ଅନୁଗୁଳ: ଢେଙ୍କାନାଳ ସାଂସଦ ମହେଶ ସାହୁଙ୍କ ବାସଭବନରୁ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି । ସାଂସଦଙ୍କ ପାଲଲହଡ଼ା ଥାନା ପେଣ୍ଡେରାବସା ସ୍ଥିତ ବାସଭବନରୁ ବିଳମ୍ବିତ ରାତିରେ କେହି ଦୁର୍ବୃତ୍ତ ତାଲା ଭାଙ୍ଗି ଗୋଟିଏ ଏଲସିଡି ଟିଭି ସମେତ ଅନ୍ୟାନ୍ୟ କିଛି ଜିନିଷ ଚୋରି କରି ନେଇଛନ୍ତି । ଏନେଇ ଶନିବାର ପାଲଲହଡ଼ା ଥାନାରେ ଅଭିଯୋଗ ହୋଇଛି । ସୂଚନା ଅନୁସାରେ ଉକ୍ତ ଘରେ ଗଗନ ବେହେରା ନାମକ ଜଣେ ଯୁବକ ରାତ୍ର ଜଗୁଆଳି ଭାବେ କାର୍ଯ୍ୟ କରୁଥିଲେ । ଗଗନ ଜଣେ ବୋଲେରୋ ଚାଳକ । ସେ ୭ ଦିନ ହେବ ସେଠାରେ ଅନୁପସ୍ଥିତ ଥିବା ଜଣାପଡ଼ିଛି ।
ଏହାର ସୁଯୋଗ ନେଇ କେହି ଦୁର୍ବୃତ୍ତ ତାଲା ଭାଙ୍ଗି ଭିତରେ ପଶିବା ସହ ଚୋରି କରି ଫେରାର ହୋଇ ଯାଇଛନ୍ତି । ତେବେ ରାତ୍ର ଜଗୁଆଳ ଗଗନ ଅନୁପସ୍ଥିତ ସମ୍ପର୍କରେ ସେ ଅବଗତ କରାଇ ନଥିବା ସାଂସଦଙ୍କ ପ୍ରତିନିଧି ସଞ୍ଜିବ ବେହେରା ପ୍ରକାଶ କରିଛନ୍ତି । ଚୋରି ନେଇ ସାଂସଦଙ୍କ ପ୍ରତିନିଧି ପାଲଲହଡା ଥାନାରେ ଅଭିଯୋଗ କରିଥିବା ବେଳେ ପୋଲିସ ତଦନ୍ତ କରୁଛି ।
Comments are closed.