ନୂଆଦିଲ୍ଲୀ: ପାକିସ୍ତାନରେ ସିନ୍ଧିଙ୍କ ବିରୋଧ ବଢିବାରେ ଲାଗିଛି। ବର୍ଷ ବର୍ଷ ଧରି ଅଲଗା ଦେଶର ଦାବି କରୁଥିବା ସିନ୍ଧିମାନେ ଏବେ ଖୋଲାଖୋଲି ଭାବେ ପାକିସ୍ତାନର ପଡୋଶୀ ଦେଶରୁ ସାହାଯ୍ୟ ମାଗିବା ଆରମ୍ଭ କରିଛନ୍ତି। ଆଧୁନିକ ସିନ୍ଧି ଜାତୀୟତାର ଅନ୍ୟତମ ପ୍ରତିଷ୍ଠାତା ଜିଏମ୍ ସୟଦଙ୍କ ୧୧୭ ତମ ଜନ୍ମ ବାର୍ଷିକୀରେ ଆୟୋଜିତ ଏକ ବିରାଟ ସ୍ବାଧୀନତା ସମାରୋହରେ ବିକ୍ଷୋଭକାରୀମାନେ ସିନ୍ଧର ସ୍ବାଧୀନତା ପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଅନ୍ୟ ବିଶ୍ୱ ନେତାଙ୍କ ପୋଷ୍ଟର ଧରିଥିବାର ନଜର ଆସିଥିଲେ। ଏହା ସହିତ ଲୋକମାନେ ପାକିସ୍ତାନର ସିନ୍ଧ ପ୍ରଦେଶର ଜାମସୋରୋ ଜିଲ୍ଲାର ସୟଦଙ୍କ ସହରରେ ରବିବାର ଅନୁଷ୍ଠିତ ଏହି ବିଶାଳ ରାଲିରେ ସ୍ୱାଧୀନତା ସମର୍ଥକ ସ୍ଲୋଗାନ ମଧ୍ୟ ଦେଇଥିଲେ।
ଏହି ରାଲିରେ କିଛି ଲୋକ ଦାବି କରିଛନ୍ତି ଯେ ‘ସିନ୍ଧ’ ହେଉଛି ଇଣ୍ଡସ୍ ଭ୍ୟାଲି ସଭ୍ୟତା ଏବଂ ବୈଦିକ ଧର୍ମ, ଯାହା ବ୍ରିଟିଶ ସାମ୍ରାଜ୍ୟ ଦ୍ବାରା ବେଆଇନ ଭାବେ କାବୁ ହୋଇ ୧୯୪୭ ମସିହାରେ ପାକିସ୍ତାନର ଇସଲାମ ହାତରେ ହସ୍ତାନ୍ତର କରାଯାଇଥିଲା।