ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ : ୨୦୪
ଭାଷାର ନାହିଁ ଜନ୍ମଦିନ
ତାହା ମନର ଉଦ୍ଭାବନ
ଧ୍ବନି ଓ ରୂପ ଭିନ୍ନ ଭିନ୍ନ
ହେବା ତହିଁର ମୁଖ୍ୟ ଗୁଣ
ସଂପର୍କ ରହିଲେ ପ୍ରଭାବ
ଗ୍ରହଣ କରିବା ସ୍ବଭାବ
ଯେଣୁ ଭାଷାର ଅଂତର୍ଗତ
ପ୍ରତ୍ୟେକ ଭାଷା ସମନ୍ବିତ
ବହୁ ଉତ୍ସରୁ ଶବ୍ଦ ଆସି
ଭାଷାରେ ରହିଲେ ବି ମିଶି
ପଦ ଓ ବାକ୍ୟର ଗଠନ
ସୂଚାଏ କ’ଣ କେତେ ଭିନ୍ନ
ଏକ ଭାଷାର ପ୍ରଚଳନ
ଅଟେ କେବଳ ଦିବାସ୍ୱପ୍ନ
ନିଜର ବୈଶିଷ୍ଟ୍ୟ ରକ୍ଷଣ
କରଂତି ସ୍ବଭାଷୀ ସୁଜନ
ଗର୍ବ, ଗୌରବ ଭଳି ଚିଂତା
ବଢ଼ାଉଥିଲେ ଅସ୍ଥିରତା
ଭାଷା ବି ହୁଅଇ ଅସ୍ଥିର
ଭାଷା ତ ମନର ମୁକୁର
ଅତି ଆଦର୍ଶପରାୟଣ
ମୌଳବାଦୀ ଲେଖକଗଣ
କରଂତି ନୀତି ନିର୍ଧାରଣ
ଲୋକେ ନ କରଂତି ପାଳନ
ଭାଷାରେ ଯାହା ସ୍ବାଭାବିକ
ତାହାକୁ ମାନି କେତେ ଲୋକ
କରିଲେ ସାହିତ୍ୟ ରଚନା
ଭାଷା ଲକ୍ଷଣ ପଡ଼େ ଜଣା
ଯାହାର ଯେଉଁପରି ରୁଚି
ପାଠକେ ନେଇ ତାହା ବାଛି
କରିଲେ ରଚନା ପଠନ
ବଢ଼ଂତି ଏବେ ଭାଷାମାନ