ବାରିପଦା: ମୟୂରଭଞ୍ଜ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା (ଡିଆରଡିଏ) ଦ୍ୱାରା ପରିଚାଳିତ ଜିଲ୍ଲା ଖଣିଜ ଫାଉଣ୍ଡେସନ (ଡିଏମଏଫ) ପାଣ୍ଠିରୁ ମୋଟ ୯ କୋଟିରୁ ଅଧିକ ଟଙ୍କାର ଅନଧିକୃତ କାରବାର ହୋଇଥିବା ଅଭିଯୋଗ ହୋଇଛି। ପର୍ଯ୍ୟାୟକ୍ରମେ ବିଭିନ୍ନ କମ୍ପାନିର ଆକାଉଣ୍ଟକୁ ଏହି ପାଣ୍ଠି ଟ୍ରାନ୍ସଫର ହୋଇଥିବା ଜଣାପଡ଼ିଛି।
ବ୍ୟାଙ୍କ ଅଫ୍ ଇଣ୍ଡିଆର ବାରିପଦା ଶାଖାର ମୁଖ୍ୟ ପରିଚାଳକ ସଂଯୁକ୍ତା କାନୁନଗୋ ଭଞ୍ଜପୁର ଥାନାରେ ଅଭିଯୋଗ କରି କହିଛନ୍ତି ଯେ ଏପ୍ରିଲ ୧୦ରୁ ୧୮ ତାରିଖ ମଧ୍ୟରେ ପିଟି କନଷ୍ଟ୍ରକ୍ସନ ଆଣ୍ଡ ସପ୍ଲାୟର୍ସ ଏବଂ ଏସକେ ଏଣ୍ଟରପ୍ରାଇଜେସ୍ ଭଳି କମ୍ପାନୀକୁ ୯ କୋଟି ୫୬ ଲକ୍ଷ ୭୬ ହଜାର ଟଙ୍କା ଟ୍ରାନ୍ସଫର କରିବା ପାଇଁ ୪ଟି ଚେକ୍ ବ୍ୟବହାର କରାଯାଇଥିଲା। ଚେକ୍ ପ୍ରଦାନ ଓ ନଗଦ କରିଥିବା ବ୍ୟକ୍ତିଙ୍କ ପରିଚୟ ମିଳିପାରିନାହିଁ।
ଏହି କାରବାରର ସନ୍ଦେହଜନକ ପ୍ରକୃତି ଦେଖି ଭଞ୍ଜପୁର ପୁଲିସ ଆଇପିସି ଦଫା ୪୨୦, ୪୬୮ ଓ ୪୭୧ ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ପୁଲିସର ଏକ ଟିମ୍ ବ୍ୟାଙ୍କ ପରିଦର୍ଶନ କରିଥିଲେ ମଧ୍ୟ ପୁଲିସ ପକ୍ଷରୁ କୌଣସି ଆନୁଷ୍ଠାନିକ ବୟାନ ଦିଆଯାଇନାହିଁ।
ଅଭିଯୋଗକୁ ଖଣ୍ଡନ କରି ଡିଆରଡିଏ ମୟୂରଭଞ୍ଜର ପ୍ରକଳ୍ପ ନିର୍ଦ୍ଦେଶକ ରଞ୍ଜନ କୁମାର ସ୍ୱାଇଁ କହିଛନ୍ତି ଯେ ସେମାନଙ୍କ କାର୍ଯ୍ୟାଳୟ ପକ୍ଷରୁ କୌଣସି ଚେକ୍ ପ୍ରଦାନ କରାଯାଇ ନାହିଁ କି ନାମିତ କମ୍ପାନୀମାନଙ୍କ ସହ କୌଣସି ଆର୍ଥିକ କାରବାର ହୋଇନାହିଁ। ଏହି ମାମଲାର ଅଧିକ ତଦନ୍ତ ପାଇଁ ଓଡ଼ିଶା କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ)କୁ ପଠାଯାଇଛି।