ତିରୁଅନନ୍ତପୁରମ୍: ୱେଷ୍ଟଇଣ୍ଡିଜ୍ ବିପକ୍ଷ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ପାଇଁ ଭାରତୀୟ ଦଳର ତାରକା ବ୍ୟାଟର ବିରାଟ କୋହଲି ତିରୁଅନନ୍ତପୁରମ୍ରେ ପହଞ୍ଚିଛନ୍ତି । ନିଜ ପରିବାର ସହ ଲଣ୍ଡନ୍ରେ ରହୁଥିବା ବିରାଟ ଏୟାରପୋର୍ଟରେ ପହଞ୍ଚିବା ପରେ ତାଙ୍କୁ ଦେଖିବା ପାଇଁ ହଜାର ହଜାର ପ୍ରଶଂସକଙ୍କ ଭିଡ଼ ଜମିଥିଲା । ପରେ ସୁରକ୍ଷା ବଳୟ ମଧ୍ୟରେ ତାଙ୍କୁ ଟିମ୍ ହୋଟେଲକୁ ନିଆଯାଇଥିଲା, ଯେଉଁଠାରେ ହୋଟେଲ କର୍ମଚାରୀମାନେ ତାଙ୍କୁ ପାରମ୍ପରିକ ଭାବେ ସ୍ୱାଗତ କରିଥିଲେ । ସେପ୍ଟେମ୍ବର ୨୭ରୁ ତିରୁଅନନ୍ତପୁରମ୍ର ଗ୍ରୀନ୍ଫିଲ୍ଡ ଇଣ୍ଟରନ୍ୟାସନାଲ୍ ଷ୍ଟାଡିୟମ୍ରେ ଭାରତ ଓ ୱେଷ୍ଟଇଣ୍ଡିଜ୍ ମଧ୍ୟରେ ପ୍ରଥମ ମ୍ୟାଚ୍ ଖେଳାଯିବ । ବିରାଟ କୋହଲି ଏବଂ ରୋହିତ ଶର୍ମାଙ୍କ ଦିନିକିଆ ଟିମ୍କୁ ପ୍ରତ୍ୟାବର୍ତ୍ତନ ଯୋଗୁଁ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି ।
ଟିକେଟ୍ ବିକ୍ରି ଆରମ୍ଭ ହେବାର ମାତ୍ର ୨୪ ଘଣ୍ଟା ମଧ୍ୟରେ ୩୫,୦୦୦ରୁ ଅଧିକ ଟିକେଟ୍ ବିକ୍ରି ହୋଇସାରିଛି । ପ୍ରଥମ ମ୍ୟାଚ (ସେପ୍ଟେମ୍ବର ୨୭) ପରେ ଦ୍ୱିତୀୟ ମ୍ୟାଚ୍ ଗୁଆହାଟୀରେ (ସେପ୍ଟେମ୍ବର ୩୦) ଏବଂ ତୃତୀୟ ମ୍ୟାଚ୍ ମୁଲ୍ଲାନ୍ପୁର/ଚଣ୍ଡୀଗଡ଼ରେ (ଅକ୍ଟୋବର ୩) ଖେଳାଯିବ । ଏହାପରେ ୫ଟି ଟି୨୦ ମ୍ୟାଚ୍ ଖେଳାଯିବ । ଶୁଭମନ ଗିଲ୍ଙ୍କ ଅଧିନାୟକତ୍ୱରେ ଭାରତୀୟ ଦଳ ୨୦୨୭ ବିଶ୍ୱକପ୍କୁ ଦୃଷ୍ଟିରେ ରଖି ଏହି ସିରିଜ୍ ଖେଳୁଛି । ୱେଷ୍ଟଇଣ୍ଡିଜ୍ ଅଲରାଉଣ୍ଡର ଜେସନ୍ ହୋଲ୍ଡର ବିରାଟ କୋହଲିଙ୍କୁ କ୍ରିକେଟ୍ ଇତିହାସର ସର୍ବଶ୍ରେଷ୍ଠ ଦିନିକିଆ ବ୍ୟାଟର ଭାବେ ବର୍ଣ୍ଣନା କରିଛନ୍ତି । ମୁଖ୍ୟ କୋଚ୍ ଗୌତମ ଗମ୍ଭୀର କହିଛନ୍ତି ଯେ, ଶୁଭମନଙ୍କ ପରି ଯୁବ ଅଧିନାୟକଙ୍କ ପାଇଁ ରୋହିତ ଓ ବିରାଟଙ୍କ ପରି ଅଭିଜ୍ଞ ଖେଳାଳିଙ୍କ ଉପସ୍ଥିତି ବହୁତ ବଡ଼ ସହାୟକ ହେବ ।
