‌ନିଜ ଝିଅକୁ ଯୌନ ନିର୍ଯାତନା ଦେଉଥିବା ଅଭିଯୋଗରେ ମହିଳାଙ୍କୁ ମିଳିଲା ୭୨୩ ବର୍ଷ ଜେଲ୍‌ ଦଣ୍ଡ

ନୂଆଦିଲ୍ଲୀ: ଯୁକ୍ତରାଷ୍ଟ୍ରରେ ଜଣେ ମହିଳାଙ୍କୁ ନିଜ ଝିଅ ଏବଂ ସାବତ ଝିଅକୁ ଯୌନ ଶୋଷଣ ଅଭିଯୋଗରେ ୭୦୦ ବର୍ଷରୁ ଅଧିକ କାରାଦଣ୍ଡରେ ଦଣ୍ଡିତ କରାଯାଇଛି। ଏଥି ସହିତ, ଅଭିଯୁକ୍ତ ଲିସା ଲେସର୍‌ଙ୍କ ସ୍ୱାମୀ ମାଇକେଲ ଲେସର୍‌ଙ୍କୁ ଏହି ମାମଲାରେ ୪୩୮ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଛି।
୪୧ ବର୍ଷୀୟ ଲିସାଙ୍କୁ ନଭେମ୍ବର ୨ତାରିଖରେ ୭୨୩ ବର୍ଷ ପାଇଁ କାରାଦଣ୍ଡରେ ଦଣ୍ଡିତ କରାଯାଇଛି। ଏହି ମାମଲାର ନିଷ୍ପତ୍ତିକୁ ବିଚାରପତି ଷ୍ଟିଫେନ ବ୍ରାଉନ ଘୋଷଣା କରିଥିଲେ ଏବଂ ଆମେରିକୀୟ ନିୟମ ଅନୁଯାୟୀ, ଏଭଳି ମାମଲାରେ ଏହା ସର୍ବାଧିକ ଦଣ୍ଡ।
ଲିସା ବଳାତ୍କାର ଏବଂ ଯୌନ ନିର୍ଯାତନା ଭଳି ଗୁରୁତର ଅଭିଯୋଗର ସମ୍ମୁଖୀନ ହୋଇଛନ୍ତି। ରିପୋର୍ଟ ଅନୁଯାୟୀ, ଲିସା ତାଙ୍କ ସ୍ୱାମୀଙ୍କ ସହ ତାଙ୍କ ଝିଅ ଏବଂ ସାବତ ଝିଅକୁ ଦୀର୍ଘ ବର୍ଷ ଧରି ଯୌନ ଶୋଷଣ କରୁଥିଲେ।
ଏହି ମାମଲା ପ୍ରଥମେ ୨୦୦୭ ମସିହାରେ ରିପୋର୍ଟ କରାଯାଇଥିଲା କିନ୍ତୁ ଏହା ପରେ ପୀଡିତଙ୍କ ଅନୁରୋଧ କ୍ରମେ ଏହାକୁ ପୁଣି ଥରେ ଖୋଲାଯାଇଥିଲା। ଏହି ମାମଲା ବିଷୟରେ ଆଲୋଚନା ବେଳେ ଆସିଷ୍ଟାଣ୍ଟ ଆଟର୍ଣ୍ଣି କର୍ଟନି ସ୍କ୍ଲେକ୍ କହିଛନ୍ତି ଯେ ପୀଡିତାମାନେ ଅନେକ ଦିନ ଧରି ଏଭଳି ହୃଦୟହୀନ ଏବଂ ନୃଶଂସ ଲୋକଙ୍କ ଗହଣରେ ରହିଆସିଛନ୍ତି। ଦୀର୍ଘ ଦିନ ପରେ ପୀଡିତାଙ୍କୁ ନ୍ୟାୟ ମିଳିଛି।