ମୂଳ ରଚନା : ମହାଦେବ ସାହା 
ସଙ୍ଗହୀନ ଗଛ ପରି ଏକା ହୋଇଯାଅ
ଠିକ ବ୍ୟଥାରେ ମଗ୍ନ କଏଦୀ ପରି ଅସହାୟ
ନିର୍ଜନ ନଦୀ ସମ
ହୋଇଯାଅ ତୁମେ
ଆହୁରି ପୃଥକ, ବିଚ୍ଛିନ୍ନ
ସ୍ୱତନ୍ତ୍ର, ସ୍ୱାଧୀନ, ଖଣ୍ଡ ଖଣ୍ଡ
ୟୁରୋପର ମାନଚିତ୍ର ପରି;
ଅଲଗା ହୋଇଯାଅ
ସବୁ ସଙ୍ଘଠାରୁ
ଭିନ୍ନ ହୋଇଯାଅ ମୋ ଉନ୍ମାଦନାରୁ
ଆକାଶର ସର୍ବଶେଷ ଉଦାସ ପକ୍ଷୀ ପରି
ନିର୍ଜନ , ନିସ୍ତବ୍ଧ ପାହାଡ଼ ପରି ମୌନ ହୋଇଯାଅ।
ତୁମେ ଏତେ ଦୂରକୁ ଚାଲିଯାଅ
ଯେ କାହାରି ଡାକ ବି ନ ପହଞ୍ଚୁ ସେଠାରେ
ଅବା କେହି ଶୁଣି ନପାରନ୍ତୁ ଡାକ ତୁମର
ସେଇ ଜନଶୂନ୍ୟ, ନିଃଶବ୍ଦ, ଦ୍ବୀପପରି
ନିଜର ଛାଇ ପରି, ପଦଚିହ୍ନ ପରି
ଶୂନ୍ୟତା ପରି ଏକା ହୋଇଯାଅ
ଏକା ହୋଇଯାଅ ଏଇ ଦୀର୍ଘଶ୍ବାସ ପରି
ଏକା ହୋଇଯାଅ ।
ଅନୁବାଦ : ମନୋରଞ୍ଜନ ହୋତା
Comments are closed.