ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲା: ପାଟନା ଏସପିଙ୍କୁ କ୍ୱାରେଣ୍ଟାଇନରେ ରଖିଲା ବିଏମସି

ମୁମ୍ୱାଇ: ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାରେ ମୁହାଁମୁହିଁ ପରିସ୍ଥିତିକୁ ଆସିଛନ୍ତି ମୁମ୍ବାଇ ଓ ବିହାର ପୋଲିସ । ତଦନ୍ତ ପାଇଁ ମୁମ୍ୱାଇରେ ପହଞ୍ଚିଥିବା ପାଟନା ସିଟି ଏସପି ବିନୟ ତିଓ୍ୱାରୀଙ୍କୁ କ୍ୱାରେଣ୍ଟାଇନରେ ରଖି ଦେଇଛନ୍ତି ବିଏମସି ଅଧିକାରୀ । ଏହାକୁ ନେଇ ଦୁଇ ରାଜ୍ୟର ପୋଲିସ ଭିତରେ ଚାଲିଥିବା ତିକ୍ତତାର ନୂଆ ଏପିସୋଡ ସାମନାକୁ ଆସିଛି ।

ଗତକାଲି ରାତିରେ ବିନୟ ତିଓ୍ୱାରୀ ମୁମ୍ୱାଇରେ ପହଞ୍ଚିଥିଲେ । ବିଳମ୍ବିତ ରାତିରେ ଟ୍ୱିଟ୍ କରି ଏହି ସୂଚନା ଦେଇଥିଲେ ବିହାର ପୋଲିସ ଡିଜି ଗୁପ୍ତେଶ୍ୱର ପାଣ୍ଡେ । ବିନୟ ତିଓ୍ୱାରୀଙ୍କ ହାତରେ ଲାଗିଥିବା କ୍ୱାରେଣ୍ଟିନ୍ ଚିହ୍ନକୁ ସେୟାର କରିଥିଲେ । ବିନୟଙ୍କୁ ଅଗଷ୍ଟ ୧୫ ଯାଏଁ କ୍ୱାରେଣ୍ଟାଇନରେ ରହିବାକୁ ପଡ଼ିବ । ଏପରିକି ତାଙ୍କୁ ଆଇପିଏସ୍ ମେସରେ ରହିବା ପାଇଁ ସୁବିଧା ଦିଆଗଲା ନାହିଁ ।

IPS officer Binay Tiwari reached Mumbai today from patna on official duty to lead the police team there but he has been forcibly quarantined by BMC officials at 11pm today.He was not provided accommodation in the IPSMess despite request and was staying in a guest house in Goregaw pic.twitter.com/JUPFRpqiGE

— IPS Gupteshwar Pandey (@ips_gupteshwar) August 2, 2020

ସୁଶାନ୍ତ ସିଂହ ରାଜପୁତ ମାମଲାରେ ମୁମ୍ୱାଇରେ ଡେରା ପକାଇଛି ବିହାର ପୋଲିସ । ତଦନ୍ତକାରୀ ଅଫିସ ଭାବରେ ଯାଇଛନ୍ତି ବିନୟ ତିଓ୍ୱାରୀ । ବିହାର ପୋଲିସ ପୂର୍ବରୁ କହି ଆସୁଛି ତଦନ୍ତରେ ସହଯୋଗ କରୁନି ମୁମ୍ୱାଇ ପୋଲିସ । ଏବେ ବିନୟଙ୍କୁ ବିଏମସି ଅଧିକାରୀ କ୍ୱାରେଣ୍ଟାଇନ୍ କରିବା ଘଟଣାକୁ ନୂଆ ମୋଡ଼ ଦେଇଛି ।