ବଲାଙ୍ଗୀରରେ ସାମ୍ବାଦିକଙ୍କୁ ମାଡ଼ ମାମଲା: ନିଜ ଆଡ଼ୁ ମାମଲା ରୁଜୁ କଲା ଜାତୀୟ ମାନବାଧିକାର କମିଶନ

ଭୁବନେଶ୍ବର: ମେ ୨୫ ତାରିଖରେ ଓଡ଼ିଶାର ବଲାଙ୍ଗୀର ଜିଲ୍ଲାର କୁଲାଥିପାଲି ଗାଁରେ ଏକ ନିର୍ମାଣ ସ୍ଥାନରେ ଦୁର୍ନୀତି ଅଭିଯୋଗର ରିପୋର୍ଟ କରୁଥିବା ଜଣେ ଟିଭି ସାମ୍ବାଦିକଙ୍କୁ ହୋଇଥିବା ଆକ୍ରମଣ ମାମଲାରେ ଜାତୀୟ ମାନବାଧିକାର କମିଶନ (ଏନଏଚଆରସି) ନିଜ ଆଡ଼ୁ ମାମଲା ରୁଜୁ କରିଛନ୍ତି । ଗଣମାଧ୍ୟମ ରିପୋର୍ଟ ଆଧାରରେ ଏନଏଚଆରସି ଏହି ମାମଲା ରୁଜ୍ଜୁ କରିଛନ୍ତି । ଦୁଇ ସପ୍ତାହ ମଧ୍ୟରେ ଏହି ବିଷୟରେ ଏକ ବିସ୍ତୃତ ରିପୋର୍ଟ ପ୍ରଦାନ ପାଇଁ ଓଡିଶା ପୋଲିସ ମହାନିର୍ଦ୍ଦେଶକଙ୍କୁ କମିଶନଙ୍କ ପକ୍ଷରୁ ଏକ ନୋଟିସ ଜାରି କରାଯାଇଛି ।

ରିପୋର୍ଟ ଅନୁଯାୟୀ, ଟିଭି ସାମ୍ବାଦିକଙ୍କୁ ହଠାତ୍ ଆକ୍ରମଣ କରାଯାଇଥିଲା ଏବଂ ତାଙ୍କ ହାତ ଏବଂ ଗୋଡ ବାନ୍ଧି ଦିଆଯାଇଥିଲା । ଏହା ପରେ, ସାମ୍ବାଦିକଙ୍କୁ ଧରି ଗାଁ ଚାରିପାଖରେ ଶୋଭାଯାତ୍ରା କରାଯାଇଥିଲା ଏବଂ ଏକ ଖୁଣ୍ଟରେ ବାନ୍ଧି ନିର୍ମମ ଭାବରେ ମାଡ଼ କରାଯାଇଥିଲା ।

କମିଶନ ଉଲ୍ଲେଖ କରିଛନ୍ତି ଯେ, ରିପୋର୍ଟର ବିଷୟବସ୍ତୁ, ଯଦି ସତ୍ୟ, ତେବେ ପୀଡିତ ସାମ୍ବାଦିକଙ୍କ ମାନବାଧିକାର ଉଲ୍ଲଂଘନର ଏକ ଗୁରୁତର ମାମଲା ସୃଷ୍ଟି ହେଉଛି । ମେ ୨୬ ତାରିଖ ୨୦୨୫ରେ ପ୍ରସାରିତ ଗଣମାଧ୍ୟମ ରିପୋର୍ଟ ଅନୁସାରେ, ଅପରାଧୀମାନେ ପୀଡିତଙ୍କ ମୋବାଇଲ୍ ଫୋନ୍ ଏବଂ ଭିଡିଓ କ୍ୟାମେରା ମଧ୍ୟ ଭାଙ୍ଗି ଦେଇଥିଲେ ଏବଂ ତାଙ୍କୁ ଘଟଣା କିମ୍ବା ଚାଲିଥିବା ନିର୍ମାଣ କାର୍ଯ୍ୟ ବିଷୟରେ କାହାକୁ କିଛି ନ ଜଣାଇବାକୁ ଧମକ ଦିଆଯାଇଥିଲା ।