ରାଜନୀତିରେ ‘ମୋ ଘର’, ବିଜେପି କହିଲା କେନ୍ଦ୍ର ଯୋଜନାର ନକଲ, ସରକାର କହିଲେ ଅବହେଳିତଙ୍କୁ ଗୁରୁତ୍ୱ

କଟକ: ରାଜ୍ୟ ସରକାରଙ୍କ ‘ମୋ ଘର’ ଯୋଜନା ଓଡ଼ିଶାବାସୀଙ୍କୁ ବିଭ୍ରାନ୍ତ କରିବା ଲକ୍ଷ୍ୟରେ କେନ୍ଦ୍ରୀୟ ଯୋଜନାର ଏକ ନକଲ ମାତ୍ର ବୋଲି କହି ସୋମବାର ଭାରତୀୟ ଜନତା ପାର୍ଟି ପକ୍ଷରୁ କୁହାଯାଇଛି। ଏପରି କହି ଶାସକ ଦଳକୁ କଡା ସମାଲୋଚନା କରିଛି ବିଜେପି।

ବିଜେପିର ବରିଷ୍ଠ ନେତା ତଥା ପୂର୍ବତନ ସାଂସଦ ବିଭୁପ୍ରସାଦ ତରାଇ ଏହି ଯୋଜନା ସମ୍ପର୍କରେ କହିଛନ୍ତି, ଓଡ଼ିଶାବାସୀଙ୍କୁ ବିଭ୍ରାନ୍ତ କରିବା ପାଇଁ ‘ମୋ ଘର’ର ପ୍ରଚଳନ କରାଯାଇଛି। ଓଡ଼ିଶା ସରକାର କେନ୍ଦ୍ରୀୟ ଯୋଜନାଗୁଡ଼ିକୁ ହାଇଜାକ୍ କରି, ରି-ପ୍ୟାକେଜ୍ କରି, ନିଜସ୍ୱ ବ୍ରାଣ୍ଡିଂରେ ପ୍ରଚଳନ କରିବାରେ ବ୍ୟସ୍ତ। ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ବଣ୍ଟନରେ ବିଫଳ ହେବା ପରେ ବିଜେଡି ଏହି ଯୋଜନା ଆରମ୍ଭ କରିଛି।

ତରାଇ ଆହୁରି ଅଭିଯୋଗ କରିଛନ୍ତି ଯେ, ଏହି ଯୋଜନା ଆରମ୍ଭ କରିବା ପଛରେ ବିଜେଡିର ଉଦ୍ଦେଶ୍ୟ ଥିଲା ଆଗାମୀ ନିର୍ବାଚନରେ ଭୋଟରଙ୍କୁ ପ୍ରଭାବିତ କରିବା, ବାସଗୃହ ସମସ୍ୟାର ସମାଧାନ ପାଇଁ ପ୍ରକୃତ ପ୍ରୟାସ କରିବା ପରିବର୍ତ୍ତେ ରାଜନୈତିକ ଚାଲ୍ ଖେଳିବା।

ରାଜ୍ୟ ସରକାରଙ୍କ ବିଶ୍ୱସନୀୟତା ଏବଂ ପ୍ରତିଶ୍ରୁତି ପୂରଣ କରିବାର କ୍ଷମତା ଉପରେ ପ୍ରଶ୍ନ ଉଠାଇ କଂଗ୍ରେସ ଏହି ସମାଲୋଚନାରେ ସାମିଲ ହୋଇଛି।

ପ୍ରଦେଶ କଂଗ୍ରେସ କମିଟିର ମୁଖ୍ୟ ଶରତ ପଟ୍ଟନାୟକ କହିଛନ୍ତି, ବିଜେଡି ନୂଆ ସ୍ଲୋଗାନ ଦେଇଛି, ‘ମୋ ଘର’ ଓଡ଼ିଶାରେ ୨୨ ବର୍ଷ ଶାସନ କାଳରେ ଯଦି ସେମାନେ ଲୋକଙ୍କୁ ପକ୍କା ଘର ଦେଇପାରିଲେ ନାହିଁ, ତେବେ ଏବେ କେମିତି କରିବେ?

ଓଡ଼ିଶା ସରକାର କେବଳ ନିର୍ବାଚନକୁ ଦୃଷ୍ଟିରେ ରଖି ରାଜନୈତିକ ଉଦ୍ଦେଶ୍ୟ ପ୍ରଣୋଦିତ କାର୍ଯ୍ୟ କରୁଛନ୍ତି ବୋଲି ଶରତ ପଟ୍ଟନାୟକ ଅଭିଯୋଗ କରିଛନ୍ତି। ସେ ଆହୁରି ମଧ୍ୟ କେନ୍ଦ୍ର ସରକାରଙ୍କ ଅନୁରୂପ ପଦକ୍ଷେପକୁ ପ୍ରତିହତ କରିବା ପାଇଁ ଯୋଜନା ଆରମ୍ଭ କରିବାର ବିଜେଡିର ଇତିହାସ ଉପରେ ଆଲୋକପାତ କରି ସ୍ୱଳ୍ପକାଳୀନ ବିଜୁ କେବିକେ ଯୋଜନାକୁ ଉଦାହରଣ ଭାବେ ଦର୍ଶାଇଛନ୍ତି।

ସୋମବାର ଅନୁଷ୍ଠିତ କ୍ୟାବିନେଟ୍ ବୈଠକରେ ‘ମୋ ଘର’ ଯୋଜନାକୁ କ୍ୟାବିନେଟ ମଞ୍ଜୁରୀ ମିଳିଛି। ସରକାରୀ ପ୍ରେସ୍ ବିଜ୍ଞପ୍ତି ଅନୁଯାୟୀ, ଏହି ଯୋଜନାର ଉଦ୍ଦେଶ୍ୟ ହେଉଛି ଆବାସ ଯୋଜନାରୁ ବାଦ୍ ପଡ଼ିଥିବା ପରିବାରଗୁଡ଼ିକୁ ସହାୟତା ପ୍ରଦାନ କରିବା। ଅତୀତରେ ଯେଉଁ ପରିବାରମାନେ ଛୋଟ ଘର ସହାୟତା ପାଇଥିଲେ ଏବଂ ଏବେ ନିଜ ଘରକୁ ଉନ୍ନତ କରିବା କିମ୍ବା ସମ୍ପ୍ରସାରଣ କରିବାକୁ ଚାହୁଁଛନ୍ତି ସେମାନଙ୍କୁ ସହାୟତା ଦେବା ମଧ୍ୟ ଏହାର ଲକ୍ଷ୍ୟ।

କ୍ୟାବିନେଟ୍ ନିଷ୍ପତ୍ତି ପରେ ଓଡ଼ିଶାର ପଞ୍ଚାୟତିରାଜ ମନ୍ତ୍ରୀ ପ୍ରଦୀପ ଅମାତ କହିଛନ୍ତି ଯେ ଗ୍ରାମାଞ୍ଚଳରେ ଥିବା ନିମ୍ନ ଆୟବର୍ଗ ଓ ମଧ୍ୟବିତ୍ତ ବର୍ଗର ବାସିନ୍ଦାଙ୍କୁ ରିହାତି ଦରରେ ଋଣ ପ୍ରଦାନ କରି ଉପକୃତ କରିବା ପାଇଁ ଏହି ଯୋଜନା ଆରମ୍ଭ କରାଯାଇଛି।