ନିର୍ଭୟରେ କରନ୍ତୁ ଭଗବଦ୍ ଗୀତା ପାଠ, ବଙ୍ଗଳାରେ ବଦଳିଛି ସ୍ଥିତି: ହିନ୍ଦୁ ବିରୋଧୀଙ୍କୁ ଶୁଭେନ୍ଦୁଙ୍କ ଟାର୍ଗେଟ

କୋଲକାତା: ପଶ୍ଚିମବଙ୍ଗରେ ଏବେ ହିନ୍ଦୁ ସାଧୁସନ୍ଥ କିମ୍ବା ସନାତନ ଧର୍ମକୁ ଅପମାନିତ କଲେ ଅପରାଧୀଙ୍କୁ ସିଧାସଳଖ ଜେଲ୍ ଦଣ୍ଡ ଭୋଗିବାକୁ ପଡ଼ିବ । ଏଭଳି ଏକ କଠୋର ତଥା ସ୍ପଷ୍ଟ ଚେତାବନୀ ଦେଇଛନ୍ତି ପଶ୍ଚିମବଙ୍ଗର ନବନିର୍ବାଚିତ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ । କୋଲକାତାଠାରେ ରବିବାର ଆୟୋଜିତ ଏକ ବିଶାଳ ‘ଗୀତା ପାଠ’ କାର୍ଯ୍ୟକ୍ରମରେ ଯୋଗଦେଇ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ହିନ୍ଦୁ ବିରୋଧୀ ମାନସିକତା ରଖୁଥିବା ଗୋଷ୍ଠୀଙ୍କ ଉପରେ ଖୁବ୍ ବର୍ଷିଛନ୍ତି ।

ଏହି ଧାର୍ମିକ ସମାବେଶରେ ଉଦବୋଧନ ଦେଇ ଶୁଭେନ୍ଦୁ କହିଛନ୍ତି ଯେ, “ବର୍ତ୍ତମାନ ପଶ୍ଚିମବଙ୍ଗର ସ୍ଥିତି ସମ୍ପୂର୍ଣ୍ଣ ବଦଳିଯାଇଛି । ପୂର୍ବର ସେହି ଭୟ ଓ ଆତଙ୍କର ବାତାବରଣ ଆଉ ରାଜ୍ୟରେ ନାହିଁ । ତେଣୁ ସମସ୍ତେ ନିର୍ଭୟରେ ତଥା ଖୋଲାଖୋଲି ଭାବେ ଭଗବଦ୍ ଗୀତା ପାଠ କରନ୍ତୁ ।” ରାଜ୍ୟର ବର୍ତ୍ତମାନ ଶାସନ ବ୍ୟବସ୍ଥାକୁ ଇଙ୍ଗିତ କରି ସେ କହିଥିଲେ ଯେ, “ବଙ୍ଗଳାରେ ଏବେ ‘ଟିକା, ଶିଖା, ଧୋତି ଏବଂ ତୁଳସୀ’ର ସରକାର ଆସିଯାଇଛି ।” ତାଙ୍କର ଏହି ବୟାନ ସିଧାସଳଖ ପୂର୍ବତନ ସରକାରର କାର୍ଯ୍ୟଶୈଳୀ ଉପରେ ଏକ କଡ଼ା ପ୍ରହାର ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି । ପୂର୍ବରୁ ରାଜ୍ୟରେ ସାଧୁସନ୍ଥମାନେ ଅନେକ ସମୟରେ ଅବହେଳିତ ତଥା ଅସୁରକ୍ଷିତ ମନେ କରୁଥିବା ବେଳେ, ଏବେ ସେମାନଙ୍କ ସମ୍ମାନ ତଥା ସୁରକ୍ଷା ସୁନିଶ୍ଚିତ କରିବା ତାଙ୍କ ସରକାରର ସର୍ବୋଚ୍ଚ ପ୍ରାଥମିକତା ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି ।

ଏହି ଅବସରରେ ମୁଖ୍ୟମନ୍ତ୍ରୀ କେବଳ ପଶ୍ଚିମବଙ୍ଗ ନୁହେଁ, ବରଂ ପଡ଼ୋଶୀ ବାଂଲାଦେଶରେ ସଂଖ୍ୟାଲଘୁ ହିନ୍ଦୁମାନଙ୍କ ଉପରେ ହେଉଥିବା ଅତ୍ୟାଚାର ପ୍ରସଙ୍ଗ ମଧ୍ୟ ଉଠାଇଛନ୍ତି । ବାଂଲାଦେଶ ଜେଲରେ ବନ୍ଦୀ ଥିବା ହିନ୍ଦୁ ସନ୍ଥ ଚିନ୍ମୟ କୃଷ୍ଣ ଦାସଙ୍କ ସ୍ଥିତି ବଖାଣି ସେ ଭାବପ୍ରବଣ ହୋଇପଡ଼ିଥିଲେ । ସେ କହିଛନ୍ତି ଯେ, ନିକଟରେ ମା’ଙ୍କ ଅନ୍ତିମ ସଂସ୍କାର ପାଇଁ ମାତ୍ର କିଛି ଘଣ୍ଟାର ପେରୋଲରେ ଆସିଥିବା ଚିନ୍ମୟ ପ୍ରଭୁଙ୍କ ଆଖିର ଲୁହ ସମଗ୍ର ବିଶ୍ୱର ସନାତନୀମାନଙ୍କ ହୃଦୟକୁ ଦୋହଲାଇ ଦେଇଛି ।

ନିଜ ପରିବାରର ସଂଘର୍ଷମୟ ଅତୀତକୁ ମନେ ପକାଇ ଶୁଭେନ୍ଦୁ କହିଥିଲେ ଯେ, ଦେଶ ବିଭାଜନ ସମୟରେ କେବଳ ହିନ୍ଦୁ ହୋଇଥିବା କାରଣରୁ ତାଙ୍କ ମା’ଙ୍କୁ ନିଜର ସର୍ବସ୍ୱ ଛାଡ଼ି ଜୀବନ ବଞ୍ଚାଇବା ପାଇଁ ବାଂଲାଦେଶରୁ ଭାରତକୁ ପଳାଇ ଆସିବାକୁ ପଡ଼ିଥିଲା । ସେହି ବିସ୍ଥାପନର ଯନ୍ତ୍ରଣା ତାଙ୍କ ପରିବାର ଭୋଗିଛି, ତେଣୁ ଏବେ ସନାତନୀମାନଙ୍କୁ ଆଉ କେହି ଦବେଇ ପାରିବେ ନାହିଁ ।

ମୁଖ୍ୟମନ୍ତ୍ରୀଙ୍କ ଏହି କଡ଼ା ଚେତାବନୀ ପରେ ପଶ୍ଚିମବଙ୍ଗରେ ହିନ୍ଦୁ ସଂଗଠନ ଓ ସାଧୁସମାଜ ମଧ୍ୟରେ ଏକ ନୂତନ ଉତ୍ସାହ ଦେଖିବାକୁ ମିଳିଛି । ରାଜ୍ୟରେ ଭାରତୀୟ ସଂସ୍କୃତି ଏବଂ ପରମ୍ପରାର ପୁନରୁଦ୍ଧାର ପାଇଁ ସରକାର ବଦ୍ଧପରିକର ବୋଲି ଶୁଭେନ୍ଦୁ ସ୍ପଷ୍ଟ କରିଛନ୍ତି ।