ବ୍ରେନ ଟାଇପିଂ ଏଆଇ ଟେକ୍ନୋଲୋଜି: ଯାହା ଭାବିବେ ତାହା ହେବ ଟାଇପିଂ

ନୂଆଦିଲ୍ଲୀ: ଏହି ଡିଜିଟାଲ ଦୁନିଆରେ ଲୋକମାନେ ନୂଆ ନୂଆ ଟେକ୍ନୋଲୋଜି ଦ୍ୱାରା ଘେରି ରହିଛନ୍ତି । ତେବେ କେବେ ଭାବିଛନ୍ତି କି, ଆପଣ ଯାହା ଭାବିବେ ତାହା ଅଟୋମେଟିକ ଭାବରେ ଟାଇପ୍ ହୋଇଯିବ? ହଁ, ପ୍ରକୃତରେ ୨୦୧୭ରେ ଫେସବୁକ୍ ଏକ ନିଆରା ଚିନ୍ତାଧାରା ଉପସ୍ଥାପନ କରିଥିଲା ​​। କମ୍ପାନୀ ଅନୁଯାୟୀ, ଗୋଟିଏ ବ୍ରେନ ରିଡିଙ୍ଗ ସିଷ୍ଟମ ହେବା କଥା ଯାହା କେବଳ ଚିନ୍ତା କରିବା ମାତ୍ରେ ହିଁ ଟାଇପ୍ ହୋଇଯିବ । ଅନେକ ବର୍ଷର ଗବେଷଣା ପରେ କମ୍ପାନୀ ଏହି ଦିଗରେ ଅଗ୍ରଗତି କରିଛି । କିନ୍ତୁ ଏହି ଟେକ୍ନୋଲୋଜି ସାଧାରଣ ଲୋକଙ୍କ ପାଇଁ ଏପର୍ଯ୍ୟନ୍ତ ଉପଲବ୍ଧ ହୋଇ ନାହିଁ ।

କିପରି କାମ କରେ ମେଟାର ବ୍ରେନ ଟାଇପିଂ ଏଆଇ ?

ମେଟା ର ଏହି ଟେକ୍ନୋଲୋଜି ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ଏବଂ ନ୍ୟୁରୋସାଇନ୍ସ ମାଧ୍ୟମରେ ମସ୍ତିଷ୍କର କାର୍ଯ୍ୟକଳାପକୁ ବିଶ୍ଳେଷଣ କରି ଅନୁମାନ ଲଗାଏ ଯେ, ବ୍ୟକ୍ତି କେଉଁ ଅକ୍ଷର ଟାଇପ୍ କରୁଛନ୍ତି । କିନ୍ତୁ ଏଥିରେ ମଧ୍ୟ ଏକ ସମସ୍ୟା ଅଛି । ବାସ୍ତବରେ, ଏହି ସମ୍ପୂର୍ଣ୍ଣ ବ୍ୟବସ୍ଥା ଏକ ବଡ଼ ଏବଂ ମହଙ୍ଗା ଉପକରଣ ଉପରେ ନିର୍ଭର କରେ ।

MIT ଟେକ୍ନୋଲୋଜି ବିଶ୍ଲେଷଣ ଅନୁଯାୟୀ, ଏହି ଟେକ୍ନୋଲୋଜି ଏକ ମ୍ୟାଗ୍ନେଟୋଏନ୍ସଫାଲୋଗ୍ରାଫି (MEG) ମେସିନ୍ ବ୍ୟବହାର କରେ, ଯାହା ମସ୍ତିଷ୍କର ଛୋଟରୁ ଛୋଟ ଆକ୍ଟିଭିଟିକୁ ମଧ୍ୟ ମ୍ୟାଗ୍ନେଟିକ୍ ସଙ୍କେତ ମାଧ୍ୟମରେ ମେସିନ୍ ପାଖକୁ ପଠାଏ । ଏହି ମେସିନ୍ ବହୁତ ସମ୍ବେଦନଶୀଳ ଅଟେ ।

ଯଦିଓ ଏହି ଟେକ୍ନୋଲୋଜି ବୈଜ୍ଞାନିକ ଦୃଷ୍ଟିକୋଣରୁ ଏକ ପ୍ରମୁଖ ସଫଳତା, ତଥାପି ଏହାକୁ ଏକ ପ୍ରଡ଼କ୍ଟ ହେବାକୁ ବହୁତ ସମୟ ଲାଗିବ ।

MEG ମେସିନର ଓଜନ ଅଧା ଟନ୍ ଏବଂ ଏହାର ମୂଲ୍ୟ ପ୍ରାୟ ଦୁଇ ମିଲିୟନ୍ ଡଲାର (୧୬ କୋଟି ଟଙ୍କା) ହେବ । ସେଥିପାଇଁ ଏହା ମଧ୍ୟ ସାଧାରଣ ଲୋକଙ୍କ ପାଇଁ ଉପଲବ୍ଧ ହୋଇପାରିବ ନାହିଁ । ଏହା ବ୍ୟତୀତ, ଏହି ମେସିନ୍ ବ୍ୟବହାର କରିବାକୁ, ବ୍ୟକ୍ତିଙ୍କୁ ସଂପୂର୍ଣ୍ଣ ଭାବରେ ସ୍ଥିର ବସିବାକୁ ପଡିବ, କାରଣ ସାମାନ୍ୟ ଗତି ମଧ୍ୟ ମସ୍ତିଷ୍କ ସନ୍ଦେଶକୁ ଭୁଲ କରିପାରେ ।

ମେଟା ଗବେଷକ ଜିନ୍-ରେମି କିଙ୍ଗ ଏବଂ ତାଙ୍କ ଦଳ ଏହି ଟେକ୍ନୋଲୋଜିକୁ ଏକ ପ୍ରଡକ୍ଟ ଭାବରେ ବିକଶିତ କରିବା ପରିବର୍ତ୍ତେ ମସ୍ତିଷ୍କରେ ଭାଷା ପ୍ରକ୍ରିୟାକୁ ଭଲ ଭାବରେ ବୁଝିବା ଉପରେ ଧ୍ୟାନ ଦେଉଛନ୍ତି ।