ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ ‘ଭାଷା ଭାଗବତ’
ଅନାବଶ୍ୟକ ପୁନରୁକ୍ତି
ମୁଖ୍ୟତଃ କରେ ଯେଉଁ ବ୍ୟକ୍ତି
ତାହାର ଭାବିବାର ଶକ୍ତି
ପାଏନାହିଁ ମନରୁ ମୁକ୍ତି
ପୁନର୍ଲିଖନକାରୀ ଲୋକ
ପାଏନି ଶୁଦ୍ଧ ଜ୍ଞାନାଲୋକ
ସଦ୍ୟ ଅର୍ଜିତ ଶୁଦ୍ଧଜ୍ଞାନ
ତା ପାଇଁ ସପନ ସମାନ
ମନକୁ କରି ଅଳସୁଆ
ହାତକୁ କରିଲେ କାଢ଼ୁଆ
ପୁରୁଣା ବହିପତ୍ର ପଢ଼ି
ଉତାରେ ଶବ୍ଦ ଧାଡ଼ି ଧାଡ଼ି
ଏପରି ଯାଂତ୍ରିକ ପଦ୍ଧତି
ଯୋଗୁଁ ହେଉଛି ଯେତେ କ୍ଷତି
କଳନା କରିନାହିଁ କେହି
ଯେ ଯା ଇଚ୍ଛାରେ ଥାଂତି ରହି
ଚିଂତାର ଧାର ହେଲେ କ୍ଷୀଣ
ଯାହା ଓ ଯେତିକି ଲକ୍ଷଣ
ଭାଷାରେ ଦେଖା ଦେଇପାରେ
ସବୁ ଦିଶୁଛି ଏହିଠାରେ