ଓଡ଼ିଶାରେ ୩୧ ଦିନରେ ୫୭୧୮ ନୂଆ କରୋନା କେସ୍, ୨୨ ମୃତ

ଭୁବନେଶ୍ୱର: ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୮ ହଜାର ପାର କରିଛି । ଗତ ୨୪ ଘଣ୍ଟାରେ ସଂକ୍ରମଣ ସବୁ ରେକର୍ଡକୁ ପାର କରିଛି । ଗତ ମାର୍ଚ୍ଚ ମାସରେ ପ୍ରଥମ ପଜିଟିଭ୍ କେସ୍ ବାହାରିଥିଲା । ମାର୍ଚ୍ଚରେ ସଂକ୍ରମିତଙ୍କ ସଂଖ୍ୟା ଥିଲା ମାତ୍ର ୪ । ଏହି ପାଞ୍ଚ ମାସ ଭିତରେ ସଂଖ୍ୟା ୮ ହଜାର ୧୦୬ ଛୁଇଁଛି । ରାଜ୍ୟର କରୋନା ଗ୍ରାଫ ଦର୍ଶାଉଛି ଜୁନ୍ ମାସରେ ଅଧିକ ପଜିଟିଭ୍ ବାହାରିଛନ୍ତି ।
ଜୁନରେ ଅଧିକ ସଂକ୍ରମଣ

ଜୁନ୍ ୨ ତାରିଖରୁ ଆଜି ଭିତରେ ରାଜ୍ୟରୁ ଚିହ୍ନଟ ହୋଇଛନ୍ତି ୫ ହଜାର ୭୧୮ ନୂଆ ଆକ୍ରାନ୍ତ । ଜୁନ୍ ୨ ତାରିଖରେ ପଜିଟିଭ୍ ସଂଖ୍ୟା ଥିଲା ୨ ହଜାର ୩୮୮ । ଆକ୍ଟିଭ୍ କେସ୍ ରହିଥିଲା ୧୦୫୪ । ୭ ଜଣଙ୍କର ଜୀବନ ନେଇଥଲା କରୋନା । ଗତକାଲି ସୁଦ୍ଧା ରାଜ୍ୟେର ପଜିଟିଭ୍ କେସ୍ ୮ ହଜାର ୧୦୬ । ଅର୍ଥାତ ରାଜ୍ୟରେ ବର୍ତ୍ତମାନ ସୁଦ୍ଧା ଯେତିକି ସଂକ୍ରମିତ ତାର ୭୦ ପ୍ରତିଶତ କେବଳ ଜୁନ୍ ୨ରୁ ଆଜି ଭିତରେ ବାହାରିଛନ୍ତି । ଦୈନିକ ହାରାହାରି ସାମନାକୁ ଆସିଛି ୧୮୪ ପଜିଟିଭ୍ କେସ୍ ।
ଜୁନ୍ ମାସରେ ୧୮ ମୃତ

ସେହିପରି ଜୁନ ଦୁଇ ତାରିଖରୁ ଆଜି ଭିତରେ ଅଧିକ ଲୋକଙ୍କ ଜୀବନ ବି ନେଇଛି ପ୍ରାଣଘାତୀ ଭାଇରସ୍ । ରାଜ୍ୟରେ ମୋଟ୍ କରୋନା ମୃତ୍ୟ ସଂଖ୍ୟା ୨୯ । କେବଳ ଜୁନ୍ ମାସରେ ୧୮ ଜଣଙ୍କର ମୁଣ୍ଡ ନେଇଥିଲା କରୋନା । ଜୁଲାଇରେ ଆଜି ସୁଦ୍ଧା ୪ ଜଣ ପ୍ରାଣ ହରାଇଛନ୍ତି । ଗତ ୩୧ ଦିନ ଭିତରେ ୨୨ ଜଣ ମୃତ୍ୟବରଣ କଲେଣି । ମୃତକଙ୍କ ଭିତରେ ଗଞ୍ଜାମରୁ ୧୭, ଖୋର୍ଦ୍ଧାରୁ ୫, କଟକ ୪ ଜଣ ଥିବା ବେଳେ ଅନୁଗୁଳ, ବରଗଡ଼ ଓ ପୁରୀ ଜିଲ୍ଲାରୁ ଜଣେ ଲେଖାଏ କରୋନା ରୋଗୀଙ୍କ ଜୀବନ ଯାଇଛି ।
ଚିନ୍ତା ବଢ଼ାଇଛନ୍ତି ୫ ଜିଲା

ରାଜ୍ୟରେ ଯେତିକି କରୋନା ସଂକ୍ରମିତ ତାର ଅଧାରୁ ଅଧିକ କେବଳ ୫ ଜିଲ୍ଲାରୁ ଅଛନ୍ତି । ଏହି ଜିଲ୍ଲାଗୁଡ଼ିକ ହେଲା ଗଞ୍ଜାମ(୧୮୫୦), ଖୋର୍ଦ୍ଧା(୮୯୪), କଟକ(୭୦୨), ଯାଜପୁର(୫୪୦) ଓ ଗଜପତି(୪୪୨)। ଏସବୁ ଜିଲ୍ଲାର ମୋଟ୍ ସଂକ୍ରମିତଙ୍କ ସଂଖ୍ୟା ୪ ହଜାର ୪୨୮ । ଅର୍ଥାତ ମୋଟ୍ ପଜିଟିଭ କେସର ୫୪ ପ୍ରତିଶତ । ସେହିପରି କରୋନା ଆକ୍ଟିଭ୍ କେସ ତାଲିକାରେ ବି ଟପ୍ ପୋଜିସନରେ ଅଛନ୍ତି ଏହି ପାଞ୍ଚ ଜିଲ୍ଲା । ଗଞ୍ଜାମ, ଗଜପତି, ଖୋର୍ଦ୍ଧା, ଯାଜପୁର ଓ କଟକରେ ମୋଟ୍ ୧୫ ଶହ ୫୬ଟି ଆକ୍ଟିଭ୍ କେସ୍ ରହିଛି । ରଜ୍ୟର ଆକ୍ଟିଭ୍ କେସର ୬୦ ପ୍ରତିଶତ କେବଳ ୫ ଜିଲ୍ଲାର ଅଛନ୍ତି ।