କଙ୍ଗୋର ଦକ୍ଷିଣ କିଭୁରେ ରୱାଣ୍ଡା-ସମର୍ଥିତ ଏମ୍୨୩ ବିଦ୍ରୋହୀମାନଙ୍କ ବଡ଼ ଆକ୍ରମଣ, ୪୦୦ରୁ ଉର୍ଦ୍ଧ୍ବ ନାଗରିକ ମୃତ

ଗୋମା: କଙ୍ଗୋ ଏବଂ ରୱାଣ୍ଡା ମଧ୍ୟରେ ସଂଘର୍ଷ ତୀବ୍ର ହୋଇଛି । ଆଞ୍ଚଳିକ ଅଧିକାରୀମାନେ ଶୁକ୍ରବାର କହିଛନ୍ତି ଯେ, ରୱାଣ୍ଡା-ସମର୍ଥିତ M23 ବିଦ୍ରୋହୀ ଗୋଷ୍ଠୀଗୁଡ଼ିକ ପୂର୍ବ କଙ୍ଗୋର ଦକ୍ଷିଣ କିଭୁ ପ୍ରଦେଶରେ ସେମାନଙ୍କର ଆକ୍ରମଣକୁ ତୀବ୍ର କରିଛନ୍ତି, ଗତ କିଛି ଦିନ ମଧ୍ୟରେ ୪୦୦ ରୁ ଅଧିକ ସାଧାରଣ ନାଗରିକଙ୍କୁ ହତ୍ୟା କରିଛନ୍ତି ।

ଅଧିକାରୀମାନେ ଦାବି କରିଛନ୍ତି ଯେ, ରୱାଣ୍ଡାର ସ୍ୱତନ୍ତ୍ର ବାହିନୀ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ ଉଭିରା ସହରରେ ଉପସ୍ଥିତ ଅଛନ୍ତି । ଗତ ସପ୍ତାହରେ ଆମେରିକାର ମଧ୍ୟସ୍ଥତାରେ ୱାଶିଂଟନରେ କଙ୍ଗୋ ଏବଂ ରୱାଣ୍ଡାର ରାଷ୍ଟ୍ରପତିଙ୍କ ଦ୍ୱାରା ସ୍ୱାକ୍ଷରିତ ଶାନ୍ତି ଚୁକ୍ତି ସତ୍ତ୍ୱେ ଏହି ନୂତନ ଆକ୍ରମଣ ହୋଇଛି ।

ଗତ ସପ୍ତାହରେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୱାଶିଂଟନରେ କଙ୍ଗୋ ଏବଂ ରୱାଣ୍ଡା ମଧ୍ୟରେ ଏକ ଚୁକ୍ତିନାମା ମଧ୍ୟସ୍ଥତା କରିଥିଲେ । କିନ୍ତୁ ବର୍ତ୍ତମାନ ଏହା ଭାଙ୍ଗି ଯାଇଛି । କାରଣ ହେଉଛି M23 ସେହି ଚୁକ୍ତିନାମାରେ ଅନ୍ତର୍ଭୁକ୍ତ ନଥିଲା । ବିଦ୍ରୋହୀ ଗୋଷ୍ଠୀ କଙ୍ଗୋ ସହିତ ପୃଥକ ଭାବରେ ଆଲୋଚନା କରୁଛି, ଏବଂ ଉଭୟ ପକ୍ଷ ପରସ୍ପରକୁ ଏହି ବର୍ଷ ଆରମ୍ଭରେ ଘୋଷିତ ଯୁଦ୍ଧବିରତି ଭଙ୍ଗ କରିବାର ଅଭିଯୋଗ ଆଣୁଛନ୍ତି । ତଥାପି, ଏହି ଚୁକ୍ତିନାମା ରୁୱାଣ୍ଡାକୁ ସଶସ୍ତ୍ର ଗୋଷ୍ଠୀଗୁଡ଼ିକୁ ସମର୍ଥନ ବନ୍ଦ କରିବାକୁ ଏବଂ ଶତ୍ରୁତା ସମାପ୍ତ କରିବାକୁ ବାଧ୍ୟ କରିଛି । “ଉଭିରା ଏବଂ ପ୍ରାଦେଶିକ ରାଜଧାନୀ ବୁକାଭୁ ମଧ୍ୟରେ ଥିବା ଅଞ୍ଚଳରେ ଗୁଳିଚାଳନା, ଗ୍ରେନେଡ୍ ଏବଂ ବୋମା ଦ୍ୱାରା ୪୧୩ରୁ ଅଧିକ ନାଗରିକଙ୍କ ମୃତ୍ୟୁ ହୋଇଛି,” ଦକ୍ଷିଣ କିଭୁ ସରକାରଙ୍କ ମୁଖପାତ୍ର ବୁଧବାର ବିଳମ୍ବିତ ଏକ ବିବୃତ୍ତିରେ କହିଛନ୍ତି ।