ପୁଣି ଖଟିଆରେ ବୁହା ହେଲେ ଗର୍ଭବତୀ

ଭବାନୀପାଟଣା: ଦୁର୍ଗମ ଅଞ୍ଚଳରେ ପୁଣି ଜନନୀ ଯନ୍ତ୍ରଣା । ରାସ୍ତା ନଥିବାରୁ ଖଟିଆରେ ବୁହା ହେଲେ ଗର୍ଭବତୀ । ଘଟଣା ଘଟିଛି କଳାହାଣ୍ଡି ଥୁଆମୂଳ ରାମପୁର ପଡାପଦର ପଞ୍ଚାୟତ ଭିତରଡୁଙ୍ଗାରେ । ପାହାଡ ଜଙ୍ଗଲ ଅଞ୍ଚଳ ହୋଇଥିବା ବେଳେ ବେଳେ ଗମନା ଗମନର କୌଣସି ସବୁିଧା ନାହିଁ । ଏମିତି ଅଣ ଓସାରିଆ ଖାଲଢିପ ଦେଇ ଲୋକମାନେ ଯିବାଆସିବା କରୁଛନ୍ତି । ଗାଡିଟିଏ ଯିବାର ବି ସୁବିଧା ନାହିଁ । ଏନେଇ ଗର୍ଭବତୀ ଜଣଙ୍କୁ ଖଟିଆରେ ବୁହା ହୋଇନିଆଯାଇଥିଲା । ପ୍ରାୟ ଦେଢ କିଲୋମିଟର ପର୍ଯ୍ୟନ୍ତ ଖଟିଆରେ ବୁହାଯିବା ପରେ ବୋଟ ଆମ୍ବୁଲାନ୍ସ ଯୋଗେ ମହିଳା ଜଣଙ୍କୁ ପୋଡାଗଡ ଘାଟକୁ ଅଣାଯାଇଥିଲା । ସେଠାରୁ ତାଙ୍କୁ ଅଣାଯାଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଂଚାଯାଇଥିଲା ।
ଏହା ପୂର୍ବରୁ ମଧ୍ୟ ବହୁବାର ଏହିଭଳି ଘଟଣା ଘଟି ଚାଲିଛି । ହେଲେ ନା ରାସ୍ତା ପ୍ରତି ନା ମମତା ଯୋଜନା ପ୍ରତି କାହାର ନିଘା ନାହିଁ । ବିଭିନ୍ନ ସମସ୍ୟା ଭିତରେ ଜୀବନ ଜୀଉଁଛନ୍ତି ଗରିବ ଆଦିବାସୀ ।
ଗାଁ ଗୁଡିକରେ ବିଭିନ୍ନ ମୌଳିକ ସମସ୍ୟା ଦୂର କରିବାକୁ ବହୁ ଯୋଜନା କରାଯାଉଛି । ତା ସହିତ ମହିଳା ଓ ଶିଶୁ ମାନଙ୍କ ପାଇଁ ମଧ୍ୟ ଯୋଜନା ପରେ ଯୋଜନା କରାଯାଉଛି । ହେଲେ ଏହି ଯୋଜନା ସବୁ ସଠିକ୍ ସ୍ଥାନରେ ଲାଗି ପାରୁନି । ଏବେ ବି ଅବହେଳିତ ହୋଇପଡିଛି ଗାଁ ଆଉ ଅବହେଳତି ମହିଳା ଓ ଶିଶୁ । ସମସ୍ୟା ନେଇ ବହୁବାର ଜଣାଯାଇଛି । ହେଲେ ଏଯାଏଁ ଅଧିକାରୀଙ୍କ ପାଦ ପଡିନି କି କୌଣସି ସମସ୍ୟାର ସମାଧାନ ହୋଇପାରିନି ।