ଭୁବନେଶ୍ୱର: ରାଜ୍ୟରେ ଏବେ ଗ୍ରୀଷ୍ମ ପ୍ରବାହ ଅସମ୍ଭାଳ ରୂପ ନେଇଛି। ପ୍ରବଳ ଖରା ଓ ଗୁଳୁଗୁଳି ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡିଥିବା ବେଳେ ଏକ ଆଶ୍ଚର୍ଯ୍ୟଜନକ ତଥା ଭୟଙ୍କର ଘଟଣା ସାମ୍ନାକୁ ଆସିଛି। ଅତ୍ୟଧିକ ତାପମାତ୍ରା କାରଣରୁ ଜଣେ ବ୍ୟକ୍ତିଙ୍କ ପକେଟରେ ଥିବା ମୋବାଇଲ ଫୋନ ହଠାତ ବିସ୍ଫୋରଣ ହୋଇଛି। ଏହି ଅଭାବନୀୟ ଘଟଣାରେ ସମ୍ପୃକ୍ତ ବ୍ୟକ୍ତି ଜଣକ ଗୁରୁତର ଭାବେ ଆହତ ହୋଇଛନ୍ତି।
ମିଳିଥିବା ସୂଚନା ଅନୁଯାୟୀ ବାହାରେ ପ୍ରବଳ ତାତି ଥିବା ସମୟରେ ବ୍ୟକ୍ତି ଜଣକ ନିଜ ପ୍ୟାଣ୍ଟ ପକେଟରେ ମୋବାଇଲ ରଖି ଯାତ୍ରା କରୁଥିଲେ। ପ୍ରଚଣ୍ଡ ଖରା ଏବଂ ବାହାରର ଉତ୍ତାପ ଯୋଗୁଁ ମୋବାଇଲ ବ୍ୟାଟେରୀ ଅତ୍ୟଧିକ ଗରମ ହୋଇଯାଇଥିଲା ଯାହା ଫଳରେ ଏହା ହଠାତ ଫାଟି ଯାଇଥିଲା। ମୋବାଇଲ ଫାଟିବା ମାତ୍ରେ ବ୍ୟକ୍ତିଙ୍କ ଡ୍ରେସରେ ନିଆଁ ଲାଗିଯାଇଥିଲା ଓ ତାଙ୍କ ଗୋଡ଼ ତଥା ଶରୀରର କିଛି ଅଂଶ ପୋଡ଼ିଯାଇଥିଲା। ସ୍ଥାନୀୟ ଲୋକେ ତୁରନ୍ତ ତାଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ ଏବଂ ସେଠାରେ ତାଙ୍କର ଚିକିତ୍ସା ଜାରି ରହିଛି।
ବିଶେଷଜ୍ଞଙ୍କ ମତରେ ଏବେ ରାଜ୍ୟର ଅଧିକାଂଶ ସ୍ଥାନରେ ତାପମାତ୍ରା ୪୦ ଡିଗ୍ରୀ ଉପରେ ରହୁଛି। ସ୍ମାର୍ଟଫୋନ ଗୁଡିକ ସାଧାରଣତଃ ୩୫ ଡିଗ୍ରୀ ସେଲସିୟସ ପର୍ଯ୍ୟନ୍ତ ସୁରକ୍ଷିତ ଭାବେ କାମ କରିବା ପାଇଁ ତିଆରି ହୋଇଥାଏ। ଖରାରେ ଅଧିକ ସମୟ ରହିଲେ କିମ୍ବା ଫୋନ ଉପରେ ସିଧାସଳଖ ସୂର୍ଯ୍ୟ କିରଣ ପଡିଲେ ବ୍ୟାଟେରୀ ସହଜରେ ଗରମ ହୋଇ ବିସ୍ଫୋରଣ ହେବାର ଆଶଙ୍କା ବଢିଯାଏ।
