ନୂଆଦିଲ୍ଲୀ:ତୁର୍କୀ(Turkey)ରେ ବଡ଼ ଧରଣର ବିମାନ ଦୁର୍ଘଟଣା । ଏହି ବିମାନ ଦୁର୍ଘଟଣାରେ ଲିବିଆ ସେନାମୁଖ୍ୟ ମହମ୍ମଦ ଅଲ୍ଲି ଅହମଦ ଅଲ-ହଦାଦଙ୍କ(Muhammad Ali Ahmad al-Haddad) ସମେତ ଆଠ ଜଣଙ୍କ ମୃତ୍ୟୁ ହୋଇଛି । ଲିବିଆ ପ୍ରଧାନମନ୍ତ୍ରୀ ଅବଦୁଲ-ହାମିଦ ଦବିବେ (Libyan Prime Minister Abdul-Hamid Dbeibah)ତୁର୍କୀରେ ଘଟିଥିବା ବିମାନ ଦୁର୍ଘଟଣା ବିଷୟରେ ସୂଚନା ପ୍ରଦାନ କରିଛନ୍ତି। ଘରୋଇ ଜେଟ୍ ରେ ଲିବିଆ ସେନାମୁଖ୍ୟ, ଚାରି ଅନ୍ୟ ଅଧିକାରୀ ଏବଂ ତିନି ଜଣ କ୍ରୁ ସଦସ୍ୟ ଥିଲେ। ଦୁର୍ଘଟଣାରେ ବିମାନରେ ଥିବା ସମସ୍ତ ଯାତ୍ରୀଙ୍କ ମୃତ୍ୟୁ ହୋଇଛି।
ସୂଚନାଥାଉକି, ମଙ୍ଗଳବାର ସନ୍ଧ୍ୟାରେ ଲିବିଆ ପ୍ରତିନିଧି ଦଳ ତୁର୍କୀର ରାଜଧାନୀ ଅଙ୍କାରାରୁ ସରକାରୀ ଗସ୍ତ ସାରି ସେମାନଙ୍କ ଦେଶକୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଥିଲା। ପ୍ରଧାନମନ୍ତ୍ରୀ ଦବିବେ ଏହି ଘଟଣାକୁ ଦୁର୍ଘଟଣାଜନିତ ଏବଂ ଗଭୀର ଦୁଃଖଦ ବୋଲି ବର୍ଣ୍ଣନା କରି କହିଛନ୍ତି ଯେ ଏହା ଲିବିଆ ପାଇଁ ଏକ ବଡ଼ କ୍ଷତି।
ତୁର୍କୀ ଅଧିକାରୀମାନେ କହିଛନ୍ତି ଯେ ଲିବିଆ ପ୍ରତିନିଧି ଦଳ ଦୁଇ ଦେଶ ମଧ୍ୟରେ ସାମରିକ ସହଯୋଗ ବୃଦ୍ଧି କରିବା ଉଦ୍ଦେଶ୍ୟରେ ଉଚ୍ଚସ୍ତରୀୟ ପ୍ରତିରକ୍ଷା ଆଲୋଚନା ପାଇଁ ଅଙ୍କାରାରେ ଅଛନ୍ତି।
ତୁର୍କୀର ଗୃହମନ୍ତ୍ରୀ ଅଲି ୟେରଲିକାୟା କହିଛନ୍ତି ଯେ, ବିମାନଟି ମଙ୍ଗଳବାର ସନ୍ଧ୍ୟା ପ୍ରାୟ ୮:୩୦ ରେ ଅଙ୍କାରାର ଏସେନବୋଗା ବିମାନବନ୍ଦରରୁ ଉଡ଼ାଣ ଆରମ୍ଭ କରିଥିଲା। ପ୍ରାୟ ୪୦ ମିନିଟ୍ ପରେ ବିମାନ ସହିତ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା, ପରେ ଦୁର୍ଘଟଣାର ଖବର ମିଳିଥିଲା। ଲିବିଆ ସାମରିକ ମୁଖ୍ୟ ଏବଂ ଅନ୍ୟ ଚାରି ଜଣଙ୍କୁ ନେଇ ଯାଉଥିବା ଏକ ଫାଲକନ୍-୫୦ ଘରୋଇ ଜେଟ୍ର ଭଗ୍ନାବଶେଷ ଅଙ୍କାରା ନିକଟରେ ଉଦ୍ଧାର କରାଯାଇଛି।
ଖରାପ ପାଗ ଯୋଗୁଁ ବିମାନ ସହିତ ଯୋଗାଯୋଗ ବିଚ୍ଛିନ୍ନ ହୋଇଥିବା ଅନୁମାନ କରାଯାଉଛି। ଏହା ପୂର୍ବରୁ, ବିମାନଟି ଅଙ୍କାରାର ଦକ୍ଷିଣରେ ଥିବା ହାୟମାନା ଜିଲ୍ଲା ନିକଟରେ ଏକ ଜରୁରୀକାଳୀନ ଅବତରଣ ପାଇଁ ସଙ୍କେତ ପଠାଇଥିଲା। ତେବେ ଜରୁରୀକାଳୀନ ଅବତରଣ ପାଇଁ ବିମାନଟି ଓହ୍ଲାଉଥିବାବେଳେ ରାଡାରରୁ ଗାୟବ ହୋଇଯାଇଥିଲା।
ଏହି ଘଟଣା ପରେ ଅଙ୍କାରା ବିମାନବନ୍ଦରକୁ ଅସ୍ଥାୟୀ ଭାବରେ ବନ୍ଦ କରିଦିଆଯାଇଛି ଏବଂ ଅନେକ ବିମାନକୁ ଅନ୍ୟ ସ୍ଥାନକୁ ସ୍ଥାନାନ୍ତର କରାଯାଇଛି। ଦୁର୍ଘଟଣାର କାରଣ ସମ୍ପର୍କରେ ତଦନ୍ତ ଚାଲିଛି।
ତେବେ ଏହି ଘଟଣାକୁ ଲିବିୟାର ସୁରକ୍ଷା ଏବଂ ରାଜନୈତିକ ପରିସ୍ଥିତି ପାଇଁ ଏକ ଗମ୍ଭୀର ବିପର୍ଯ୍ୟୟ ବୋଲି ବିବେଚନା କରାଯାଉଛି। ମହମ୍ମଦ ଅଲ୍ଲି ଅହମଦ ଅଲ-ହଦାଦ ପଶ୍ଚିମ ଲିବିୟାର ଜଣେ ଶୀର୍ଷ ସାମରିକ କମାଣ୍ଡର ଥିଲେ ଏବଂ ଜାତିସଂଘ ମଧ୍ୟସ୍ଥତାରେ ଲିବିୟାର ବିଭକ୍ତ ସଶସ୍ତ୍ର ବାହିନୀକୁ ଏକତ୍ର କରିବା ପାଇଁ ପ୍ରୟାସରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା ।