ଭୁବନେଶ୍ୱର: କେନ୍ଦ୍ର ସରକାର ରାସନ କାର୍ଡ ହିତାଧିକାରୀଙ୍କ ପାଇଁ ଏକ ବଡ଼ ସୁବିଧା ଆଣିଛନ୍ତି। ଗୋଟିଏ ଦେଶ ଗୋଟିଏ ରାସନ କାର୍ଡ ଯୋଜନା ମାଧ୍ୟମରେ ଏବେ ଯୋଗ୍ୟ ହିତାଧିକାରୀମାନେ ଦେଶର ଯେକୌଣସି ସ୍ଥାନରୁ ନିଜର ମାସିକ ରାସନ ସାମଗ୍ରୀ ପାଇପାରିବେ। ଏଥିପାଇଁ ନିଜ ଗାଁ କିମ୍ବା ପଞ୍ଚାୟତର ନିର୍ଦ୍ଦିଷ୍ଟ ଦୋକାନ ଉପରେ ନିର୍ଭର କରିବାର ଆବଶ୍ୟକତା ଆଉ ନାହିଁ।
କାମଧନ୍ଦା ଅନ୍ୱେଷଣରେ ଗାଁ ଛାଡି ଅନ୍ୟ ରାଜ୍ୟ କିମ୍ବା ସହରକୁ ଯାଉଥିବା ପ୍ରବାସୀ ଶ୍ରମିକ ଏବଂ ଦିନ ମଜୁରିଆଙ୍କ ପାଇଁ ଏହି ଯୋଜନା ଆଶୀର୍ବାଦ ପାଲଟିଛି। ପୂର୍ବରୁ ଅନ୍ୟ ସ୍ଥାନକୁ ଗଲେ ସେମାନେ ରାସନ ସାମଗ୍ରୀ ପାଇ ପାରୁନଥିଲେ। କିନ୍ତୁ ଏବେ ସେମାନେ ନିଜର ପୁରୁଣା ରାସନ କାର୍ଡ ବ୍ୟବହାର କରି ଯେକୌଣସି ନୂଆ ଜାଗାରେ ସୁଲଭ ମୂଲ୍ୟ ଦୋକାନରୁ ସହଜରେ ଚାଉଳ ଓ ଗହମ ଆଦି ନେଇପାରିବେ।
ଏହି ସୁବିଧାର ଲାଭ ଉଠାଇବା ପାଇଁ ରାସନ କାର୍ଡ ସହିତ ଆଧାର ଲିଙ୍କ ହେବା ନିହାତି ଜରୁରୀ। ହିତାଧିକାରୀମାନେ ଦୋକାନକୁ ଗଲେ ସେଠାରେ ଥିବା ଇଲେକ୍ଟ୍ରୋନିକ୍ ମେସିନରେ ସେମାନଙ୍କର ଆଙ୍ଗୁଠି ଚିହ୍ନ ନିଆଯାଏ। ବାୟୋମେଟ୍ରିକ୍ ଯାଞ୍ଚ ହେବା ପରେ ଜାତୀୟ ଖାଦ୍ୟ ସୁରକ୍ଷା ଆଇନ ଅଧୀନରେ ମିଳୁଥିବା ସମ୍ପୂର୍ଣ୍ଣ କୋଟା ସାମଗ୍ରୀ ସେମାନଙ୍କୁ ପ୍ରଦାନ କରାଯାଏ। ଅନ୍ୟ ରାଜ୍ୟରେ ରାସନ ଉଠାଇବା ପାଇଁ କୌଣସି ନୂଆ କାର୍ଡ ତିଆରି କରିବା ଦରକାର ନାହିଁ।
ଦେଶରେ କୌଣସି ବି ଗରିବ ପରିବାର ଯେପରି ଭୋକିଲା ନ ଶୁଅନ୍ତି ତାହା ନିଶ୍ଚିତ କରିବା ପାଇଁ ସରକାର ଏହି ବ୍ୟବସ୍ଥା ଲାଗୁ କରିଛନ୍ତି। ସାରା ଦେଶରେ ଏହି ଡିଜିଟାଲ ବ୍ୟବସ୍ଥା ଲାଗୁ ହେବା ଫଳରେ ଖାଦ୍ୟ ସୁରକ୍ଷା କ୍ଷେତ୍ରରେ ସ୍ୱଚ୍ଛତା ଆସିବା ସହ ଦୁର୍ନୀତି ମଧ୍ୟ ବହୁ ମାତ୍ରାରେ କମିପାରିଛି ବୋଲି ସରକାରଙ୍କ ପକ୍ଷରୁ କୁହାଯାଇଛି।
Comments are closed.