖାନାର ନିରାମୟ କାଉଣ୍ଟର ମାଧ୍ୟମରେ ମାଗଣାରେ ଦିଆଯାଉଛି ।
ଏହିସବୁ ଔଷଧର ଗୁଣାତ୍ମକ ମାନ ଏନ୍.ଏ.ବି.ଏଲ୍ ସ୍ୱୀକୃତ ପରୀକ୍ଷାଗାରମାନଙ୍କ ଦ୍ୱାରା ପରୀକ୍ଷା କରାଯାଇ ପ୍ରାମାଣିତ ହୋଇଥାଏ । ଔଷଧ କିଣାଯିବା ପୂର୍ବରୁ ନିର୍ଭରଯୋଗ୍ୟ ବୈଜ୍ଞାନିକ ପଦ୍ଧତିରେ ଏହାର ଗୁଣାତ୍ମକ ମାନ ଯାଞ୍ଚ କରାଯାଏ । ସବୁଠାରୁ ଅଧିକ ଫଳଦାୟୀ ଓ ପାଶ୍ୱ ପ୍ରତିକ୍ରିୟା ନଥିବା ଔଷଧକୁ
ସ୍ୱଚ୍ଛ ଅନ୍ଲାଇନ୍ ପ୍ରକ୍ରିୟାରେ ରାଜ୍ୟ ଔଷଧ ନିଗମ କିଣି ଆବଶ୍ୟକ ପରିମାଣରେ ମେଡିକାଲ କଲେଜ ଓ ହସ୍ପିଟାଲମାନଙ୍କୁ ଯୋଗାଇ ଦେଇଥାଆନ୍ତି ।
ବର୍ତ୍ତମାନ ଶ୍ରୀରାମଚନ୍ଦ୍ର ଭଞ୍ଜ ମେଡ଼ିକାଲ କଲେଜ୍ ଓ ହସ୍ପିପଟାଲ୍ ମାଧ୍ୟମରେ ୧୨୦ ଜଣ କିଡନୀ ଟ୍ରାନ୍ସପ୍ଲାଣ୍ଟ ହୋଇଥିବା ରୋଗୀଙ୍କର ଅପରେସନ୍ ପରବର୍ତ୍ତୀ ଚିକିତ୍ସା ଚାଲୁ ରହିଛି । ସେମାନଙ୍କ ମଧ୍ୟରୁ ୭୫ ଶତକଡ଼ା ରୋଗୀ ନିରାମୟ ମାଧ୍ୟମରେ ଦିଆଯାଉଥିବା ଔଷଧ ଖାଉଛନ୍ତି । ଏହି ୯୦ ଜଣ ରୋଗୀ କେବେ
ଔଷଧର ପାଶ୍ୱ ପ୍ରତିକ୍ରିୟା ବିଷୟରେ କୌଣସି ଅଭିଯୋଗ କରିନାହାନ୍ତି । ସେମାନଙ୍କର ସ୍ୱାସ୍ଥ୍ୟ ଅବସ୍ଥାରେ ମଧ୍ୟ ଉନ୍ନତି ହେଉଛି । ନିରାମୟ ମାଧ୍ୟମରେ ଯୋଗାଯାଉଥିବା ଔଷଧର ଗୁଣାତ୍ମକ ମାନ ବିଷୟରେ କୌଣସି ବୈଷୟିକ କମିଟି ସନ୍ଦେହ ପ୍ରକଟ କରିନାହାନ୍ତି ।
ବୈଠକରେ ଉପସ୍ଥିତ ବରିଷ୍ଠ ବିଶେଷଜ୍ଞ ଡାକ୍ତରମାନଙ୍କ ଅନୁସାରେ, ଉକ୍ତ ଔଷଧକୁ ମଧ୍ୟ ନେଫ୍ରୋଲୋଜି, ରେମାଟୋଲୋଜି ଏବଂ ଡେର୍ମାଟୋଲୋଜି ଆଦି ବିଭାଗରେ ରୋଗୀମାନଙ୍କୁ ଦିଆଯାଉଛି । ବର୍ତ୍ତମାନ ପର୍ଯ୍ୟନ୍ତ କୌଣସି ରୋଗୀଙ୍କଠାରେ କିଛି ପାଶ୍ୱ ପ୍ରତିକ୍ରିୟା ହୋଇ ନାହିଁ । ଔଷଧର ଗୁଣାତ୍ମକ ମାନ ବିଷୟରେ ଅଭିଯୋଗ କରୁଥିବା ରୋଗୀ ଓ ପରିବାରସ୍ୱଜନଙ୍କ ସହ ଏକାଧିକଥର ଆଲୋଚନା କରାଯାଇଛି । ବରିଷ୍ଠ ଡାକ୍ତର ଏବଂ ସ୍ୱାସ୍ଥ୍ୟ ବିଭାଗ ଅଧିକାରୀମାନେ ମଧ୍ୟ ସେମାନଙ୍କୁ ନିରାମୟ ଔଷଧର ଗୁଣାତ୍ମକ ମାନ ବିଷୟରେ ଭରସା ଦେଇଛନ୍ତି । ଏସବୁ ସତ୍ତ୍ୱେ କିଡନୀ ରୋଗୀ ଅଯଥାରେ ଭିତ୍ତିହୀନ ଅଭିଯୋଗମାନ କରୁଛନ୍ତି । ଏହା ପଛରେ କିଛି ମୁନାଫାଖୋର ଘରୋଇ ଔଷଧ ବ୍ରାଣ୍ଡ ବିତରକଙ୍କ ଗୁପ୍ତହାତ ରହିଥିବାର ସଙ୍କେତ ମିଳିଥିଲା ।
ଏହି ଉଚ୍ଚସ୍ତରୀୟ କମିଟି ସ୍ପଷ୍ଟ କରିଛି, ରୋଗୀଙ୍କର ବ୍ୟକ୍ତିଗତ ପସନ୍ଦ ଅନୁସାରେ ବିଭିନ୍ନ ବ୍ରାଣ୍ଡର ଔଷଧ ରାଜ୍ୟସାରା ଘରୋଇ ଦୋକାନରୁ କିଣି ଯୋଗାଇବା ବାସ୍ତବରେ ସମ୍ଭବ ନୁହେଁ । ଫାର୍ମାକୋ ଭିଜିଲାନ୍ସ କମିଟିର ସଦସ୍ୟ, ବରିଷ୍ଠ ଭେଷଜ ପ୍ରଫେସର, ସ୍ପେଶାଲିଷ୍ଟଙ୍କ ସମେତ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବରିଷ୍ଠ ଅଧିକାରୀମାନେ ବୈଠକର ଆଲୋଚନାରେ ଅଂଶଗ୍ରହଣ କରିଥିଲେ ।
ଲୋକସେବା ଭବନ ସଭାଗୃହରେ ଅନୁଷ୍ଠିତ ଏହି ଉଚ୍ଚସ୍ତରୀୟ ସମୀକ୍ଷା ବୈଠକରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ଶାସନ ସଚିବ ଶ୍ରୀମତୀ ଶାଳିନୀ ପଣ୍ଡିତ ରୋଗୀଙ୍କ ପାଇଁ କିଣାଯାଉଥିବା ଔଷଧର ଗୁଣାତ୍ମକ ମାନ, କ୍ରୟ ଓ ଯୋଗାଣ ସମ୍ବନ୍ଧିତ ବିଷୟ ଆଲୋଚନା ନିମନ୍ତେ ଉପସ୍ଥାପନ କରିଥିଲେ ।
Comments are closed.