ମେରୁଟ: ରାମଙ୍କ ପାଇଁ ପ୍ରଚାର କରିବେ ସୀତା ଓ ଲକ୍ଷ୍ମଣ । ପ୍ରଚାର ମଇଦାନକୁ ଓହ୍ଲାଇବେ ରାମାନନ୍ଦ ସାଗରଙ୍କ ରାମାୟଣରେ ସୀତା ଏବଂ ଲକ୍ଷ୍ମଣଙ୍କ ଭୂମିକାରେ ଅଭିନୟ କରିଥିବା ଅଭିନେତା ଦୀପିକା ଚିଖଲିଆ ଏବଂ ସୁନୀଲ ଲାହରୀ । ଦୁହେଁ ବିଜେପି ପ୍ରାର୍ଥୀ ଅରୁଣ ଗୋଭିଲଙ୍କ ପାଇଁ ପ୍ରଚାର କରିବେ। ଏହା ବ୍ୟତୀତ ପ୍ରସିଦ୍ଧ ଟିଭି ସିରିଏଲରେ ଅନ୍ୟ ଚରିତ୍ରରେ ଅଭିନୟ କରୁଥିବା ଅଭିନେତା ଓ ଅଭିନେତ୍ରୀମାନେ ମଧ୍ୟ ପ୍ରଭୁ ରାମଙ୍କ ପାଇଁ ଭୋଟ୍ ମାଗିବେ ।
ଗତକାଲି ଗୋଭିଲ ତାଙ୍କ ନାମାଙ୍କନପତ୍ର ଦାଖଲ କରିଥିଲେ। ଏହି ସମୟରେ ତାଙ୍କ ସହିତ ଉପମୁଖ୍ୟମନ୍ତ୍ରୀ କେଶବ ପ୍ରଶାଦ ମୋର୍ଯ୍ୟ ଏବଂ କ୍ଷେତ୍ରୀୟ ଅଧ୍ୟକ୍ଷ ସତେନ୍ଦ୍ର ସିସୋଦିଆଙ୍କ ସମେତ ଉପପ୍ରଦେଶର ଅନେକ ବିଜେପି ନେତା ସାମିଲ ଥିଲେ । ଏହି ଅବସରରେ ଦୀପିକା ଚିଖଲିଆ କହିଛନ୍ତି, “ଆମର ଶୁଭେଚ୍ଛା ସବୁବେଳେ ତାଙ୍କ ସହ ଅଛି । ଆମର ବନ୍ଧୁତା ବହୁତ ପୁରୁଣା । ନିକଟରେ ପ୍ରାଣ ପ୍ରତିଷ୍ଠା ସମୟରେ ମଧ୍ୟ ଆମେ ଏକାଠି ହୋଇଥିଲୁ । ଆମେ ନିଶ୍ଚିତ ଭାବରେ ଗୋଭିଲଙ୍କ ପାଇଁ ପ୍ରଚାର କରିବୁ। ସେ ଆମର ଜଣେ ଭଲ ବନ୍ଧୁ ।
ଅନସ୍କ୍ରିନ୍ ସୀତାଙ୍କ ବ୍ୟତୀତ ଲକ୍ଷ୍ମଣଙ୍କ ଭୂମିକାରେ ଅଭିନୟ କରୁଥିବା ସୁନୀଲ ଲାହରୀ ମଧ୍ୟ ତାଙ୍କ ସାଥୀ ଅଭିନେତାଙ୍କୁ ସମ୍ପୂର୍ଣ୍ଣ ସମର୍ଥନ ଜଣାଇଛନ୍ତି ଏବଂ ଗୋଭିଲଙ୍କ ପାଇଁ ଭୋଟ୍ ମାଗିବାରେ ତାଙ୍କର କୌଣସି ଆପତ୍ତି ନାହିଁ ବୋଲି କହିଛନ୍ତି । ଲାହରୀ କହିଛନ୍ତି ଯେ, ଆମ ଭିତରେ ଏକ ଦୃଢ ସମ୍ପର୍କ ଅଛି । ସେହିପରି ସିରିୟଲର ଅନ୍ୟ ଚରିତ୍ରମାନେ ମଧ୍ୟ ଗୋଭିଲଙ୍କ ପାଇଁ ପ୍ରଚାର କରିବାକୁ ସମ୍ମତି ଦେଇଛନ୍ତି । ତେବେ ନିର୍ବାଚନ ପ୍ରଚାର ମଇଦାନରେ ରାମାୟଣ ପରି ଦୃଶ୍ୟ ସୃଷ୍ଟି ହେବାନେଇ ଆଶା କରାଯାଉଛି ।
ସୂଚନାଯୋଗ୍ୟ ଯେ, ମେରୁଟରେ ଦ୍ୱିତୀୟ ପର୍ଯ୍ୟାୟ ପାଇଁ ମତଦାନ ୨୬ ଏପ୍ରିଲରେ ଅନୁଷ୍ଠିତ ହେବ । ଏଠାରୁ ସମାଜବାଦୀ ପାର୍ଟିର ଅତୁଲ ପ୍ରଧାନ ଏବଂ ବହୁଜନ ସମାଜ ପାର୍ଟି (ବିଏସପି) ର ଦେବବ୍ରତ ତ୍ୟାଗୀ ବିପକ୍ଷରେ ଅଛନ୍ତି । ୨୦୧୯ ସାଧାରଣ ନିର୍ବାଚନରେ ମେରୁଟରେ ଏକ କଡ଼ା ପ୍ରତିଯୋଗିତା ଦେଖିବାକୁ ମିଳିଥିଲା । ଯେଉଁଥିରେ ୬୧.୪୫ ପ୍ରତିଶତ ମତଦାନ ହୋଇଥିଲା। ବିଏସପିର ହାଜି ମହମ୍ମଦ ୟାକୁବଙ୍କୁ ପରାସ୍ତ କରି ବିଜେପିର ରାଜେନ୍ଦ୍ର ଅଗ୍ରୱାଲ ୪,୭୨୯ଟି ଭୋଟରେ ଜିତି ମୋଟ ୫,୮୬,୧୮୪ଟି ଭୋଟ ପାଇଥିଲେ ।
Comments are closed.