ଗାଜିଆବାଦ: ଏମିତି ବି ଆସେ ମୃତ୍ୟୁ । ଜିମରେ ଓ୍ବାର୍କ ଆଉଟ୍ କରିବାବେଳେ ଉଡିଗଲା ପ୍ରାଣବାୟୁ । ଯାହାର ଭିଡିଓ ମଧ୍ୟ ସାମ୍ନାକୁ ଆସିଛି ।ଏମିତି କିଛି ଘଟଣା ଘଟିଛି ଗାଜିଆବାଦର ସରସ୍ବତୀ ବିହାରରେ । ଜଣେ ଯୁବକ ଟ୍ରେଡମିଲରେ ଦୌଡୁଥିବାବେଳେ ହୃଦଘାତର ଶିକାର ହୋଇଛନ୍ତି । ଫଳରେ ସେ ତଳେ ପଡିଯାଇଛନ୍ତି । ଏବଂ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଛି । ମୃତକ ସିଦ୍ଧାର୍ଥ କୁମାର ସିଂ ବୋଲି ଜଣାପଡିଛି । ସିଦ୍ଧାର୍ଥ ହଠାତ୍ ଟ୍ରେଡମିଲରେ ଦୌଡୁଥିବାବେଳେ ନିଜ ଚେତା ହରାଉଛନ୍ତି । ଏବଂ କିଛି ସେକେଣ୍ଡ ପରେ ସେ ମେସିନ୍ ଉପରେ ପଡିଯାଉଛନ୍ତି ।
ପାଖରେ ଥିବା ଅନ୍ୟ ସମ୍ପୃକ୍ତ ଜିମ୍ ବନ୍ଧୁମାନେ ସିଦ୍ଧାର୍ଥଙ୍କୁ ବଞ୍ଚାଇବାକୁ ଚେଷ୍ଠା କରିଛନ୍ତି । ହେଲେ ତାଙ୍କ ଜୀବନ ବଞ୍ଚାଇପାରିନାହାନ୍ତି । ମୃତ୍ୟୁ ବେଳର ପୁରା ଭିଡିଓ ସିସି ଟିଭିରେ କଏଦ ହୋଇଛି । ଘଟଣା ଘଟିବାର ୧୦ ମିନିଟ ପୂର୍ବରୁ ସିଦ୍ଧାର୍ଥ ତାଙ୍କ ମାଆଙ୍କ ସହ ଫୋନରେ କଥା ହୋଇଥିଲେ । ସେ ନୋଏଡାସ୍ଥିତ ଏକ କଲେଜର ପ୍ରଥମ ବର୍ଷର ଛାତ୍ର । ସେ ତାଙ୍କ ପିତାଙ୍କ ସହ ନୋଏଡାରେ ରହୁଥିଲେ । ତାଙ୍କ ମାତା ବିହାରର ଏକ ସରକାରୀ ବିଦ୍ୟାଳୟରେ ଶିକ୍ଷକ ଅଟନ୍ତି। ତାଙ୍କ ମୃତଦେହକୁ ବିହାରର ସିୱାନକୁ ନିଆଯାଇଛି । ଏହି ଘଟଣା ଘଟିବା ପରେ ଜିମ୍ ଟି ବନ୍ଦ ରହିଛି । ତେବେ ଜିମ୍ ଯିବା ଆଜିକାଲିର ଯୁବପୀଢିଙ୍କ ପାଇଁ ଏକ ଟ୍ରେଣ୍ଡ ପାଲଟିଛି । ନିଜକୁ ସର୍ବଦା ଫୁଟ୍ ଏବଂ ସୁନ୍ଦର ରଖିବାକୁ ଲୋକେ ଜିମ୍ ଯାଉଛନ୍ତି । ମାତ୍ର ଗାଜିଆବାଦରେ ଘଟିଥିବା ଏହି ଘଟଣା ସମସ୍ତଙ୍କ ମନରେ ଭୟର ବାତାବରଣ ସୃଷ୍ଟି କରିଛି ।
Comments are closed.