କେନ୍ଦ୍ରକୁ ରାଜ୍ୟର ଚିଠି: ଘରୋଇ ହସ୍ପିଟାଲକୁ ୨୫% ନୁହେଁ, ୫% ଟିକା ଦିଅ

ଭୁବନେଶ୍ୱର: ଆସନ୍ତା ୨୧ ତାରିଖରୁ ସବୁ ରାଜ୍ୟକୁ ସବୁ ବର୍ଗର ଲୋକଙ୍କ ପାଇଁ ମାଗଣା ଟିକା ଯୋଗାଇବେ କେନ୍ଦ୍ର ସରକାର । ଏନେଇ ନୂଆ ଗାଇଡଲାଇନ୍ ଜାରି ହୋଇଛି । ଏଥିରେ ଟିକା କମ୍ପାନୀ ମାସିକ ଉତ୍ପାଦନ କରୁଥିବା ଟିକାର ୨୫ ପ୍ରତିଶତ ଘରୋଇ ହସ୍ପିଟାଲ ଓ ୭୫ ପ୍ରତିଶତ ଟିକା ରାଜ୍ୟ ସରକାର ପାଇବେ । କେନ୍ଦ୍ର ସରକାରଙ୍କ ନିୟମ ଅନୁସାରେ ଘରୋଇ ହସ୍ପିଟାଲକୁ ୨୫ ପ୍ରତିଶତ ଟିକା ଯୋଗାଇ ଦେଲେ ଓଡ଼ିଶା ଟିକା ଅଭାବର ସମ୍ମୁଖୀନ ହେବ । ଏନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି ରାଜ୍ୟ ସ୍ୱାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ ମହାପାତ୍ର ।

ସେ ଚିଠିରେ ଉଲ୍ଲେଖ କରିଛନ୍ତି, ସ୍ୱାସ୍ଥ୍ୟସେବା କ୍ଷେତ୍ରରେ ଓଡ଼ିଶାରେ ଘରୋଇ ସଂସ୍ଥାର ପରିମାଣ ମାତ୍ର ୫ ପ୍ରତିଶତ । ସେହିପରି କେବଳ ୪ଟି ଡାକ୍ତରଖାନା ଟିକା ଉତ୍ପାଦନକାରୀ କମ୍ପାନୀଠାରୁ ସିଧାସଳଖ କୋଭିଡ୍ ଟିକା ପାଇବାକୁ ସକ୍ଷମ । ନୂଆ ନିୟମ ଅନୁସାରେ ଘରୋଇ ସଂସ୍ଥାକୁ ୨୫ ପ୍ରତିଶତ ଟିକା ଦିଆଗଲେ ସରକାର ଅନୁଷ୍ଠାନରେ ଟିକାର ଅଭାବ ଦେଖାଦେବ । ତେଣୁ ଘରୋଇ ସଂସ୍ଥାକୁ ୫ ପ୍ରତିଶତ ଟିକା ଦେବା ଆବଶ୍ୟକ । ଏଦିଗରେ ତୁରନ୍ତ ବିଚାର କରି ସଂଶୋଧିତ ନିର୍ଦ୍ଦେଶନାମା ଜାରି କରିବା ପାଇଁ ଚିଠିରେ ଉଲ୍ଲେଖ କରିଛନ୍ତି ପ୍ରଦୀପ୍ତ ମହାପାତ୍ର ।