ରାଉରକେଲା: ରାଉରକେଲାର ଝିରପାଣି ନିକଟରେ ଡବଲ୍ ଏନକାଉଣ୍ଟର ହୋଇଛି। ୨ ହତ୍ୟା ଅଭିଯୁକ୍ତଙ୍କୁ ପୋଲିସ୍ ଏନକାଉଣ୍ଟର କରିଥିବା ଜଣାପଡ଼ିଛି।
ପୋଲିସ୍ ଏନକାଉଣ୍ଟରରେ ଚୁନୁ ଓ ସୁଶାନ୍ତ ଗୁରୁତର ଆହତ ହୋଇଛନ୍ତି। ଆହତ ଅଭିଯୁକ୍ତମାନଙ୍କୁ ତୁରନ୍ତ ଚିକିତ୍ସା ପାଇଁ ରାଉରକେଲା ସରକାରୀ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା।
ପୋଲିସ ସୂଚନା ଅନୁଯାୟୀ ସେକ୍ଟର-୭ ପୋଲିସ ଥାନା ଅନ୍ତର୍ଗତ ସରସ୍ୱତୀ ଶିଶୁ ମନ୍ଦିର ନିକଟ ରାମେଶ୍ୱର ବସ୍ତିରେ ଜୁନ୍ ୧୬ ତାରିଖରେ ହୋଇଥିବା ଏକ ହତ୍ୟା ମାମଲାରେ ସମ୍ପୃକ୍ତ ଥିବା ଅଭିଯୋଗରେ ଏହି ଦୁଇଜଣଙ୍କୁ ଖୋଜାଖୋଜି କରାଯାଇଥିଲା।
ହତ୍ୟା ପରେ ଅଭିଯୁକ୍ତ ଘଟଣାସ୍ଥଳରୁ ପଳାଇ ଯାଇଥିବା ଅଭିଯୋଗ ହୋଇଥିଲା। ଅପରାଧରେ ସମ୍ପୃକ୍ତ ଲୋକଙ୍କୁ ତୁରନ୍ତ ଗିରଫ ଦାବି କରି ବାସିନ୍ଦାମାନେ ଥାନା ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ।
ପ୍ରାଥମିକ ତଦନ୍ତରୁ ଜଣାପଡିଛି ଯେ ହତ୍ୟାକାଣ୍ଡ ଘଟାଇଥିବା ଗୋଷ୍ଠୀ ଆକ୍ରମଣରେ ପ୍ରାୟ ୩୦ ଜଣ ସମ୍ପୃକ୍ତ ଥିଲେ। ଅଭିଯୁକ୍ତଙ୍କ ବିରୁଦ୍ଧରେ ଚାଲିଥିବା ଅଭିଯାନର ଏକ ଅଂଶ ସ୍ୱରୂପ ପୋଲିସ ଦୁଇ ପ୍ରମୁଖ ସନ୍ଦିଗ୍ଧଙ୍କୁ ଏନକାଉଣ୍ଟର କରିଛି। ତେବେ ଏହି ମାମଲାରେ ଜଡିତ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ପ୍ରୟାସ ଜାରି ରହିଛି।