BRICS Summit 2026: ଡିସେମ୍ବରରେ ଏକାଠି ହୋଇପାରନ୍ତି ମୋଦୀ, ପୁଟିନ୍, ଜିନପିଙ୍ଗ୍ ଓ ଟ୍ରମ୍ପ: ଜି-୨୦ ସମ୍ମିଳନୀ ପୂର୍ବରୁ ଋଷର ବଡ଼ ସଙ୍କେତ
ନୂଆଦିଲ୍ଲୀ: ଭାରତ ମଣ୍ଡପମ୍ରେ ଆୟୋଜିତ ବ୍ରିକ୍ସ ସମ୍ମିଳନୀ (BRICS Summit 2026) ଅବସରରେ ବିଶ୍ୱର ପ୍ରମୁଖ ନେତାମାନଙ୍କ ସାକ୍ଷାତ ଆଲୋଚନା ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି । ବିଶେଷ କରି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଋଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ୍ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ଏକାଠି ହେବା ବିଶ୍ୱ ରାଜନୀତିରେ ନୂଆ ସମୀକରଣ ସୃଷ୍ଟି କରିଛି । ଏହି ସମୟରେ ଋଷ୍ ରାଷ୍ଟ୍ରପତିଙ୍କ ସ୍ୱତନ୍ତ୍ର ଦୂତ କିରିଲ ଦିମିତ୍ରିଭଙ୍କ ଏକ ସୋସିଆଲ୍ ମିଡିଆ ପୋଷ୍ଟ କୂଟନୈତିକ ସ୍ତରରେ ବ୍ୟାପକ ଆଲୋଡ଼ନ ସୃଷ୍ଟି କରିଛି । କିରିଲ ନିଜର ଏକ୍ସ ହ୍ୟାଣ୍ଡେଲରେ ଏହି ତିନି ନେତାଙ୍କ ଏକ ଫଟୋ ସେୟାର କରି ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମନେ ପକାଇଛନ୍ତି ।
କିରିଲ ଏହି ଫଟୋର କ୍ୟାପ୍ସନ୍ରେ ଲେଖିଛନ୍ତି ଯେ, “ନେତାମାନଙ୍କର ଏହି ବଳୟ ପୂରଣ କରିବା ପାଇଁ କେବଳ ସେମାନଙ୍କର ବନ୍ଧୁ ରାଷ୍ଟ୍ରପତି ଟ୍ରମ୍ପଙ୍କର ଅଭାବ ରହିଯାଇଛି।” ଫଟୋରେ ମୋଦୀ, ପୁଟିନ୍ ଏବଂ ଜିନପିଙ୍ଗଙ୍କ ମଧ୍ୟରେ ଘନିଷ୍ଠ ଆଲୋଚନା ହେଉଥିବା ଦେଖିବାକୁ ମିଳିଛି । ପ୍ରାୟ ୭ ବର୍ଷର ଲମ୍ବା ବ୍ୟବଧାନ ପରେ ଚୀନ୍ ରାଷ୍ଟ୍ରପତି ଭାରତ ଗସ୍ତରେ ଆସିଛନ୍ତି ଏବଂ ପ୍ରଧାନମନ୍ତ୍ରୀ ମୋଦୀଙ୍କ ସହ ତାଙ୍କର ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷିକ ଆଲୋଚନା ମଧ୍ୟ ହୋଇଛି । ସେହିପରି ମୋଦୀ ଏବଂ ପୁଟିନଙ୍କ ମଧ୍ୟରେ ଅର୍ଥନୀତି, ବାଣିଜ୍ୟ, ପ୍ରତିରକ୍ଷା ଓ ବିଶ୍ୱ ସୁରକ୍ଷା ପ୍ରସଙ୍ଗରେ ବ୍ୟାପକ ଆଲୋଚନା ହୋଇଛି ।
ଆଗାମୀ ଜି-୨୦ ସମ୍ମିଳନୀ ପୂର୍ବରୁ ଏହି ପୋଷ୍ଟର ବେଶ୍ ତାତ୍ପର୍ଯ୍ୟ ରହିଛି । ସୂଚନାଯୋଗ୍ୟ, ୨୦୨୬ ମସିହାରେ ଆମେରିକା ଜି-୨୦ର ଅଧ୍ୟକ୍ଷତା କରୁଛି। ଚଳିତ ବର୍ଷ ଡିସେମ୍ବର ମାସରେ ଆମେରିକାର ମିଆମି ଠାରେ ଜି-୨୦ ଶିଖର ସମ୍ମିଳନୀ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । ଆଶା କରାଯାଉଛି ଯେ ଏହି ମଞ୍ଚରେ ଡୋନାଲ୍ଡ ଟ୍ରମ୍ପ, ନରେନ୍ଦ୍ର ମୋଦୀ, ଭ୍ଲାଦିମିର ପୁଟିନ୍ ଏବଂ ସି ଜିନପିଙ୍ଗ୍ ଏକାଠି ଦେଖିବାକୁ ମିଳିପାରନ୍ତି। ଦିଲ୍ଲୀ ବ୍ରିକ୍ସ ସମ୍ମିଳନୀରେ ଏହି ତିନି ପ୍ରଭାବଶାଳୀ ନେତାଙ୍କ ବୈଠକ ପରେ ଡିସେମ୍ବରର ସମ୍ଭାବ୍ୟ ଚତୁର୍ପାକ୍ଷିକ ମିଳନ ଉପରେ ସମସ୍ତଙ୍କ ନଜର ରହିଛି ।
କିରିଲ ଆଲେକ୍ସଜାଣ୍ଡ୍ରୋଭିଚ୍ ଦିମିତ୍ରିଭ୍ ହେଉଛନ୍ତି ଋଷର ଜଣେ ପ୍ରଭାବଶାଳୀ ବ୍ୟବସାୟୀ ଓ ରାଜନୈତିକ ଦୂତ। ସେ ବର୍ତ୍ତମାନ ଋଷର ସୋଭରେନ୍ ୱେଲ୍ଥ ଫଣ୍ଡ ‘ରସିଆନ୍ ଡାଇରେକ୍ଟ ଇନଭେଷ୍ଟମେଣ୍ଟ ଫଣ୍ଡ’ର ସିଇଓ ଭାବରେ କାର୍ଯ୍ୟ କରୁଛନ୍ତି, ଯାହାର ମୂଲ୍ୟ ୧୦ ବିଲିୟନ ଡଲାରରୁ ଊର୍ଦ୍ଧ୍ୱ। ଏହା ବ୍ୟତୀତ ସେ ରାଷ୍ଟ୍ରପତି ପୁଟିନଙ୍କ ବିଦେଶୀ ପୁଞ୍ଜିନିବେଶ ଏବଂ ଆର୍ଥିକ ସହଯୋଗ ବ୍ୟାପାରର ସ୍ୱତନ୍ତ୍ର ଦୂତ ଅଟନ୍ତି । ନିକଟ ଅତୀତରେ ଋଷ୍-ୟୁକ୍ରେନ୍ ଯୁଦ୍ଧ ସମାପ୍ତ କରିବା ଉଦ୍ଦେଶ୍ୟରେ ଆମେରିକା ସହିତ ପରୋକ୍ଷ ଶାନ୍ତି ଆଲୋଚନା ଚଳାଇବାରେ ତାଙ୍କର ପ୍ରମୁଖ ଭୂମିକା ଥିବା ନେଇ ସେ ବେଶ୍ ଚର୍ଚ୍ଚାରେ ଥିଲେ । ଏଭଳି ସ୍ଥିତିରେ ଟ୍ରମ୍ପଙ୍କୁ ନେଇ ତାଙ୍କର ଏହି ମନ୍ତବ୍ୟ ଆଗାମୀ ବିଶ୍ୱ ରାଜନୀତି ପାଇଁ ଏକ ବଡ଼ ସଙ୍କେତ ବୋଲି ବୁଦ୍ଧିଜୀବୀମାନେ ମତ ଦେଉଛନ୍ତି ।
