ନୂଆଦିଲ୍ଲୀ: ସାଧାରଣ ଜନତାଙ୍କ ଉପରେ ପୁଣି ଏକ ମହଙ୍ଗା ମାଡ଼ ପଡ଼ିବାକୁ ଯାଉଛି। ଗୋଟିଏ ପଟେ ଦେଶରେ ପେଟ୍ରୋଲ ଏବଂ ଡିଜେଲ ଦର ଲିଟର ପିଛା ୩ ଟଙ୍କା ବୃଦ୍ଧି ପାଇ ସାଧାରଣ ଖାଉଟିଙ୍କ ପକେଟ୍ ଢିଲା କରିଥିବା ବେଳେ, ଏବେ ଆଉ ଏକ ଖରାପ ଖବର ସାମ୍ନାକୁ ଆସିଛି। ପେଟ୍ରୋଲ ଓ ଡିଜେଲର ଏହି ବର୍ଦ୍ଧିତ ଦରର ସିଧାସଳଖ ପ୍ରଭାବ ଆପଣଙ୍କ ମୋବାଇଲ୍ ବିଲ୍ ଉପରେ ପଡ଼ିବାକୁ ଯାଉଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ରିଲାଏନ୍ସ ଜିଓ (Jio), ଏୟାରଟେଲ (Airtel) ଏବଂ ଭୋଡାଫୋନ୍-ଆଇଡିଆ (Vi) ଭଳି ପ୍ରମୁଖ ଟେଲିକମ୍ କମ୍ପାନୀଗୁଡ଼ିକ ଖୁବଶୀଘ୍ର ସେମାନଙ୍କର ରିଚାର୍ଜ ପ୍ଲାନ୍କୁ ୧୫ ପ୍ରତିଶତ ପର୍ଯ୍ୟନ୍ତ ମହଙ୍ଗା କରିବାର ପ୍ରବଳ ସମ୍ଭାବନା ରହିଛି।
ଆପଣଙ୍କ ମନରେ ନିଶ୍ଚୟ ଏହି ପ୍ରଶ୍ନ ଉଠୁଥିବ ଯେ ପେଟ୍ରୋଲ-ଡିଜେଲ ଦର ସହିତ ମୋବାଇଲ୍ ରିଚାର୍ଜର ସମ୍ପର୍କ କ’ଣ? ପ୍ରକୃତରେ ଗୋଟିଏ ମୋବାଇଲ୍ ଟାୱାର ପରିଚାଳନା କରିବା ପାଇଁ ଯେତିକି ଅର୍ଥ ଖର୍ଚ୍ଚ ହୋଇଥାଏ, ତାର ପ୍ରାୟ ୪୦ ପ୍ରତିଶତ କେବଳ ଇନ୍ଧନ (ଡିଜେଲ) ଏବଂ ବିଦ୍ୟୁତ୍ ବାବଦକୁ ଯାଇଥାଏ। ନେଟୱର୍କକୁ ଦିନରାତି ନିରବଚ୍ଛିନ୍ନ ରଖିବା ପାଇଁ ଟାୱାରଗୁଡ଼ିକରେ ବଡ଼ ବଡ଼ ଜେନେରେଟର ଲାଗିଥାଏ, ଯାହା ଡିଜେଲରେ ହିଁ ଚାଲେ। ତେଣୁ ଡିଜେଲ ଦରରେ ଲିଟର ପିଛା ହଠାତ୍ ୩ ଟଙ୍କା ବୃଦ୍ଧି ହେବା ଦ୍ୱାରା, ସମଗ୍ର ଦେଶରେ ବିଶାଳ ନେଟୱର୍କ ଅପରେଟ୍ କରୁଥିବା ଟେଲିକମ୍ କମ୍ପାନୀଗୁଡ଼ିକୁ ବାର୍ଷିକ ଶହ ଶହ କୋଟି ଟଙ୍କାର ଅତିରିକ୍ତ ଖର୍ଚ୍ଚ ବହନ କରିବାକୁ ପଡ଼ିବ। ନିଜର ଏହି କ୍ଷତି ଭରଣା କରିବାକୁ ଯାଇ କମ୍ପାନୀମାନେ ଶେଷରେ ଗ୍ରାହକଙ୍କ ମୁଣ୍ଡରେ ହିଁ ହାତ ମାରିବେ ବୋଲି ଚର୍ଚ୍ଚା ହେଉଛି।
ବିଶେଷଜ୍ଞଙ୍କ ମତରେ ୪ଜି ତୁଳନାରେ ୫ଜି ନେଟୱର୍କ ପରିଚାଳନା ପାଇଁ ଅଧିକ ଶକ୍ତି ଏବଂ ବିଦ୍ୟୁତ୍ ଆବଶ୍ୟକ ହୋଇଥାଏ। ତେଣୁ ୫ଜି ଟାୱାରଗୁଡ଼ିକର ରକ୍ଷଣାବେକ୍ଷଣ ବାବଦକୁ ଟେଲିକମ୍ କମ୍ପାନୀଗୁଡ଼ିକର ବଜେଟ୍ ଏବେ ଆକାଶଛୁଆଁ ହୋଇଯାଇଛି। କେବଳ ସେତିକି ନୁହେଁ, ଗ୍ଲୋବାଲ ସପ୍ଲାଏ ଚେନ୍ ରେ ଦେଖାଦେଇଥିବା ସମସ୍ୟା କାରଣରୁ ବାହାରୁ ଆସୁଥିବା ଟେଲିକମ୍ ଉପକରଣଗୁଡ଼ିକର ଦାମ୍ ମଧ୍ୟ ଢେର୍ ବୃଦ୍ଧି ପାଇଛି।
ଟେଲିକମ୍ ଶିଳ୍ପ ସହ ଜଡ଼ିତ ସୂତ୍ରରୁ ଜଣାପଡ଼ିଛି ଯେ, ନିଜର ଏଭରେଜ୍ ରେଭିନ୍ୟୁ ପର ୟୁଜର ବା ମୁଣ୍ଡପିଛା ଆୟ ବଢ଼ାଇବା ପାଇଁ କମ୍ପାନୀଗୁଡ଼ିକ ବହୁ ପୂର୍ବରୁ ହିଁ ଟାରିଫ୍ ବୃଦ୍ଧି କରିବାକୁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରିସାରିଥିଲେ। କିନ୍ତୁ ଏବେ ଇନ୍ଧନ ଦର ବୃଦ୍ଧି ନିଆଁରେ ଘିଅ ଢାଳିବା ଭଳି କାମ କରିଛି। ଯେଉଁ ଦର ବୃଦ୍ଧି ଆଉ କିଛି ମାସ ପରେ ହେବାର ଥିଲା, ତାହା ବର୍ତ୍ତମାନ ଆସନ୍ତା ଜୁନ୍ ମାସରେ ହିଁ କାର୍ଯ୍ୟକାରୀ ହୋଇପାରେ ବୋଲି ବଜାର ବିଶେଷଜ୍ଞମାନେ ଆକଳନ କରୁଛନ୍ତି।
ସମସ୍ତ ସ୍ଥିତିକୁ ଦୃଷ୍ଟିରେ ରଖିଲେ ଏକଥା ସ୍ପଷ୍ଟ ଯେ ଆଗକୁ ମୋବାଇଲ୍ ଚଲାଇବା ମହଙ୍ଗା ହେବ। ତେଣୁ ଯଦି ଆପଣଙ୍କର ବର୍ତ୍ତମାନର ରିଚାର୍ଜ ପ୍ଲାନ୍ ସରିବାକୁ ବସିଲାଣି, ତେବେ ନୂଆ ଦାମ୍ ଲାଗୁ ହେବା ପୂର୍ବରୁ ଗୋଟିଏ ଦୀର୍ଘମିଆଦି ବା ବାର୍ଷିକ ପ୍ଲାନ୍ ରିଚାର୍ଜ କରିନେବା ଏବେ ବୁଦ୍ଧିମାନର କାମ ହେବ।
