ନୂଆଦିଲ୍ଲୀ: ଗତ କିଛି ଦିନ ହେବ ଲଗାତାର ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନରେ ନାମିବିଆରୁ ଆସୁଥିବା ଚିତାଙ୍କ ମଧ୍ୟରେ 10 ଜଣଙ୍କର ମୃତ୍ୟୁ ହୋଇସାରିଲାଣି । ଯାହା ଉଦ୍ୟାନ କତୃପକ୍ଷଙ୍କ ପାଇଁ ଚିନ୍ତାର କାରଣ ପାଲଟିଥିବାବେଳେ, ଏହି ସମୟରେ ଏକ ଖୁସି ଖବର ସାମ୍ନାକୁ ଆସିଛି । କୁନୋ ଜାତୀୟ ଉଦ୍ୟାନରେ ନାମିବିଆରୁ ଆସିଥିବା ଏକ ଚିତା 3 ଜଣ ଶାବକଙ୍କୁ ଜନ୍ମ ଦେଇଛି । ଏନେଇ ଟ୍ବିଟ୍ କରି ସୂଚନା ଦେଇଛନ୍ତି କେନ୍ଦ୍ର ପରିବେଶ ମନ୍ତ୍ରୀ ଭୁପେନ୍ଦ୍ର ଯାଦବ । ଏହା ସହ କିଛି ସପ୍ତାହ ପୂର୍ବରୁ, ଅନ୍ୟ ଏକ ଚିତା 3 ଟି ଛୁଆ ଜନ୍ମ ଦେଇଥିବା ମନ୍ତ୍ରୀ ଟ୍ବିଟ୍ ରେ ଜଣାଇଛନ୍ତି ।
ନୂତନ ଶାବକଙ୍କୁ ଜନ୍ମ ଦେଇଥିବା ଚିତା ର ନାଁ ହେଉଛି ଜ୍ବାଲା । ଏହା ପୂର୍ବରୁ ସେ ନାମିବିଆରେ ଥିବା ସମୟରେ 4 ଟି ଶାବକଙ୍କୁ ଜନ୍ମ ଦେଇଥିଲା ସେଥିମଧ୍ୟରୁ ମାତ୍ର ଗୋଟିଏ ଶାବକ ଜୀବିତ ରହିପାରିଥିଲା ଅନ୍ୟ 3 ଜଣଙ୍କର ମୃତ୍ୟୁ ହୋଇଥିଲା । ଜ୍ୱାଲା ଏବଂ ଆଶା ହେଉଛନ୍ତି ସେହି ଦୁଇ ଚିତା, ଯେଉଁମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ପ୍ରୋଜେକ୍ଟ ଚିତା’ ଅଧୀନରେ ନାମିବିଆରୁ ଭାରତକୁ ଅଣାଯାଇଥିଲା । ସ୍ବାଧୀନ ଭାରତରେ ବିଲୁପ୍ତ ହୋଇଯାଇଥିବା ଏହି ବୃହତ ମାଂସାହାରୀ ପ୍ରଜାତିର ଜନସଂଖ୍ୟା ବୃଦ୍ଧି କରିବାକୁ ଏହି ଯୋଜନାର ଲକ୍ଷ୍ୟ ରହିଛି ।
Kuno’s new cubs!
Namibian Cheetah named Jwala has given birth to three cubs. This comes just weeks after Namibian Cheetah Aasha gave birth to her cubs.
Congratulations to all wildlife frontline warriors and wildlife lovers across the country.
May Bharat’s wildlife thrive… pic.twitter.com/aasusRiXtG
— Bhupender Yadav (@byadavbjp) January 23, 2024
ସେପ୍ଟେମ୍ବର 2022 ରେ 8 ଟି ଚିତାବାଘର ପ୍ରଥମ ବ୍ୟାଚ୍ ଭାରତକୁ ଅଣାଯାଇଥିଲା । ଗତ ବର୍ଷ ଫେବୃଆରୀରେ ଦକ୍ଷିଣ ଆଫ୍ରିକାରୁ 12 ଟି ଚିତାବାଘର ଦ୍ୱିତୀୟ ବ୍ୟାଚ୍ ଅଣାଯାଇଥିଲା । ଏହାପରେ ନାମିବିଆ ଏବଂ ଦକ୍ଷିଣ ଆଫ୍ରିକାରୁ ଆଣିଥିବା 20 ଟି ବୟସ୍କ ଚିତାଙ୍କ ମଧ୍ୟରୁ 10 ଜଣଙ୍କ ମୃତ୍ୟୁ ପରେ ଚିତା ସଂରକ୍ଷଣ ପ୍ରକଳ୍ପକୁ ତୀବ୍ର ସମାଲୋଚନା କରାଯାଇଥିଲା ।