ନୂଆଦିଲ୍ଲୀ: ଦିଲ୍ଲୀ ମଦ ଦୁର୍ନୀତି ମାମଲାରେ ସିବିଆଇ ୨୬ ଫେବୃଆରୀରେ ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କୁ ଗିରଫ କରିଥିଲା। ତେବେ ଏହି ଗିରଫକୁ ବିରୋଧ କରି ବର୍ତ୍ତମାନ ସିସୋଡିଆ ସୁପ୍ରିମକୋର୍ଟରେ ପହଞ୍ଚିଛନ୍ତି | ସିସୋଡିଆଙ୍କ ଓକିଲ ଅଭିଷେକ ମନୁ ସିଂହଭି ପ୍ରଧାନ ବିଚାରପତିଙ୍କୁ ଶୀଘ୍ର ଶୁଣାଣି କରିବାକୁ ଅନୁରୋଧ କରିଥିଲେ। ତେବେ ପ୍ରଧାନ ବିଚାରପତି କହିଛନ୍ତି ସେ ହାଇକୋର୍ଟ ଯାଆନ୍ତୁ ବା ଅନ୍ୟ ଆଇନଗତ ବିକଳ୍ପ ଗ୍ରହଣ କରିବା ଉଚିତ୍। ତେବେ ଓକିଲ ସିଂହଭିଙ୍କ ଅନୁରୋଧ କ୍ରମେ ପ୍ରଧାନ ବିଚାରପତି ଶୁଣାଣି କରିବେ ବୋଲି କହିଛନ୍ତି । ଅପରାହ୍ନ ୩:୫୦ ରେ ସୁପ୍ରିମକୋର୍ଟରେ ଶୁଣାଣି ହେବ। ସୁପ୍ରିମକୋର୍ଟରେ ଶୁଣାଣିକୁ ନେଇ ଆମ୍ ଆଦମୀ ପାର୍ଟିର ସାଂସଦ ସଞ୍ଜୟ ସିଂ କହିଛନ୍ତି, ‘ସିବିଆଇର କାର୍ଯ୍ୟାନୁଷ୍ଠାନ ଦୁର୍ଭାଗ୍ୟପୂର୍ଣ୍ଣ। ସମସ୍ତ ଅଭିଯୋଗ ଭିତ୍ତିହୀନ | ସିବିଆଇ ସବୁ ଯାଞ୍ଚ କରିଛି, କିନ୍ତୁ କିଛି ପାଇନାହିଁ କିମ୍ବା ପାଇବ ନାହିଁ |
ଗତକାଲି ମଧ୍ୟ କୋର୍ଟରେ ସିବିଆଇ କୌଣସି ଯୁକ୍ତି ରଖିପାରିନଥିଲା। ’ଅନ୍ୟପକ୍ଷରେ ମନୀଷ ସିସୋଡିଆଙ୍କୁ ସିବିଆଇର ପଚରାଉଚରା ଆରମ୍ଭ ହୋଇଛି। ସିସୋଡିଆଙ୍କ ସିବିଆଇ ପ୍ରଶ୍ନର ଏକ ଲମ୍ବା ତାଲିକା ପ୍ରସ୍ତୁତ କରିଛି | ଗିରଫ ପରେ ସିସୋଡିଆଙ୍କୁ ପ୍ରଥମ ଥର ପଚରାଉଚରା କରାଯାଇଛି। ଉଲ୍ଲେଖ ଥାଉ କି ସୋମବାର ଦ୍ୱିପ୍ରହରରେ ଦିଲ୍ଲୀର ରାଉଜ୍ ଏଭିନ୍ୟୁ କୋର୍ଟରେ ହାଜର କରାଯାଇଥିଲା। ମାମଲାରେ ଶୁଣାଣି ପରେ କୋର୍ଟ ସିସୋଦିଆଙ୍କୁ ୫ ଦିନିଆ ସିବିଆଇ ରିମାଣ୍ଡରେ ପଠାଇଥିଲେ । କୋର୍ଟରେ ହାଜର ପୂର୍ବରୁ ସିସୋଦିଆଙ୍କୁ ୫ ଦିନ ପାଇଁ ରିମାଣ୍ଡରେ ନେବାକୁ ସିବିଆଇ ଦାବି କରିଥିଲା। କୋର୍ଟ ଏହାକୁ ମଞ୍ଜୁର କରିଥିଲେ ।
