ଦଳିତଙ୍କ ଉପରେ ଅତ୍ୟାଚାର ନେଇ ବ୍ୟଥିତ, ଇସ୍ତଫା ଦେଲେ ବିଧାୟକ ପାନାଚାନ୍ଦ

ଜୟପୁର: ରାଜସ୍ଥାନର ବରିଷ୍ଠ କଂଗ୍ରେସ ବିଧାୟକ ପାନାଚନ୍ଦ ମେଘୱାଲ ଦଳିତ ଯୁବକଙ୍କ ମୃତ୍ୟୁରେ ବ୍ୟଥୀତ ହୋଇ ତାଙ୍କ ଇସ୍ତଫା ପତ୍ର ମୁଖ୍ୟମନ୍ତ୍ରୀ ଅଶୋକ ଗେହଲେଟଙ୍କ ନିକଟକୁ ପଠାଇଛନ୍ତି । ଦେଶ ସ୍ୱାଧୀନ ହେବା ୭୫ ବର୍ଷ ବିତି ଯାଇଥିଲେ ମଧ୍ୟ ଏବେ ବି ଦଳିତଙ୍କ ପ୍ରତି ଅତ୍ୟାଚାର କମୁ ନାହିଁ । ଏହା ମୋ ମନକୁ ଆଘାତ ଦେଇଛି । ସମାଜ ରକ୍ଷା ପାଇଁ ସେମାନଙ୍କୁ ନ୍ୟାୟ ଦେବାରେ ବିଫଳ ହୋଇଥିବା ଯୋଗୁ ମୋର ପଦରେ ରହିବା ଅଧିକାର ନାହିଁ ବୋଲି ସେ କହିଛନ୍ତି । ସୂଚନାଯୋଗ୍ୟ, ସୁରାଣା ଗ୍ରାମର ଏକ ସ୍କୁଲରେ ଜଣେ ଦଳିତ ଛାତ୍ର ଇନ୍ଦ୍ର ମେଘୱାଲ ଏକ ପାଣି ମାଠିଆକୁ ଛୁଇଁ ଦେବା ଯୋଗୁ ତାଙ୍କୁ ଶିକ୍ଷକ ଛୈଲ ସିଂ ପ୍ରଚୁର ମାଡ ମାରିଥିଲେ । ଏଥିରେ ତାଙ୍କ କାନ ଫାଟିଯିବାରୁ ସେ ମୃତ୍ୟୁବରଣ କରିଥିଲେ । ଏହି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯିବା ସହ ରାଜସ୍ଥାନରେ ଉତେଜନା ପରିସ୍ଥିତି ସୃଷ୍ଟି ହୋଇଛି । ଜାଲୌର ଜିଲାର ଏହି ଘଟଣା ସାରା ଦେଶକୁ ବ୍ୟଥୀତ କରିଛି । ସମ୍ପୃକ୍ତ ଜିଲାରେ ଏବେ ଆଇନ ବ୍ୟବସ୍ଥା କଡା କରାଯାଇଛି । ସୋମବାର ଭୀମ ଆର୍ମି ପକ୍ଷରୁ ଏଠାରେ ଆନ୍ଦୋଳନ କରାଯାଇଥିଲା ।