ଭୁବନେଶ୍ୱର: ବାତ୍ୟା ‘ବୁଲବୁଲ୍’ ପ୍ରଭାବରେ ଉପକୂଳବର୍ତ୍ତୀ ଓଡ଼ିଶାର ପ୍ରାୟ ସମସ୍ତ ଜିଲ୍ଲା କ୍ଷତିଗ୍ରସ୍ତ ହୋଇଛି । ଏହି ବାତ୍ୟା ରାଜ୍ୟର ବାଲେଶ୍ୱର, ଭଦ୍ରକ, ଜଗତସିଂହପୁର, କେନ୍ଦ୍ରାପଡ଼ା, କଟକ, ପୁରୀ ଏବଂ ଯାଜପୁର ଜିଲ୍ଲାରେ ଅଧିକ ପ୍ରଭାବିତ ହୋଇଛି ।
ତେବେ ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର ଓ ବାଲେଶ୍ୱର ଜିଲ୍ଲାରେ କ୍ଷୟକ୍ଷତିର’ ପରିମାଣ ଅଧିକ ।
ସମୁଦ୍ର ଉପକୂଳବର୍ତ୍ତୀ ଭଦ୍ରକ ଜିଲ୍ଲାର ଧାମରା, ଚାନ୍ଦବାଲି, ବାସୁଦେବପୁର, ଚୂଡ଼ାମଣି, ଚନ୍ଦନୀପାଳ, କଶିଆ ଆଦି ଅଞ୍ଚଳରେ ପ୍ରାୟ ୮୦ରୁ ୯୦ କିଲୋମିଟର ବେଗରେ ପବନ ବହିବା ଯୋଗୁଁ ହଜାର ହଜାର ସଂଖ୍ୟାରେ ଗଛ ଉପୁଡ଼ି ପଡ଼ିବା ସହିତ ଭାଙ୍ଗିଯାଇଛି ।
ଏବେ ଶହ ଶହ ଗ୍ରାମରେ ବିଦ୍ୟୁତ ସରବରାହ ବିଚ୍ଛିନ୍ନ ହୋଇ ପଡ଼ିଛି ।
ଏହି ଜିଲ୍ଲାର ବିଭିନ୍ନ ଆଶ୍ରୟସ୍ଥଳୀରେ ସରକାରଙ୍କ ପ୍ରକ୍ଷରୁ ସ୍ଥାନୀୟ ଜିଲ୍ଲା ପ୍ରଶାସନ ତରଫରୁ ରନ୍ଧାଖାଦ୍ୟ ଦିଆଯିବା ସହିତ ବାତ୍ୟା ପ୍ରପୀଡ଼ିତମାନଙ୍କୁ ଅତି ଆବଶ୍ୟକୀୟ ରିଲିଫ୍ ସାମଗ୍ରୀ ଯୋଗାଇ ଦିଆଯାଇଛି ।
ସେହିପରି ଭାବେ ବାଲେଶ୍ୱର ଜିଲ୍ଲାର ଭୋଗରାଇ, ବାଲିଆପାଳ, ଜଳେଶ୍ୱର, ରେମୁଣା, ବାହାନଗା, ବସ୍ତା, ନୀଳଗିରି ଏବଂ ଔପଦା ଅଞ୍ଚଳରେ ବାତ୍ୟା ବୁଲବୁଲ ଯୋଗୁଁ ଅନେକ ଘର ଭାଙ୍ଗିଯିବା ସହିିିତ ବଡ଼ ବଡ଼ ଗଛ ଏବଂ ବିଦ୍ୟୁତ ଖୁଣ୍ଟ ମଧ୍ୟ ଉପୁଡ଼ି ପଡ଼ିଛି ।
କେନ୍ଦ୍ରାପଡ଼ା ଜିଲ୍ଲାର ରାଜନଗର ବ୍ଲକରେ ବାତ୍ୟା ବୁଲବୁଲ୍ ତାଣ୍ଡବଲୀଳା ରଚିଛି । 
ଏହି ବ୍ଲକର ୨୯ଟି ପଞ୍ଚାୟତରେ ବ୍ୟାପକ କ୍ଷତିଗ୍ରସ୍ତ ହୋଇଥିବା ସୂଚନା ହସ୍ତଗତ ହୋଇଛି ।
ଜିଲ୍ଲାର ରାଜକନିକା ବ୍ଲକରେ ମଧ୍ୟ ଅନେକ କ୍ଷୟକ୍ଷତି ଘଟିଛି । ରାଜନଗର ଏବଂ ରାଜକନିକା ବ୍ୟତୀତ ଜିଲ୍ଲାର ଆଳି ଓ ମହାକାଳପଡ଼ା ବ୍ଲକର ଉପକୂଳବର୍ତ୍ତୀ ଅଞ୍ଚଳରେ ଅନେକ କ୍ଷତି ମଧ୍ୟ ଘଟିଛି ।
ବାତ୍ୟା ବୁଲବୁଲର ପ୍ରଭାବରେ ଜଗତସିଂପୁର ଜିଲ୍ଲା ମଧ୍ୟ ବାଦ ଯାଇନାହିଁ ।
ପାରାଦ୍ୱିପ ବନ୍ଦରାଞ୍ଚଳ ସମେତ ପାରାଦିପ ଆଖପାଖ ଅଞ୍ଚଳରେ ଅଧିକ କ୍ଷତି ପହଞ୍ଚିଛି ।
ସବୁଠାରୁ ବଡ଼କଥା ହେଲା ଏହିସବୁ ଜିଲ୍ଲାଗୁଡ଼ିକରେ ଧାନଫସଲ ଅଧିକ ମାତ୍ରାରେ ନଷ୍ଟ ହୋଇଯାଇଛି । ପବନ ବହିବା ଯୋଗୁଁ ଧାନଗଛ ଗୁଡ଼ିକ ଚାଷଜମିରେ ଶୋଇ ପଡ଼ିଛି । ଅନେକ ଚାଷଜମିରେ ପାଚିଲା ଧାନଗଛ ଗୁଡ଼ିକ ପାଣିରେ ବୁଡ଼ି ନଷ୍ଟ ହୋଇଯାଇଛି ।
Comments are closed.