ଟୋକିଓ ଅଲିମ୍ପିକ୍ସ: ଟାଇମ ମ୍ୟାଗାଜିନରେ ସମ୍ଭାବ୍ୟ ଶ୍ରେଷ୍ଠ ପ୍ରଦର୍ଶନକାରୀ ୪୮ ଆଥଲେଟଙ୍କ ମଧ୍ୟରେ ଭାରତର ସୌରଭ

ଟୋକିଓ: ଟୋକିଓ ଅଲିମ୍ପିକ୍ସରେ କେଉଁ ଆଥଲେଟ ଭଲ ପ୍ରଦର୍ଶନ କରିବେ ସେ ନେଇ ଲୋକପ୍ରିୟ ଟାଇମ ମ୍ୟାଗାଜିନ ୪୮ ଖେଳାଳିଙ୍କ ତାଲିକା ପ୍ରକାଶ କରିଛି । ଏହି ତାଲିକାରେ ଏକମାତ୍ର ଭାରତୀୟ ଏବଂ ଶୁଟର ଭାବେ ସୌରଭ ଚୌଧୁରୀ ସ୍ଥାନ ପାଇଛନ୍ତି । ସୌରଭ ଆନ୍ତର୍ଜାତୀୟ ପ୍ରତିଯୋଗିତାରେ ୬ ବର୍ଷ ମଧ୍ୟରେ ୨୨ ପଦକ ଜିତି ସାରିଛନ୍ତି । ଏଥିରେ ୮ ବିଶ୍ୱକପ ପଦକ ରହିଛି । ସେ ଏଥର ୧୦ ମିଟର ଏୟାର ପିସ୍ତଲ ଓ ୧୦ ମିଟର ଏୟାର ପିସ୍ତଲ ମିକ୍ସଡ ଟିମରେ ଭାଗ ନେବେ । ଜୁନିୟର ଏବଂ ସିନିୟର ବିଭାଗରେ ସେ ୧୦ ମିଟର ଏୟାର ପିସ୍ତଲରେ ବିଶ୍ୱ ରେକର୍ଡ ସ୍ଥାପନ କରିଛନ୍ତି । ଟାଇମ ମ୍ୟାଗାଜିନରେ ପ୍ରକାଶିତ ଅନ୍ୟ ଖ୍ୟାତନାମା ଆଥଲେଟଙ୍କ ମଧ୍ୟରେ ଜିମ୍ନାଷ୍ଟ ସିମୋନ ବାଇଲ୍ସ, ସ୍ପ୍ରଂଟର ଏଲିସନ ଫେଲିକ୍ସ, ନୋଆ ଲିଲ୍ସ, ଶେଲୀ ଏନ ଫ୍ରେଜର ଏବଂ ଲଙ୍ଗ ଡିଷ୍ଟାନ୍ସ ରନର ଏଲିଉଡ କିପଚୋଙ୍ଗ, ସନ୍ତରଣକାରୀ ସେଲେବେ ଡ୍ରେଜଲ, କେଟୀ ଲେଡେକେ ଓ ବାସ୍କେଟବଲ ଖେଳାଳି କେଭିନ ଡୁଂରଟ ସାମିଲ ।