ଅନୁବାଦ କବିତା : ପ୍ରେମ ପ୍ରେମ ପ୍ରେମ

ମୂଳ ରଚନା : ଡେରେକ ୱାଲକର୍ଟ 

ସମୟ ଆସିବ, ଯେତେବେଳେ ଅତି ଆନନ୍ଦରେ
ନିଜ ଘରର ଦ୍ୱାର ଦେଶରେ
ନିଜ ଆସିବାକୁ ଅଭ୍ୟର୍ଥନା ଜଣାଇବ ,
ତୁମ ନିଜ ଆଇନାରେ ନିଜକୁ ଅନାଇ
ପରସ୍ପରକୁ ସ୍ୱାଗତ କରିବ ଏବଂ କହିବ
ଏଇଠି ବସ, ଖାଅ ।
ତୁମେ ପୁଣିଥରେ ତୁମ ଅଚିହ୍ନା ନିଜକୁ
ଭଲ ପାଇବ।
ବାଢି ଆଣ ସୁରା ଓ ଆହାର,
ପୁଣି ଥରେ ନିଜ ହୃଦୟକୁ
ନିଜକୁ ହିଁ ଫେରାଇ ଦିଅ।
ପ୍ରତ୍ୟର୍ପଣ କରିଦିଅ ସେଇ ଅପରିଚିତକୁ
ଯିଏ ତୁମକୁ ଜୀବନସାରା ଭଲ ପାଇଥିଲା,
ତୁମେ କିନ୍ତୁ ଅନ୍ୟ ପାଇଁ ଅନାଦର କରିଥିଲ ତାକୁ
ମାତ୍ର ସେ ଠିକ ଚିହ୍ନିଥିଲା
ତୁମ ହୃଦୟକୁ।

ବହି ଥାକରେ ଥିବା ସବୁ ପ୍ରେମପତ୍ର , ଫଟୋ ଚିତ୍ର,
ତଥା ନିରାଶାରେ ପୂର୍ଣ୍ଣ ଲେଖାମାନ
କାଢ଼ି ପକାଅ, ଫିଙ୍ଗି ଦିଅ
ତୁମ ନିଜ ଚେହେରାକୁ ଆଇନା କାଚରୁ
ଅଲଗା କରିଦିଅ।

ବସିପଡ଼ , ନିଜ ଜୀବନକୁ ନେଇ ଉତ୍ସବ ମନାଅ।

ଅନୁବାଦ : ମନୋରଞ୍ଜନ ହୋତା