କରଞ୍ଜିଆ : ବର୍ତ୍ତମାନ ଶୀତ ଋତୁ ଚାଲିଛି । ସାଧାରଣତଃ ଶୀତ ଋତୁରେ ମୟୁରଭଞ୍ଜ ଜିଲ୍ଲାରେ ଥିବା ଶିମିଳିପାଳ ଅଭୟାରଣ୍ୟକୁ ଶହ ଶହ ପର୍ଯ୍ୟଟକଙ୍କର ସୁଅ ଛୁଟେ । କିନ୍ତୁ ଅଭୟାରଣ୍ୟ ମଧ୍ୟରେ ଥିବା ମୁଖ୍ୟ ରାସ୍ତାର ଉନ୍ନତିକରଣ ଓ ରକ୍ଷଣାବେକ୍ଷଣା ନେଇ ଅଧିବାସୀମାନେ ଦାବି କରିଆସୁଥିଲେ । ଏପରିକି ପ୍ରତିବାଦରେ ୨୧ ଦିନ ହେବ ଶିମିଳିପାଳ ବନ୍ଦ ମଧ୍ୟ ରହିଛି । କିନ୍ତୁ ଶିମିଳିପାଳ କର୍ତ୍ତୁପକ୍ଷ ନିଘୋଡ ନିଦ୍ରାରେ ଶୋଇରହିଛନ୍ତି । ଫଳରେ ଆନ୍ଦୋଳନକାରୀ ମାନେ ନିଜ ଜିଦରେ ଅଟକ ରହିଛନ୍ତି ।
ରାସ୍ତା ନହେବା ପର୍ଯ୍ୟନ୍ତ ଅନିର୍ଦ୍ଦିଷ୍ଟ କାଳ ପାଇଁ ଶିମିଳିପାଳ ଅଭୟାରଣ୍ୟ ବନ୍ଦ ରହିବ ବୋଲି ଚେତାବନୀ ଦେଇଛନ୍ତି । ଏ ନେଇ ପ୍ରଶାସନ ଏବଂ ଶିମିଳିପାଳ ୩ ଗ୍ରାମ ପଞ୍ଚାୟତର ଅଧିବାସୀଙ୍କ ମଧ୍ୟରେ ବୈଠକ ବସିଥିଲା । ହେଲେ କିଛି ସୁଫଳ ମିଳିନାହିଁ । ଶିମିଳିପାଳ କର୍ତ୍ତୁପକ୍ଷ ଦେଇଥିବା ପ୍ରତିଶ୍ରୁତିକୁ ପୂରଣ କରିପାରିନାହାଁନ୍ତି ।
ଫଳରେ ଶିମିଳିପାଳ ବିକାଶ ପରିଷଦ ସଙ୍ଗଠନ ଡାକରାରେ ୫ ଦଫା ଦାବି ନେଇ ଗତ ନଭେମ୍ବର ୨୫ ତାରିଖରୁ ଆନ୍ଦୋଳନକୁ ଓହ୍ଲାଇଛନ୍ତି ବିଭିନ୍ନ ପଂଚାୟତବାସୀ। ଗତକାଲି ମଧ୍ୟ ଯଶୀପୁର ବ୍ଲକ କାର୍ଯ୍ୟାଳୟର ସମ୍ମିଳନୀ କକ୍ଷରେ ଉପଜିଲ୍ଲାପାଳଙ୍କ ଅଧ୍ୟକ୍ଷତାରେ ବୈଠକ ବସିଥିଲା । ଆନ୍ଦୋଳନ ପ୍ରତ୍ୟାହୃତ ପାଇଁ ପଞ୍ଚାୟତବାସୀଙ୍କୁ ଉପଜିଲ୍ଲାପାଳ ନିବେଦନ କରିଥିଲେ । ବୈଠକରେ ଆଲୋଚନା ପରେ ଦୁଇଦିନ ସମୟ ମାଗିଛନ୍ତି ଆନ୍ଦୋଳନକାରୀ ।