କୋହଲି ଫର୍ମକୁ ଫେରିବା ସତ୍ୱେ ମ୍ୟାଚ ହାରିଲା ବାଙ୍ଗାଲୋର

ମୁମ୍ବାଇ: ଏଠାରେ ଶନିବର ଅନୁଷ୍ଠିତ ଆଇପିଏଲର ଏକ ରୋମାଂଚକ ମୁକାବିଲାରେ ଗୁଜରାଟ ଟାଇଟନ୍ସ ୬ ୱିକେଟରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ବାଙ୍ଗାଲୋର ବିରାଟ କୋହଲି (୫୮)ଙ୍କ ଚମତ୍କାର ଅର୍ଦ୍ଧଶତକ ବଳରେ ୨୦ ଓଭରରେ ୬ ୱିକେଟ ହରାଇ ୧୭୦ ରନ କରିଥିଲା । ଜବାବରେ ଗୁଜରାଟ ୬ ୱିକେଟରେ ବିଜୟ ଲକ୍ଷ୍ୟ ହାସଲ କରି ନେଇଥିଲା । ଡେଭିଡ ମିଲର (୩୯ ନଟଆଉଟ) ଓ ରାହୁଲ ତେୱାତିଆଙ୍କ ଅପରାଜିତ ୪୩ ରନ ସହାୟତାରେ ବିଜୟ ଲକ୍ଷ୍ୟକୁ ଆଉ ୩ଟି ବଲ ବାକି ଥାଇ ହାସଲ କରି ନେଇଥିଲା ।
ଫର୍ମକୁ ଫେରିଲେ କୋହଲି: ବାଙ୍ଗାଲୋର ଅଧିନାୟକ ଫାପ ଡୁ ପ୍ଲେସି ପ୍ରଥମେ ବ୍ୟାଟିଂ କରିବା ପାଇଁ ନିଷ୍ପତି ନେଇଥିଲେ । ବିରାଟ କୋହଲି ଦୀର୍ଘ ଦିନ ପରେ ଫର୍ମକୁ ଫେରିବା ସହ ୫୩ ବଲରେ ୫୮ ରନ ସଂଗ୍ରହ କରିଥିଲେ । ରଜତ ପାଟିସାର ୫୨ ଓ ଗ୍ଲେନ ମ୍ୟାକ୍ସୱେଲ ୩୩ ରନର ଇନିଂସ ଖେଳିଥିଲେ । ଗୁଜରାଟ ପକ୍ଷରୁ ପ୍ରଦୀପ ସାଙ୍ଗୱାନ ସର୍ବାଧିକ ୨ଟି ୱିକେଟ ଅକ୍ତିଆର କରିଥିଲେ ।