ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ : ୧୧୪
ବାସ୍ତବତା ଓ ମନକଥା
ମଧ୍ୟରେ ନ ଥିଲେ ସମତା
ସଂଭବ ହୁଏ ଅସ୍ଥିରତା
ତହିଁରୁ ଜାତ ଅବ୍ୟବସ୍ଥା
ଭାଷାକୁ ଏଣୁତେଣୁ ଭାବି
ନ ହେଲେ ସତ୍ୟ ଅନୁଭବୀ
ହୋଇ ଧାରଣା ଅନୁଗତ
ଭାଷାରେ ସୃଷ୍ଟି କରୁଁ କ୍ଷତ
ଭାଷୀଂକ ଏପରି ଅଭ୍ୟାସ
ଚଂଚଳ ନ କଲେ ବିନାଶ
ବିକାଶ ହୁଏ ବିଳଂବିତ
ବ୍ୟକ୍ତି ନ ମୁଂଡାଏ ଦାୟିତ୍ବ
ଆପଣା ବଦଭ୍ୟାସ ଛାଡ଼ି
ସମୂହ ସହ ହେଲେ ଯୋଡ଼ି
ବ୍ୟକ୍ତିର ଶୁଦ୍ଧ ଅନୁରକ୍ତି
ଯୋଗାଏ ଅନାବିଳ ଶକ୍ତି
ଅନୁରକ୍ତି ଓ ଶକ୍ତି ବଳେ
ଭାଷାରୁ ଶୁଭଫଳ ମିଳେ
ଏହା ସର୍ବତ୍ର ପ୍ରମାଣିତ
ଗ୍ରାହ୍ୟ ହେଉ ଏ ମୂଳ ସତ୍ୟ
ନିଜର କଳ୍ପନା ଧାରଣା
ଯୋଗୁଁ ଅନେକ କଟକଣା
ସ୍ବେଚ୍ଛାରେ କରିଲେ ହନନ
ସଂଭବ ହୁଏ ଉନ୍ନୟନ
ଭାଷୀଂକୁ ଦେଲେ ସ୍ବାଧୀନତା
ବଢ଼େ ଭାଷାର ଗୁଣବତ୍ତା
ଅଯଥା ବାଧା ଓ ବଂଧନ
ଭାଷାର ମାନ କରେ କ୍ଷୁଣ୍ଣ
