ଜୟପୁର: ରାଜସ୍ଥାନରେ ଏକ ନିର୍ବାଚନୀ ରାଲିରେ କଂଗ୍ରେସ ନେତା ରାହୁଲ ଗାନ୍ଧୀ ଦାରିଦ୍ର୍ୟ ଦୂରୀକରଣ ନେଇ ନାରା ଦେଇଛନ୍ତି। କେନ୍ଦ୍ରରେ ତାଙ୍କ ଦଳ କ୍ଷମତାକୁ ଆସିଲେ ଦାରିଦ୍ର୍ୟ ଦୂରୀକରଣ ଦିଗରେ ତ୍ୱରିତ ପଦକ୍ଷେପ ନିଆଯିବ ବୋଲି ସେ ଦାବି କରିଛନ୍ତି। ଦେଶର ପ୍ରତ୍ୟେକ ଗରିବ ପରିବାରର ଜଣେ ମହିଳାଙ୍କ ବ୍ୟାଙ୍କ ଆକାଉଣ୍ଟକୁ ବାର୍ଷିକ ୧ ଲକ୍ଷ ଟଙ୍କା ଟ୍ରାନ୍ସଫର କରିବା ଲକ୍ଷ୍ୟନେଇ କଂଗ୍ରେସ ପକ୍ଷରୁ ମହାଲକ୍ଷ୍ମୀ ଯୋଜନା ଘୋଷଣା କରାଯାଇଛି। ସଂଘର୍ଷ କରୁଥିବା ପରିବାରଗୁଡ଼ିକୁ ସ୍ଥିରତା ଏବଂ ରିଲିଫ୍ ପ୍ରଦାନ କରିବା ପାଇଁ ଏହି ଆର୍ଥିକ ସହାୟତା ଉଦ୍ଦିଷ୍ଟ ହେବ ବୋଲି ସେ ଦାବି କରିଛନ୍ତି। ଉଲ୍ଲେଖଯୋଗ୍ୟ, ଏବେର ସରକାରର ମୁଖିଆ ତଥା ପ୍ରଧାନମନ୍ତ୍ରୀ ଗରିବା ହଟାଓ ନାରା ଦେଇ କ୍ଷମତାକୁ ଆସିଥିଲେ।
ଶାସକ ଭାରତୀୟ ଜନତା ପାର୍ଟି (ବିଜେପି)କୁ ମଧ୍ୟ ବିଭିନ୍ନ ମୋର୍ଚ୍ଚାରେ ସମାଲୋଚନା କରିଛନ୍ତି ରାହୁଲ । ସର୍ବନିମ୍ନ ସହାୟକ ମୂଲ୍ୟ (ଏମ୍ଏସପି) ପାଇଁ କୃଷକଙ୍କ ଦାବି, ଯୁବ ବେକାରୀ ଏବଂ ବୃଦ୍ଧି ପାଉଥିବା ମୁଦ୍ରାସ୍ଫୀତି ଉପରେ ସେ ଆଲୋକପାତ କରିଛନ୍ତି। ବିଶେଷ କରି ପଛୁଆ ବର୍ଗ, କୃଷକ ଓ ଗରିବଙ୍କୁ ପ୍ରଭାବିତ କରୁଥିବା ଏହି ଗୁରୁତ୍ୱପୂର୍ଣ୍ଣ ପ୍ରସଙ୍ଗରୁ ବିଜେପି ଧ୍ୟାନ ହଟାଉଛି ବୋଲି ସେ ଦାବି କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୃଷକଙ୍କ ଦୁର୍ଦ୍ଦଶାକୁ ଅଣଦେଖା କରୁଛନ୍ତି ବୋଲି ରାହୁଲ ଅଭିଯୋଗ କରିବା ସହ ସରକାରଙ୍କୁ ଦୁର୍ନୀତିଗ୍ରସ୍ତ ବୋଲି କହିଛନ୍ତି।
ଦୁର୍ନୀତି ବିଷୟରେ ରାହୁଲ ଗାନ୍ଧୀ କହିଛନ୍ତି ଯେ ମୋଦୀ ସରକାରର ଗତ ୫ ବର୍ଷ ମଧ୍ୟରେ ଦୁର୍ନୀତି ବୃଦ୍ଧି ପାଇଛି। ଏକ ସର୍ବେକ୍ଷଣରୁ ଜଣାପଡିଛି ଯେ ୫୫% ଲୋକ ବିଶ୍ୱାସ କରନ୍ତି ଯେ ଦୁର୍ନୀତି ଦ୍ରୁତ ଗତିରେ ବୃଦ୍ଧି ପାଇଛି ଏବଂ ୨୫% ଏହାକୁ ସିଧାସଳଖ ମୋଦୀ ସରକାରକୁ ଦାୟୀ କରିଛନ୍ତି ବୋଲି ସେ କହିଛନ୍ତି।
ଇଲେକ୍ଟୋରାଲ ବଣ୍ଡ, ପିଏମ୍ କେୟାର୍ସ ପାଣ୍ଠି ଏବଂ ଆଦାନୀ ମେଗା ଦୁର୍ନୀତି ଭଳି ଦୁର୍ନୀତି ବିଷୟରେ ରାହୁଲ ବିଶେଷ ଭାବେ ଉଲ୍ଲେଖ କରିଛନ୍ତି।
Comments are closed.